സുധാകരനെ കളിയാക്കിയ തിരുവഞ്ചൂരിന് കൂക്കുവിളി

പയ്യന്നൂര്‍: പാര്‍ട്ടി പരിപാടിയ്ക്കിടെ കെ സുധാകരന്‍ എംപിയെ പേരെടുത്ത് പറയാതെ കളിയാക്കിയ ആഭ്യന്തര മന്ത്രി തിരുവഞ്ചകൂര്‍ രാധാകൃഷ്ണന് കൂക്കുവിളി. കെ. സുധാകരന്‍ എംപിക്ക് അനുകൂലമായി മുദ്രാവാക്യം വിളിച്ച് ഒരു കൂട്ടം കോണ്‍ഗ്രസ് പ്രവര്‍ത്തകരാണു മുദ്രാവാക്യം വിളിച്ചു ബഹളമുണ്ടാക്കിയത്. മന്ത്രിയുടെ പ്രസംഗം ആരംഭിച്ച ഉടന്‍ അഞ്ചു പേരടങ്ങിയ സംഘം മുദ്രാവാക്യം ഉയര്‍ത്തുകയായിരുന്നു.

പയ്യന്നൂരിലെ കോണ്‍ഗ്രസ് നേതാവായിരുന്ന വി ചന്ദ്രശേഖരന്‍ വൈദ്യരുടെ ചരമവാര്‍ഷികത്തിന്റെ ഭാഗമായി ഗാന്ധിപാര്‍ക്കില്‍ നടന്ന പൊതുപരിപാടിയാണ് ഗ്രൂപ്പ് പോരിന്റെ വേദിയായി മാറിയത്്. ഉദ്ഘാടനപ്രസംഗത്തില്‍ സുധാകരനെ ലക്ഷ്യമിട്ടുള്ള തിരുവഞ്ചൂരിന്റെ പരാമര്‍ശങ്ങളാണ് ഒരു വിഭാഗം കോണ്‍ഗ്രസുകാരെ പ്രകോപിപ്പിച്ചത്.

തടിയും വണ്ണവുമുള്ളതുകൊണ്ടുമാത്രം ജനങ്ങളുടെ അംഗീകാരം കിട്ടില്ലെന്ന് തിരുവഞ്ചൂര്‍ പറഞ്ഞപ്പോള്‍ ഇതിന് ഹര്‍ഷാരവത്തോടെയാണ് സുധാകരന്‍ വിരോധികള്‍ എതിരേറ്റത്. പൊതുപ്രവര്‍ത്തകര്‍ വിനയമുള്ളവരായിരിക്കണം. അല്ലാതെ ചവിട്ടുനാടകം നടത്തി ആളായിട്ട് കാര്യമില്ല. നീതിനിഷേധം ആരു നടത്തിയാലും വിടില്ലെന്നും മന്ത്രി പ്രഖ്യാപിച്ചു.

പ്രസംഗം കഴിഞ്ഞ് തിരുവഞ്ചൂര്‍ കാറിനടുത്തേക്ക് നീങ്ങിയപ്പോള്‍ സുധാകരന്റെ അടുത്ത അനുയായികളുടെ നേതൃത്വത്തില്‍ ഒരുസംഘം പ്രതിഷേധ മുദ്രാവാക്യം മുഴക്കി കാര്‍ വളഞ്ഞു. ചാണ്ടിയും തിരുവഞ്ചൂരുമല്ല കോണ്‍ഗ്രസെന്ന് വിളിച്ചാണ് ഇവര്‍ മന്ത്രിയെ യാത്രയാക്കിയത്.

വളപട്ടണം പൊലീസ് കസ്റ്റഡിയിലെടുത്ത യൂത്ത് കോണ്‍ഗ്രസ് പ്രവര്‍ത്തകനെ സ്‌റ്റേഷനിലെത്തി സുധാകരന്‍ മോചിപ്പിച്ചതിനെ തിരുവഞ്ചൂര്‍ വിമര്‍ശിച്ചതു വലിയ വിവാദം ഉയര്‍ത്തിയിരുന്നു ഇതിന്റെ പശ്ചാത്തലത്തിലാണ് പരസ്യമായ വിഴുപ്പലക്കല്‍ അരങ്ങേറിയത്.

English summary

Thiruvanchoor Radhakrishnan strong attitude against K Sudhakaran gave him a wrong impression among the congress worekrs.