ഡിജിപിയുടെ പേരില് തട്ടിപ്പ്: അധ്യാപികയില് നിന്നും കവര്ന്നത് 14 ലക്ഷം, നൈജീരിയന് സംഘം അറസ്റ്റില്
ദില്ലി: ഡി ജി പിയുടെ പേരില് വ്യാജ വാട്സ്ആപ് സന്ദേശമയച്ച് അധ്യാപികയുടെ പക്കല് നിന്നും 14 ലക്ഷം രുപ തട്ടിയെടുത്ത സംഭവത്തില് പ്രതി അറസ്റ്റില്. നൈജീരിയന് പൗരനായ റൊമാനസ് ക്ലീബൂസാണ് ദില്ലിയിലെ ഉത്തം നഗറില് പിടിയിലായത്. തിരുവനന്തപുരം സിറ്റി സൈബര് ക്രൈം പോലീസാണ് അറസ്റ്റു ചെയ്തത്.
കൊല്ലം കുണ്ടറ സ്വദേശിനിയായ അധ്യാപികയില് നിന്നാണ് ഓണ്ലൈന് ലോട്ടറിയുടെ പേരില് പണം തട്ടിയെടുത്തത്. ഓണ്ലൈന് ലോട്ടറിയെടുക്കുന്ന പതിവുള്ള അധ്യാപികയ്ക്ക് ഡി ജി പി അനില്കാന്തിന്റെ പേരില് സന്ദേശമയച്ച റൊമാനസ്, ലോട്ടറി അടിച്ചെന്നും നികുതിയിനത്തില് 14 ലക്ഷം അടയ്ക്കണമെന്നും ആവശ്യപ്പെട്ടു. താന് ഡല്ഹിയില് നിന്ന് മടങ്ങിയെത്തും മുന്പ് അടയ്ക്കണമെന്നാണ് സന്ദേശത്തില് നിര്ദേശിച്ചത്. അതുപ്രകാരം പോലീസ് ആസ്ഥാനത്തേക്ക് വിളിച്ച അധ്യാപികയ്ക്ക് ഡി.ജി.പി ഡല്ഹിയിലാണെന്ന മറുപടിയാണ് ലഭിച്ചത്.
ഇതോടെ സന്ദേശം യഥാര്ത്ഥമാണെന്ന് കരുതി സന്ദേശത്തില് പറഞ്ഞ അക്കൗണ്ടിലേക്ക് പണം അയക്കുകയായിരുന്നു. കളബിപ്പിക്കപ്പെട്ടുവെന്ന് മനസ്സിലാക്കിയതോടെയാണ് അധ്യാപിക പരാതി നല്കിയത്. പ്രതിയെ ദില്ലിയിലെ കോടതിയില് ഹാജരാക്കി. ബുധനാഴ്ച ഈ സംഘവുമായി പൊലീസ് കേരളത്തിലേക്ക് തിരിക്കും.
അപരിചിതരില് നിന്നുള്ള വീഡിയോ കാളുകള്സ്വീകരിക്കുമ്പോള് സൂക്ഷിക്കുക; പൊലീസിന്റെ മുന്നറിയിപ്പ്
തിരുവനന്തപുരം: വാട്സ് ആപ്, മെസഞ്ചര് തുടങ്ങിയവയിലെ വീഡിയോ കാളിലൂടെ കെണിയൊരുക്കി തട്ടിപ്പ് നടത്തുന്ന സംഭവങ്ങള് ഏറിവരുകയാണെന്ന് കേരള പൊലീസിന്റെ മുന്നറിയിപ്പ്. മൊബൈല് ഫോണിലേക്ക് വരുന്ന വീഡിയോ കാള് അറ്റന്ഡ് ചെയ്താല് മറുവശത്തു അശ്ളീല വീഡിയോ പ്രത്യക്ഷപ്പെടുകയും, വിന്ഡോ സ്ക്രീനില് ഫോണ് അറ്റന്ഡ് ചെയ്യുന്ന ആളുടെ മുഖം ഉള്പ്പെടെ റെക്കോര്ഡ് ചെയ്തെടുത്തതിന് ശേഷം പണം ആവശ്യപ്പെടും. നമ്മുടെ സുഹൃത്തുക്കള്ക്കും ബന്ധുക്കള്ക്കും ഈ വീഡിയോ അയച്ചു കൊടുക്കുമെന്ന് ഭീഷണിപ്പെടുത്തിയാകും പണം ആവശ്യപ്പെടുക.
വീഡിയോ സാമൂഹിക മാധ്യമങ്ങളിലും യു ട്യൂബിലും ഇടുമെന്നും അല്ലെങ്കില് പണം വേണമെന്നുമാകും ആവശ്യം. ചിലര് മാനഹാനി ഭയന്ന് പണം അയച്ചു നല്കിയെങ്കിലും ഇത്തരം തട്ടിപ്പു സംഘങ്ങള് കൂടുതല് പണം ആവശ്യപ്പെട്ടുകൊണ്ട് വീണ്ടും ഭീഷണിപ്പെടുത്തുകയായിരുന്നുവെന്ന പരാതിയും ലഭിച്ചിട്ടുണ്ട്.
Recommended Video
ലിങ്ക് സാമൂഹിക മാധ്യമം വഴി സുഹൃത്തുക്കള്ക്ക് അയക്കുമെന്ന് ഭീഷണി മുഴക്കുന്നതോടെ, ഭൂരിഭാഗം പേരും തട്ടിപ്പുകാര്ക്ക് വഴങ്ങും. ഫേസ്ബുക് പോലുള്ള സമൂഹ മാധ്യമങ്ങളിലൂടെ നമ്മുടെ പൂര്ണ വിവരങ്ങള് നേരത്തെ തന്നെ ഇവര് കൈവശപ്പെടുത്തിയിട്ടുണ്ടാകും. അതിനാല് ഇവരെ ബ്ലോക്ക് ചെയ്തത് കൊണ്ടോ, നമ്മുടെ അക്കൗണ്ട് ഡി ആക്ടിവേറ്റ് ചെയ്തത് കൊണ്ടോ ഫലം ഇല്ലെന്നര്ത്ഥം. സൂക്ഷിക്കുക.. അപരിചിതരുടെ വീഡിയോ കാളുകള് സ്വീകരിക്കുമ്പോള് ഇത്തരം കെണിയെക്കുറിച്ചുകൂടി ഓര്ക്കുക...