മണിപ്പൂര് സംഘര്ഷം; ക്രിസ്ത്യന് വിഭാഗത്തിന് ഐക്യദാര്ഢ്യമര്പ്പിച്ച് ആന്ധ്ര ക്രിസ്ത്യന് സഭകള്
വിശാഖപട്ടണം: മണിപ്പൂരിലെ സംഘര്ഷത്തിന്റെ പശ്ചാത്തലത്തില് ക്രിസ്ത്യന് വിഭാഗത്തിന് ഐക്യദാര്ഢ്യം അര്പ്പിച്ച് ആന്ധ്രപ്രദേശിലെ ക്രിസ്ത്യന് സഭകള്. വിജയവാഡയിലെ സഭാമൂര്ത്തി റോഡില് സഭാ അധ്യക്ഷന്മാരും, മറ്റ് മത നേതാക്കളും ഐക്യദാര്ഢ്യ റാലിയുമായി രംഗത്തിറങ്ങി.
എപി ഫെഡറേഷന് ഓഫ് ചര്ച്ചസ് ആണ് ഈ ക്യാമ്പയിന് തുടക്കമിട്ടത്. മണിപ്പൂരില് ക്രിസ്ത്യാനികള് ആക്രമിക്കപ്പെടുകയാണ്. അവരെ സര്ക്കാര് സംരക്ഷിക്കണം. അല്ലാതെ അവരോട് വിവേചനം കാണിക്കുകയല്ല വേണ്ടതെന്നും വിജയവാഡ കത്തോലിക്കാ സഭാധ്യക്ഷന് ഫാ. മുവ്വല പ്രസാദ് പറഞ്ഞു.
മണിപ്പൂരില് ആക്രമിക്കപ്പെടുന്ന ക്രിസ്ത്യാനികള്ക്ക് സര്ക്കാര് സുരക്ഷ ഒരുക്കണമെന്ന് മരനാഥ സമാജം ചെയര്മാന് റെവ. അലൂരി വിശ്വ പ്രസാദ് കുറിച്ചു. സെന്റ് ലൂഥറന്സ് പള്ളി വികാരി റെവ. ആനന്ദ റാവു, മാമോദീസ മിഷന് ജനറല് സെക്രട്ടറി റെവി. ബി ഫിലോമിന്, അടക്കമുള്ളവര് ഈ റാലിയില് പങ്കെടുത്തു.
സെന്റ് ലുഥറന്സ് പള്ളിയില് നിന്നാണ് റാലി ആരംഭിച്ചത്. ധര്ണ ചൗക്കിലാണ് റാലി അവസാനിച്ചത്. പ്രത്യേക പ്രാര്ത്ഥനയും സംഭവത്തില് വിവിധ പള്ളികളില് നടത്തി.
കഴിഞ്ഞ ദിവസം മണിപ്പൂരില് വീണ്ടും സംഘര്ഷമുണ്ടായിരുന്നു. മെയ്തെയ് കടയുടമകളുടെ കടകള് കഴിഞ്ഞ ദിവസം അക്രമികള് നിര്ബന്ധിച്ച് അടപ്പിച്ചിരുന്നു. ഇംഫാലിലെ ചെക്കോന് മേഖലയിലായിരുന്നു ഈ സംഭവം. ഇതേ തുടര്ന്നാണ് സംഘര്ഷം ഉടലെടുത്തത്. സുരക്ഷാ സേനയും അക്രമികളും തമ്മിലായിരുന്നു സംഘര്ഷം.
അക്രമികള് വീടുകള്ക്ക് അടക്കം തീവെച്ചു. കണ്ണീര് വാതകം പ്രയോഗിച്ചാണ് ജനക്കൂട്ടത്തെ സുരക്ഷാ സേന തുരത്തിയത്. അറസ്റ്റിലായ എംഎല്എയാണ് അക്രമത്തിന് പിന്നിലെന്ന് മുഖ്യമന്ത്രി ബിരേന് സിംഗ് ആരോപിച്ചു. കഴിഞ്ഞ പത്ത് ദിവസത്തിനിടെ സാഹചര്യം ഒരുപാട് മെച്ചപ്പെട്ടിട്ടുണ്ടെന്നും ബിരേന് സിംഗ് പറഞ്ഞു.
Click it and Unblock the Notifications
Sign in with Google