ഡിജിറ്റല് ഇടപാടുകള് നടത്തുന്നവര്ക്ക് കൂടുതല് ആനുകൂല്യങ്ങളുമായി കേന്ദ്രസര്ക്കാര്...
ഡെബിറ്റ് , ക്രഡിറ്റ് കാര്ഡുപയോഗിച്ച് 2000 രൂപ വരെയുള്ള ഇടപാടുകള്ക്ക് നേരത്തെ സര്വീസ് ടാക്സ് ഒഴിവാക്കിയിരുന്നു.
ദില്ലി: രാജ്യത്ത് ഡിജിറ്റല് ഇടപാടുകള് നടത്തുന്നവര്ക്ക് കൂടുതല് ആനുകൂല്യങ്ങള് കേന്ദ്രസര്ക്കാര് പ്രഖ്യാപിച്ചു. രാജ്യത്ത് കറന്സി രഹിത ഇടപാടുകള് പ്രോത്സാഹിപ്പിക്കുന്നതിന്റെ ഭാഗമായാണ് ആനുകൂല്യങ്ങള് നല്കുന്നതെന്ന് കേന്ദ്ര ധനമന്ത്രി അരുണ് ജെയ്റ്റ്ലി ദില്ലിയില് പറഞ്ഞു.
ഡെബിറ്റ് , ക്രഡിറ്റ് കാര്ഡുപയോഗിച്ച് 2000 രൂപ വരെയുള്ള ഇടപാടുകള്ക്ക് നേരത്തെ സര്വീസ് ടാക്സ് ഒഴിവാക്കിയിരുന്നു. കാര്ഡ് ഉപയോഗിച്ചുള്ള ഇടപാടുകള് വര്ധിപ്പിക്കാന് ഈ ആനുകൂല്യങ്ങള് കൊണ്ട് സാധിക്കും. കാര്ഡ് ഉപയോഗിച്ച് പെട്രോള് പമ്പുകളില് നിന്ന് ഇന്ധനം നിറയ്ക്കുന്നവര്ക്ക് വിലക്കുറവ് ലഭിക്കും. കൂടാതെ ജനറല് ഇന്ഷൂറന്സ് പ്രീമിയം അടക്കുന്നവര്ക്കും, ലൈഫ് ഇന്ഷൂറന്സ് പ്രീമിയം അടക്കുന്നവര്ക്കും കേന്ദ്ര സര്ക്കാര് കൂടുതല് ഇളവുകള് നല്കും.
0.75% വില കിഴിവ് ലഭിക്കും
കാര്ഡുപയോഗിച്ച് പെട്രോള് പമ്പുകളില് പണമടയ്ക്കുന്നവര്ക്ക് പെട്രോളിനും ഡീസലിനും 0.75% വരെ വിലക്കുറവ് ലഭിക്കും.
സൗജന്യ ഇന്ഷൂറന്സ്
ഓണ്ലൈന് വഴി ട്രെയിന് ടിക്കറ്റ് എടുക്കുന്നവര്ക്ക് 10 ലക്ഷം രൂപയുടെ സൗജന്യ ഇന്ഷൂറന്സ് നല്കും.
ഇന്ഷൂറന്സ് പ്രീമിയത്തില് ഇളവ്
കാര്ഡുപയോഗിച്ചോ, ഓണ്ലൈന് വഴിയോ ഇന്ഷൂറന്സ് പ്രീമിയം അടയ്ക്കുന്നവര്ക്ക് ജനറല് ഇന്ഷൂറന്സ് പ്രീമിയത്തില് 10% വും ലൈഫ് ഇന്ഷൂറന്സ് പ്രീമിയത്തില് 8% ഇളവ്.
കര്ഷകര്ക്കും നേട്ടം
കിസാന് ക്രെഡിറ്റ് കാര്ഡുള്ള കര്ഷകര്ക്ക് നബാര്ഡ് രുപേ കാര്ഡുകള് നല്കും
പത്ത് ശതമാനം ഇളവ്
കാര്ഡുപയോഗിച്ച് ടോള് പ്ലാസയില് പണമടയ്ക്കുന്നവര്ക്ക് 10% വരെ ഇളവ് ലഭിക്കും