എട്ടുപേരെയും വെടിവെച്ചു കൊല്ലൂ; മധ്യപ്രദേശ് പോലീസിന്റെ ശബ്ദരേഖ പുറത്ത്

പോലീസ് കണ്‍ട്രോള്‍ റൂമില്‍നിന്നാണ് ഈ ശബ്ദരേഖ ചോര്‍ന്നതാണെന്നാണ് സംശയിക്കപ്പെടുന്നത്.

By Anwar Sadath

Updated: Friday, November 4, 2016, 9:38 [IST]

ഭോപ്പാല്‍: ഭോപ്പാല്‍ സെന്‍ട്രല്‍ ജയിലില്‍ നിന്നു ചാടിയ എട്ട് സിമി പ്രവര്‍ത്തകരെയും വെടിവെച്ചു കൊല്ലാന്‍ ഉന്നത ഉദ്യോഗസ്ഥന്‍ ആവശ്യപ്പെടുന്ന ശബ്ദരേഖ പുറത്ത്. തടവുകാരെ എട്ടുപേരെയും വെടിവച്ചുകൊല്ലാനാണ് ഉദ്യോഗസ്ഥന്‍ ഉത്തരവിടുന്നത്. പോലീസ് കണ്‍ട്രോള്‍ റൂമില്‍നിന്നാണ് ഈ ശബ്ദരേഖ ചോര്‍ന്നതാണെന്നാണ് സംശയിക്കപ്പെടുന്നത്.

ഇതോടെ തീവ്രവാദികളെ ഏറ്റുമുട്ടലില്‍ കൊല്ലപ്പെട്ടതാണെന്ന പോലീസ് വാദം വീണ്ടും പൊളിയുകയാണ്. തീവ്രവാദികള്‍ പോലീസിനെ വെടിവെച്ചതിനെ തുടര്‍ന്നാണ് അവരെ കൊലപ്പെടുത്തിയതെന്നായിരുന്നു ഭോപ്പാല്‍ പോലീസ് ഇതുവരെ പറഞ്ഞുകൊണ്ടിരുന്നത്. ഇത് തെറ്റാണെന്ന് തെളിയിക്കുന്ന വീഡിയോ നേരത്തെ പുറത്തുവന്നിരുന്നു.

കൊല്ലാനുള്ള ഉത്തരവിനുശേഷം എല്ലാവരെയും കൊന്നതായും ഗെയിം അവസാനിച്ചതായും പോലീസുകാരന്‍ മറുപടി നല്‍കുന്നുണ്ട്. 'സാര്‍ എല്ലാവരും കൊല്ലപ്പെട്ടു' എന്നു പറയുമ്പോള്‍ വെരി ഗുഡ്, വെരി ഗുഡ്, ഞങ്ങള്‍ അവിടേക്ക് ഇപ്പോള്‍ എത്തുമെന്നായിരുന്ന മേലധികാരിയുടെ പ്രതികരണം.

ഭോപ്പാല്‍ സെന്‍ട്രല്‍ ജയിലില്‍ നിന്നും രക്ഷപ്പെട്ട എട്ട് സിമി പ്രവര്‍ത്തകരെ പോലീസ് മണിക്കൂറുകള്‍ക്കകം വെടിവെച്ചു കൊന്നിരുന്നു. ജയില്‍ വാര്‍ഡനെ കൊലപ്പെടുത്തിയതിനെ തുടര്‍ന്നാണ് തീവ്രവാദികളെ വകവരുത്താന്‍ പോലീസ് നിര്‍ദ്ദേശിച്ചതെന്നാണ് റിപ്പോര്‍ട്ട്.