വിജയ്ക്ക് ആശ്വാസം; ഭാര്യ സംഗീതയ്ക്ക് 12 കോടി കടം കൊടുത്തതില് പരിശോധന ഇല്ല, ഹര്ജി തള്ളി
തമിഴക വെട്രി കഴകം (TVK) തലവൻ വിജയ്യുടെ തിരഞ്ഞെടുപ്പ് സത്യവാങ്മൂലവുമായി ബന്ധപ്പെട്ട് ഉയർന്ന വിവാദങ്ങളിൽ മദ്രാസ് ഹൈക്കോടതി ഇന്ന് സുപ്രധാന വിധി പുറപ്പെടുവിച്ചു. ഭാര്യ സംഗീതയ്ക്ക് 12.6 കോടി രൂപ കടം നൽകിയിരിക്കുന്നു എന്ന് സത്യവാങ്മൂലത്തിൽ രേഖപ്പെടുത്തിയത് വലിയ ചർച്ചയായിരുന്നു. വിജയ്യുടെ നാമനിർദേശ പത്രിക സൂക്ഷ്മപരിശോധന നടത്തണമെന്ന ആവശ്യം തള്ളിക്കൊണ്ടാണ് ഹൈക്കോടതിയുടെ ഇപ്പോഴത്തെ ഉത്തരവ്.
നടൻ വിജയ് ഈ നിയമസഭാ തിരഞ്ഞെടുപ്പിൽ പെരമ്പൂർ, തിരുച്ചിറപ്പള്ളി ഈസ്റ്റ് എന്നീ രണ്ട് മണ്ഡലങ്ങളിൽ നിന്നാണ് ജനവിധി തേടിയത്. തൻ്റെയും ഭാര്യ സംഗീതയുടെയും സ്ഥാവര-ജംഗമ സ്വത്തുക്കളടക്കമുള്ള എല്ലാ സാമ്പത്തിക വിവരങ്ങളും ഉൾപ്പെടുത്തി അദ്ദേഹം സത്യവാങ്മൂലം സമർപ്പിച്ചിരുന്നു.
വിജയ് സമർപ്പിച്ച സ്വത്ത് വിവരങ്ങളിൽ നിരവധി വൈരുദ്ധ്യങ്ങളുണ്ടെന്ന് ചൂണ്ടിക്കാട്ടി നേരത്തെ ഒരു ഹർജി ഹൈക്കോടതിയിൽ ഫയൽ ചെയ്തിരുന്നു. ഈ കേസ് പരിഗണിച്ച കോടതി, വിഷയത്തിൻ്റെ ഗൗരവം കണക്കിലെടുത്ത് അടുത്ത വാദം കേൾക്കുന്നതിനായി ജൂൺ 3-ലേക്ക് മാറ്റിയിട്ടുണ്ട്.
ഇതേ വിഷയത്തിൽ, സ്വത്ത് വിവരങ്ങൾ സംബന്ധിച്ച് കൂടുതൽ അന്വേഷണം ആവശ്യപ്പെട്ട് ഹൈക്കോടതിയിൽ മറ്റൊരു റിട്ട് ഹർജി കൂടി സമർപ്പിച്ചിരുന്നു. ഇതാണ് തള്ളിയത്. ചെന്നൈ കൊടുങ്ങയൂർ സ്വദേശിയായ 32 വയസ്സുകാരൻ വെങ്കടേഷ് ആണ് ഈ ഹർജി നൽകിയത്. പെരമ്പൂർ മണ്ഡലത്തിലെ ഒരു വോട്ടർ എന്ന നിലയിൽ, അവിടെ മത്സരിക്കുന്ന ഓരോ സ്ഥാനാർത്ഥിയുടെയും സ്വത്ത് വിവരങ്ങൾ അറിയാൻ തനിക്ക് അവകാശമുണ്ടെന്ന് വെങ്കടേഷ് ഹർജിയിൽ വ്യക്തമാക്കി.
"ഫോം 26-ൽ സ്ഥാനാർത്ഥികൾ നൽകേണ്ട വിവരങ്ങൾ ഒരു സുപ്രധാന ഭരണഘടനാപരമായ ഉത്തരവാദിത്തമാണ്," ഹർജിയിൽ പറയുന്നു. "പ്രധാന വിവരങ്ങൾ മറച്ചുവെക്കുകയോ, തെറ്റായി രേഖപ്പെടുത്തുകയോ, മാറ്റം വരുത്തുകയോ ചെയ്യുന്നത് തിരഞ്ഞെടുപ്പ് പ്രക്രിയയിൽ വഞ്ചനയായി കണക്കാക്കും" എന്നും വെങ്കടേഷ് കൂട്ടിച്ചേർത്തു.
വിജയ് തൻ്റെ കുടുംബാംഗങ്ങൾക്കും അടുത്ത സ്ഥാപനങ്ങൾക്കും വലിയ തുകകൾ കടമായി നൽകിയതായി സത്യവാങ്മൂലത്തിൽ രേഖപ്പെടുത്തിയിട്ടുണ്ട്. അതിൽ ഭാര്യ സംഗീതയ്ക്ക് നൽകിയ ₹12.6 കോടി രൂപ പ്രധാനമാണ്. ഈ ആരോപണങ്ങളെ തുടർന്ന് നിയമപരമായ പ്രശ്നങ്ങളും ആദായനികുതി വകുപ്പിന്റെ അന്വേഷണവും നേരിടേണ്ടി വരുമെന്ന് നേരത്തെ ചില കോണുകളിൽ നിന്ന് നിരീക്ഷണങ്ങൾ ഉയർന്നിരുന്നു.
ജസ്റ്റിസുമാരായ എസ്.എ. ധർമ്മാധികാരിയും ജസ്റ്റിസ് ജി. അരുൾമുരുഗനും ഉൾപ്പെട്ട ഡിവിഷൻ ബെഞ്ചാണ് ഇന്ന് രാവിലെ കേസ് പരിഗണിച്ചത്. വിശദമായ വാദങ്ങൾക്ക് ശേഷം വിജയുടെ നാമനിർദേശ പത്രിക സൂക്ഷ്മപരിശോധന നടത്തണമെന്ന ആവശ്യം തള്ളിക്കൊണ്ട് കോടതി ഉത്തരവ് പുറത്തിറക്കി. ഈ വിധി വിജയ്യുടെ രാഷ്ട്രീയ യാത്രയിൽ തൽക്കാലം ആശ്വാസകരമാണെന്ന് വിലയിരുത്തപ്പെടുന്നു.
Click it and Unblock the Notifications
Sign in with Google