• search
  • Live TV
കാര്യങ്ങൾ അതിവേഗം അറിയാൻ
നോട്ടിഫിക്കേഷൻ അനുവദിക്കൂ  
For Daily Alerts

കൊറോണ: പ്രതിസന്ധി മറികടക്കാന്‍ കേരളത്തില്‍ സാലറി ചലഞ്ച്, രാജ്യത്ത് 30 മരണം, ആഗോളമരണം 35000ലേക്ക്

തിരുവനന്തപുരം: കൊറോണ വൈറസിനെ പ്രതിരോധിക്കുന്നതിന് ആവശ്യമായി സര്‍ക്കാര്‍ ജീവനക്കാര്‍ ഒരു മാസത്തെ ശമ്പളം ദുരിതാശ്വാസ നിധിയിലേക്ക് നല്‍കണമെന്ന് മുഖ്യമന്ത്രി പിണറായി വിജയന്‍ നിര്‍ദ്ദേശിച്ചു. കൊറോണ പടര്‍ന്നുപിടിച്ചതോടെ ഗുരുതരമായ സാമ്പത്തിക പ്രതിസന്ധിയിലൂടെയാണ് സംസ്ഥാനം കടന്നുപോകുന്നത്. ഈ അവസരത്തില്‍ സര്‍ക്കാര്‍ ജീവനക്കാര്‍ ഒരു മാസത്തെ ശമ്പളം ദുരിതാശ്വാസനിധിയിലേക്ക് സംഭാവന ചെയ്യണമെന്നാണ് മുഖ്യമന്ത്രി നിര്‍ദ്ദേശിച്ചിരിക്കുന്നത്. ഇതിനിടെ മുതിര്‍ന്ന ബിജെപി നേതാവും എംഎല്‍എയുമായ ഒ രാജഗോപാല്‍ ഒരു മാസത്തെ ശമ്പളം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്യുമെന്ന് സ്പീക്കറെ അറിയിച്ചു.

കേരളത്തില്‍ റിമാന്‍ഡ് പ്രതികള്‍ക്കും വിചാരണ തടവുകാര്‍ക്കും ഇടക്കാല ജാമ്യം അനുവദിച്ചിട്ടുണ്ട്.ഏപ്രില്‍ 30 വരെയാണ് ഹൈക്കോടതി ഇടക്കാല ജാമ്യം അനുവദിച്ചിരിക്കുന്നത്.7 വര്‍ഷത്തില്‍ താഴെ ശിക്ഷ ലഭിക്കാവുന്നവര്‍ക്കാണ് ജാമ്യം നല്‍കുക. ആര്‍ക്കെല്ലാം ജാമ്യം നല്‍കണം എന്ന് ജയില്‍ സൂപ്രണ്ടുമാര്‍ക്ക് തീരുമാനിക്കാം, സ്ഥിരം കുറ്റവാളികള്‍ക്ക് ജാമ്യം നല്‍കില്ല. ജാമ്യം ലഭിക്കുന്നവര്‍ താമസിക്കുന്ന സ്ഥലത്തെ പോലീസ് സ്റ്റേഷനില്‍ റിപ്പോര്‍ട്ട് ചെയ്യണം.

അതേസമയം, കേരളത്തില്‍ 20 പേര്‍ക്ക് കൂടി ഇന്നലെ കൊറോണ സ്ഥിരീകരിച്ചു. കണ്ണൂര്‍ ജില്ലയില്‍ നിന്ന് 8 പേര്‍ക്കും കാസറഗോഡ് ജില്ലയില്‍ നിന്ന് 7 പേര്‍ക്കും തിരുവനന്തപുരം, എറണാകുളം, തൃശൂര്‍, പാലക്കാട്, മലപ്പുറം ജില്ലകളില്‍ നിന്നും ഓരോരുത്തര്‍ക്കും ആണ് രോഗം സ്ഥിരികരിച്ചത്. ഇതില്‍ 18 പേര്‍ വിദേശത്തുനിന്നും എത്തിയവരാണ്. 2 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. തിരുവനന്തപുരം ജില്ലയില്‍ രോഗം സ്ഥിരീകരിച്ചയാള്‍ തിരുവനന്തപുരം മെഡിക്കല്‍ കോളേജില്‍ ഐസൊലേഷന്‍ ഐ.സി.യു.വില്‍ ചികിത്സയിലാണ്. എറണാകുളം ജില്ലയിലെ ഒരു ആരോഗ്യ പ്രവര്‍ത്തകന് രോഗം സ്ഥിരീകരിച്ചു.

പത്തനംതിട്ട ജില്ലയിലെ ചികിത്സയിലായിരുന്ന 4 പേരുടെ പരിശോധനാഫലം നെഗറ്റീവ് ആയിട്ടുണ്ട്. കേരളത്തില്‍ 202 പേര്‍ക്കാണ് ഇതുവരെ രോഗബാധ സ്ഥിരീകരിച്ചത്. നിലവില്‍ 181 പേരാണ് സംസ്ഥാനത്തെ വിവിധ ആശുപത്രികളില്‍ ചികിത്സയിലുള്ളത്. 201 ലോക രാജ്യങ്ങളില്‍ കോവിഡ് 19 പടര്‍ന്നു പിടിച്ച സാഹചര്യത്തിലും കേരളത്തില്‍ രോഗം സ്ഥിരീകരിച്ച സാഹചര്യത്തിലും സംസ്ഥാനത്തെ വിവിധ ജില്ലകളിലായി 1,41,211 പേര്‍ നിരീക്ഷണത്തിലാണ്. ഇവരില്‍ 1,40,618 പേര്‍ വീടുകളിലും 593 പേര്‍ ആശുപത്രികളിലും നിരീക്ഷണത്തിലാണ്. രോഗലക്ഷണങ്ങള്‍ ഉള്ള 6690 വ്യക്തികളുടെ സാമ്പിള്‍ പരിശോധനയ്ക്ക് അയച്ചിട്ടുണ്ട്. ഇതില്‍ ലഭ്യമായ 5518 സാമ്പിളുകളുടെ പരിശോധനാ ഫലം നെഗറ്റിവ് ആണ്. ഇതിനിടെ ഇറ്റലിയില്‍ നിന്ന് രോഗബാധയുമായി എത്തിയ കുടുംബം ആശുപത്രി വിട്ടു. റാന്നി സ്വദേശികളായ അഞ്ച് പേരുടെ കൊവിഡ് പരിശോധനാഫലം നെഗറ്റീവ്. ആരോഗ്യ പ്രവര്‍ത്തകര്‍ക്ക് നന്ദി രേഖപ്പെടുത്തിയാണ് ഇവര്‍ ആശുപത്രിയില്‍ നിന്ന് മടങ്ങിയത്.

അതേസമയം, രാജ്യത്ത് കൊറോണ ബാധിച്ചവരുടെ എണ്ണം 1071ആയി. ഇതുവരെ 30 പേരാണ് രാജ്യത്ത് മരിച്ചത്. ഇതില്‍ ഏറ്റവും കൂടുതല്‍ പേര്‍ക്ക് രോഗം സ്ഥിരീകരിച്ചത് മഹാരാഷ്ട്രയിലാണ്. 215 പേര്‍. 25 പേര്‍ ഇവിടെ രോഗമുക്തി നേടിയപ്പോള്‍ 9 പേര്‍ മരണപ്പെട്ടു. രണ്ടാമതായി ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്തിരിക്കുന്നത് കേരളത്തിലാണ്. 202 പേര്‍. സംസ്ഥാനത്ത് നിന്ന് 20 പേര്‍ക്കാണ് രോഗമുക്തി നേടിയിട്ടുള്ളത്. രാജ്യത്ത് ഏറ്റവും കൂടുതല്‍ മരണം റിപ്പോര്‍ട്ട് ചെയ്തിരിക്കുന്നത് മഹാരാഷ്ട്രയിലാണ്. ഗുജറാത്തില്‍ 6 പേരാണ് ഇതുവരെ മരിച്ചിട്ടുള്ളത്. മഹാരാഷ്ട്രയിലെ സാംഗ്ലിയില്‍ ഒരു കുടുംബത്തിലെ 25 പേര്‍ക്ക് കൊറോണ വൈറസ് സ്ഥിരീകരിച്ചതായി റിപ്പോര്‍ട്ട്. കുടുംബത്തിലെ എല്ലാവരും വീട്ടില്‍ തിങ്ങിപ്പാര്‍ത്തതിനെ തുടര്‍ന്നാണ് എല്ലാവര്‍ക്കും വൈറസ് ബാധയേറ്റതെന്ന് ആരോഗ്യപ്രവര്‍ത്തകര്‍ ചൂണ്ടിക്കാണിക്കുന്നു.

ഇന്ത്യയില്‍ കൊറോണയെ നേരിടാന്‍ സുരക്ഷാ മാര്‍ഗങ്ങള്‍ വളരെ കുറവാണെന്ന് റിപ്പോര്‍ട്ട്. ഇന്ത്യക്ക് ആവശ്യത്തിലും കുറവ് സുരക്ഷാ മാസ്‌കുകളാണ് ഇപ്പോള്‍ കൈവശമുള്ളത്. പലരിലേക്കും രോഗം പടര്‍ന്ന് പിടിക്കാന്‍ ഇത് കാരണമാവും. ലോക്ഡൗണ്‍ ഈ അവസരത്തില്‍ ഇന്ത്യ കൃത്യമായി നടപ്പാക്കിയില്ലെങ്കില്‍ കൊറോണ വ്യാപനം ശക്തമാകാനും സാധ്യത കൂടുതലാണ്. കാരണം അതിനെ തടയാന്‍ ആവശ്യമായ മാസ്‌കുകള്‍ ഇല്ല എന്നത് തന്നെ. ഇന്ത്യ 38 മില്യണ്‍ മാസ്‌കുകളാണ് ഇപ്പോള്‍ ആവശ്യമായിട്ടുള്ളത്. എന്നാല്‍ ഇന്ത്യയുടെ കൈവശമുള്ളത് വെറും 6.2 മില്യണ്‍ മാസ്‌കുകളാണ്. ഇതില്‍ നിന്ന് തന്നെ നമ്മള്‍ നേരിടുന്ന പ്രതിസന്ധി വ്യക്തമാകുന്നുണ്ട്.

അതേസമയം, ആഗോളതലത്തില്‍ മരിച്ചവരുടെ എണ്ണം 34804 ആയി. 735015 പേര്‍ക്കാണ് രോഗം സ്ഥിരീകരിച്ചത്. 156122 പേര്‍ രോഗം ഭേദമായി ആശുപത്രിവിട്ടു. അമേരിക്കയില്‍ രോഗം ബാധിച്ചവരുടെ എണ്ണം 142746 ആയി. 2489 പേരാണ് അമേരിക്കയില്‍ മരിച്ചത്. ഇറ്റലിയില്‍ മരിച്ചവരുടെ എണ്ണം 10779 ആയി. 97689 പേര്‍ക്കാണ് രോഗം സ്ഥിരീകരിച്ചത്. സ്‌പെയിനില്‍ 85195 പേര്‍ക്ക് രോഗം സ്ഥിരീകരിച്ചപ്പോള്‍ 7340 പേര്‍ ആകെ മരിച്ചു. 24 മണിക്കൂറിനുള്ളില്‍ 812 പേരാണ് സ്‌പെയിനില്‍ മരിച്ചുവീണത്. ഇറാനില്‍ 41495 പേര്‍ക്ക് രോഗം സ്ഥിരീകരിച്ചപ്പോള്‍ 2757 പേര്‍ മരിച്ചുവീണു. ചൈനയില്‍ ഇപ്പോള്‍ സ്ഥിതിഗതികള്‍ ശാന്തമായി തുടരുകയാണെങ്കിലും വിദേശത്ത് നിന്നെത്തുന്നവര്‍ക്ക് രോഗം സ്ഥിരീകരിക്കുന്നുണ്ട്. ഇതുവരെ 3034 പേരാണ് ചൈനയില്‍ മരിച്ചത്.

English summary
Coronavirus: Latest updates on Kerala, India and the World
വാർത്തകൾ അതിവേഗം അറിയൂ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X
X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more
X