അധികാരത്തിലെത്തിയാല് ബംഗ്ളാദേശികളെ തുരത്തും;മോദി
സെറാംപൂര്: അധികാരത്തിലെത്തിയാല് രാജ്യത്ത് അനധികൃതമായി താമസിയ്ക്കുന്ന ബംഗ്ലാദേശികളെ നാടുകടത്തുമെന്ന് നരേന്ദ്രമോദി. വോട്ടിന് വേണ്ടിയാണ് ചുവന്ന പരവതാനി വിരിച്ച് രാഷ്ട്രീയക്കാര് ബംഗ്ലാദേശികളെ വരവേല്ക്കുന്നതെന്നും മോദി പഞ്ചിമ ബംഗാളിലെ സെറാംപൂരില് തിരഞ്ഞെടുപ്പ് റാലിയില് പങ്കെടുത്ത് സംസാരിയ്ക്കവെ പറഞ്ഞു.
നിങ്ങള് ഇത് കുറിച്ചിട്ടോളൂ. മെയ് 16 ന് ശേഷം ബംഗ്ലാദേശികള് നാട്ടിലേക്ക് പോകാന് ബാഗ് തയ്യാറാക്കി വയ്ക്കുന്നാതാവും ഉചിതം. ഇങ്ങനെ പോകുന്നു മോദിയുടെ വാക്കുകള്, ബംഗ്ലാദേശുമായി അതിര്ത്തി പങ്കിടുന്ന പ്രദേശമാണ് സെറാംപൂര്. അതിനാല് തന്നെ ബംഗ്ലാദേശികളുടെ കുടിയേറ്റം മൂലം ഏറെ കഷ്ടപ്പാടുകള് അനുഭവിയ്ക്കുന്നവരാണ് ഇവിടത്തെ ജനങ്ങള്.
ബംഗ്ലാദേശികളെ സംസ്ഥാനത്തേയ്ക്ക് സ്വീകരിയ്ക്കുന്നത് തൃണമൂല് കോണ്ഗ്രസാണ്. വോട്ട് ബാങ്ക് രാഷ്ട്രീയം മാത്രം ലക്ഷ്യമിട്ടാണ് അനധികൃത കുടിയേറ്റക്കാര്ക്ക് വേണ്ടി ചുവന്ന പരവതാനി വിരിയ്ക്കുന്നത്. ഒഡീഷയില് നിന്നോ ബീഹാറില് നിന്നോ ഉള്ളവരെ കുടിയേറ്റക്കാരായി കാണുന്നവര്ക്ക് ബംഗ്ലാദേശികളെ കണ്ടാല് മുഖം തിളങ്ങും.
വോട്ട് ബാങ്ക് രാഷ്ട്രീയത്തിനായി രാജ്യത്തെ നശിപ്പിയ്ക്കാനനുവദിയ്ക്കില്ലെന്നും മോദി പറഞ്ഞു. ബംഗ്ലാദേശികളെ നാടുകടത്തുക ബിജെപിയുടെ മുഖ്യ അജണ്ടയിലൊന്നാണ്. ബംഗ്ലാദേശികളെ അനധികൃത കുടിയേറ്റക്കാരായി പ്രഖ്യാപിയ്ക്കണമെന്ന് രാജ്നാഥ് സിംഗ് നേരത്തെ ആവശ്യപ്പെട്ടിരുന്നു.
1971 ലെ ബംഗ്ലാദേശ് യുദ്ധത്തിന് ശേഷമാണ് ഇന്ത്യയിലേക്ക് ബംഗ്ലാദേശികള് അനധികൃതമായി കുടിയേറാന് തുടങ്ങിയത്. രണ്ട് കോടിയോളം ബംഗ്ലാദേശികള് ഇന്ത്യയില് ഉണ്ടെന്നാണ് റിപ്പോര്ട്ട്. ഇവരില് അധികവും മുസ്ലീം സമുദായത്തിലുള്ളവരാണ്.