ഇന്ത്യയില് കാന്സര് ചികിത്സാ മരുന്നുകള് കിട്ടാനില്ല..! കാരണക്കാരന് പ്ലാറ്റിനമോ?
കാന്സര് ചികിത്സാ മരുന്നുകള്ക്ക് ഇന്ത്യയില് ക്ഷാമം നേരിടുന്നതായി റിപ്പോര്ട്ട്. വളരെ സാധാരണയായി ഉപയോഗിക്കുന്നതും വിലകുറഞ്ഞതുമായ രണ്ട് കീമോതെറാപ്പി മരുന്നുകളായ സിസ്പ്ലാറ്റിന്, കാര്ബോപ്ലാറ്റിന് എന്നിവയ്ക്ക് കഴിഞ്ഞ രണ്ടാഴ്ചയായി രാജ്യത്ത് ക്ഷാമം നേരിടുന്നു എന്നാണ് റിപ്പോര്ട്ട്. സിസ്പ്ലാറ്റിന്, കാര്ബോപ്ലാറ്റിന് എന്നിവ രാജ്യത്തുടനീളം വില്പ്പനയില് നിന്ന് അപ്രത്യക്ഷമായതിനാല്, ഓങ്കോളജിസ്റ്റുകള് ആശങ്കാകുലരാണ്.
ഹോര്മുസ് പ്രതിസന്ധി മൂലമുണ്ടായ അസംസ്കൃത വസ്തുക്കളുടെ വിലയിലെ വര്ധനവും സര്ക്കാരിന്റെ വില നിയന്ത്രണത്തിലായതിനാല് കമ്പനികള്ക്ക് വില ഉയര്ത്താന് കഴിയാത്തതുമാണ് ഇതിന് കാരണം. കഴിഞ്ഞ രണ്ടാഴ്ചയായി ഈ മരുന്നുകളുടെ ക്ഷാമം നിലനില്ക്കുന്നുണ്ടെന്നും കുറഞ്ഞ ഡോസുകള് പൂര്ണമായും ഇല്ലാതായെന്നും ചില സ്റ്റോറുകളില് ഉയര്ന്ന ഡോസുകള് ഇപ്പോഴും ലഭ്യമാണെന്നും ഡോക്ടര്മാര് പറയുന്നു.
പ്ലാറ്റിനം ഉല്പാദിപ്പിക്കുന്ന എല്ലാ കീമോതെറാപ്പി ഏജന്റുകളുടെയും ക്ഷാമമുണ്ടെന്നും ആഗോളതലത്തില് പ്ലാറ്റിനത്തിന്റെ വില വര്ധിച്ചതാണ് ഇതിന് കാരണമെന്നും ലീലാവതി ഹോസ്പിറ്റല് ആന്ഡ് റിസര്ച്ച് സെന്ററിലെ മെഡിക്കല് ഓങ്കോളജിസ്റ്റ് ഡോ. മോഹന് മേനോന് പറഞ്ഞു. '2023 മധ്യത്തില് ഗ്രാമിന് 2,700 രൂപയ്ക്ക് വ്യാപാരം നടന്നിരുന്ന പ്ലാറ്റിനം ഇപ്പോള് ഗ്രാമിന് 7,800 രൂപയില് കൂടുതലായി ഉയര്ന്നു,'' അദ്ദേഹം പറഞ്ഞു.
രാജ്യത്തെ ഒരു മെഡിക്കല് സ്റ്റോറിലും നിലവില് ഈ മരുന്നുകള് ഇല്ല. മിക്ക സ്റ്റോറ്റുകളിലും മൊത്തക്കച്ചവടക്കാരുടെയും കൈവശം അവ തീര്ന്നിരിക്കുന്നു. യുദ്ധത്തിന്റെ തുടക്കം മുതല് അസംസ്കൃത വസ്തുക്കളുടെ വില വര്ധനവ് പല മെഡിക്കല് ഉല്പ്പന്നങ്ങളുടെയും, പ്രത്യേകിച്ച് പെട്രോകെമിക്കലുകള് അടിസ്ഥാനമാക്കിയുള്ളവയുടെ വില വര്ധിപ്പിച്ചിട്ടുണ്ടെങ്കിലും, ഈ രണ്ട് മരുന്നുകള് ഉത്പാദിപ്പിക്കുന്ന കമ്പനികള് അത് ചെയ്തിട്ടില്ല.
രാജ്യത്തെ എല്ലാ അവശ്യ മരുന്നുകളുടെയും വില നിയന്ത്രിക്കുന്ന മരുന്ന് വില നിയന്ത്രണ ഉത്തരവിന് കീഴിലാണ് ഈ മരുന്നുകള് വരുന്നത്. ഡിപിസിഒയ്ക്ക് കീഴിലുള്ള ഏതൊരു മരുന്നിനും ഓരോ വര്ഷവും മൊത്തവിലയിലെ ശരാശരി വര്ധനവിന് അനുസൃതമായി മാത്രമേ വില വര്ധിപ്പിക്കാന് കഴിയൂ.
ലോകത്തിലെ ഏറ്റവും വലിയ വിതരണക്കാരായ ദക്ഷിണാഫ്രിക്കയിലെ കമ്മിയും ഓട്ടോമോട്ടീവ് മേഖലയിലും ഗ്രീന് ഹൈഡ്രജന് ഉല്പാദനത്തിലും ലോഹത്തിന്റെ വര്ധിച്ചുവരുന്ന ഉപയോഗവും കാരണം പ്ലാറ്റിനത്തിന്റെ വില വര്ധിച്ചുകൊണ്ടിരിക്കുമ്പോള്, നിലവിലെ പശ്ചിമേഷ്യന് പ്രതിസന്ധിയും മരുന്ന ക്ഷാമത്തിന് ഉത്തേജകമാകുന്നു. ഇന്ത്യയുടെ ഏറ്റവും വലിയ പ്ലാറ്റിനം വിതരണക്കാരാണ് യു എ ഇ. മൊത്തം ഇറക്കുമതിയുടെ പകുതിയോളം ഇവിടെ നിന്നാണ്.
Click it and Unblock the Notifications
Sign in with Google