വാട്‌സ് ആപിലൂടെ റെയില്‍വേക്ക് അശ്ലീല വീഡിയോയും ചിത്രങ്ങളും

ഭോപാല്‍: യാത്രക്കാരായ ജനങ്ങള്‍ക്ക് കൂടുതല്‍ സൗകര്യങ്ങള്‍ ഏര്‍പ്പെടുത്തുന്നതിന്റെ ഭാഗമായി റെയില്‍വേ ലോഞ്ച് ചെയ്ത വാട്‌സ് ആപ് പദ്ധതി പുലിവാലായി. ഭോപാല്‍ റെയില്‍വെ ഡിവിഷനാണ് സാങ്കേതികവിദ്യ ജനങ്ങള്‍ക്ക്് പ്രയോജനകരമാകുന്ന വിധത്തില്‍ ഉപയോഗിച്ചത്. എന്നാല്‍ വെളുക്കാന്‍ തേച്ചത് പാണ്ടായി എന്നതുപോലെയാണ് ഇപ്പോള്‍ റെയില്‍വേയുടെ അവസ്ഥ.

വാട്‌സ് ആപ് പരിപാടി ആവഷ്‌കരിച്ച് വെറും നാലു ദിവസത്തിനുള്ളില്‍ എത്തിയത് 3700 സന്ദേശങ്ങളായിരുന്നു. പക്ഷേ, ഭൂരിഭാഗം സന്ദേശങ്ങളും അശ്ലീല ചുവയോടുകൂടിയതാണെന്നുമാത്രം. പോണ്‍ ക്ലിപ്പിംഗുകള്‍, അശ്ലീല തമാശകള്‍, ചിത്രങ്ങള്‍ എല്ലാം റെയില്‍വേയുടെ വാട്‌സ് ആപിലേക്ക് ഒഴുകിക്കൊണ്ടിരിക്കുകയാണ്. എന്നാല്‍, ഗൗരവമായ പരാതികളും ഇക്കൂട്ടത്തിലുണ്ട്.

ഐ മിസ് യു, ഐ ലവ് യു സന്ദേശങ്ങള്‍ക്കും കുറവൊന്നുമില്ലെന്ന് റെയില്‍വേ ഉദ്യോഗസ്ഥന്‍ പറഞ്ഞു. പരാതികള്‍ വേര്‍തിരിക്കാന്‍ വനിതാ ജീവനക്കാരിയെ വയ്ക്കാത്തത് ഏറെ നന്നായെന്നും അദ്ദേഹം പറഞ്ഞു. യാത്രക്കാര്‍ക്ക് സൗകര്യമൊരുക്കുന്നതിനും, പരാതികള്‍ പറയുന്നതിനും, അഭിപ്രായം അറിയിക്കുന്നതിനുമൊക്കെയായി ഏര്‍പ്പെടുത്തിയ സംവിധാനം ഇത്തരത്തില്‍ ദുരുപയോഗം ചെയ്യപ്പെട്ടതില്‍ റെയില്‍വേ ഉദ്യോഗസ്ഥര്‍ക്ക് അമര്‍ഷമുണ്ട്.

ഇത്തരത്തില്‍ തുടര്‍ന്നും മെസേജുകള്‍ അയക്കുന്നവര്‍ക്കെതിരെ ശക്തമായ നടപടിയെടുക്കാനാണ് റെയില്‍വേയുടെ തീരുമാനം. അശ്ലീല സന്ദേശങ്ങള്‍ കമ്പ്യൂര്‍വഴി സോര്‍ട്ട് ചെയ്ത് ഒഴിവാക്കാനും തീരുമാനിച്ചിട്ടുണ്ട്. മെസേജുകളും ഫോണ്‍ നമ്പരുകളും പോലീസിന് നല്‍കാന്‍ തീരുമാനിച്ചിട്ടുണ്ടെന്ന് ഡിവിഷണല്‍ റെയില്‍വേ മാനേജര്‍ രാജീവ് ചൗധരി പറഞ്ഞു. ഓഗസ്ത് 5നാണ് റെയില്‍വെ പുതുമയാര്‍ന്ന സംവിധാനം യാത്രക്കാര്‍ക്കായി ഒരുക്കിയത്. ഇതിലൂടെ എത്തുന്ന പരാതികളില്‍ ഉടനടി പരിഹാരം കാണുമെന്ന വാഗ്ദാനും റെയില്‍വെ നല്‍കിയിട്ടുണ്ട്.

English summary

Obscene clippings, messages on Railways WhatsApp