തുടക്കം 1500 രൂപയില്, ഇപ്പോഴത്തെ ആസ്തി കേട്ടാല് ഞെട്ടും..! സഹാറയും സുബ്രത റോയിയും തീര്ത്ത സാമ്രാജ്യം
കഴിഞ്ഞ ദിവസമാണ് സഹാറ ഗ്രൂപ്പ് സ്ഥാപകനും രാജ്യത്തെ ബിസിനിസ് വ്യക്തിത്വങ്ങളില് പ്രമുഖനുമായ സുബ്രത റോയ് വിടവാങ്ങിയത്. ബുധനാഴ്ച ലഖ്നൗവിലേക്ക് കൊണ്ടുപോകുന്ന സുബ്രത റോയിയുടെ മൃതദേഹം വ്യാഴാഴ്ചയാണ് സംസ്കരിക്കുക. ഒരു കാലത്ത് രാജ്യത്തെ ഏറ്റവും സക്സസ്ഫുള്ളായ ബിസിനസുകാരന് എന്ന വിശേഷണത്തിന് അര്ഹനായിരുന്ന സുബ്രത റോയി.
വെറും 1500 രൂപയില് നിന്ന് സമ്പാദിക്കാന് തുടങ്ങിയ സുബ്രത റോയി ഒടുവില് ഒന്നരലക്ഷം കോടി രൂപയുടെ ആസ്തിയുടെ ഉടമയായി മാറുകയായിരുന്നു. ഗൊരഖ്പൂരില് നിന്ന് മെക്കാനിക്കല് എഞ്ചിനീയറിംഗില് ഡിപ്ലോമ കോഴ്സ് ചെയ്യുന്നതിനിടയിലാണ് അദ്ദേഹം വരുമാനത്തെ കുറിച്ച് ആലോചിക്കാന് തുടങ്ങിയത് 1978 ല് 1500 രൂപ സമ്പാദ്യം മാത്രമുണ്ടായിരുന്ന സുബ്രത റോയി 36 വര്ഷങ്ങള്ക്ക് ശേഷം ഒന്നര ലക്ഷം കോടിയിലധികം രൂപയുടെ ബിസിനസ് സാമ്രാജ്യം കെട്ടിപ്പടുത്തു.
ധനകാര്യം, റിയല് എസ്റ്റേറ്റ്, മാധ്യമങ്ങള്, ആരോഗ്യ സംരക്ഷണം, വിനോദം, ഉപഭോക്തൃ ഉല്പ്പന്നങ്ങള്, ടൂറിസം തുടങ്ങി നിരവധി മേഖലകളില് അദ്ദേഹം നിക്ഷേപം നടത്തി. സഹാറ ഗ്രൂപ്പിന്റെ മുംബൈയിലെ ആംബി വാലി സിറ്റി, ലണ്ടനിലെ ഗ്രോസ്വെനര് ഹൗസ്, ന്യൂയോര്ക്കിലെ ന്യൂയോര്ക്ക് പ്ലാസ ഹോട്ടല് എന്നിവ അത്യാധുനിക സൗകര്യങ്ങള്ക്ക് പേരുകേട്ടതാണ്. ഒരുകാലത്ത് ഇന്ത്യയുടെ ദേശീയ ക്രിക്കറ്റ് ടീമിന്റെ സ്പോണ്സര് ആയിരുന്നു സുബ്രത റോയ്.
മുന് ഫോഴ്സ് ഇന്ത്യ ഫോര്മുല വണ് ടീമിന്റെ സഹ-ഉടമസ്ഥനായ അദ്ദേഹം ഇന്ത്യയുടെ ഹോക്കി ടീമിനെയും സ്പോണ്സര് ചെയ്തിരുന്നു. പാരാ ബാങ്കിംഗ് വഴി സഹാറ ഗ്രൂപ്പ് ധാരാളം നിക്ഷേപകരെ ചേര്ത്തു. 5,000-ത്തിലധികം സര്വീസ് ഓഫീസുകളും 12 ലക്ഷത്തിലധികം ജീവനക്കാരുമായി അവരുടെ പ്രവര്ത്തനങ്ങള് രാജ്യത്തുടനീളം വ്യാപിച്ചുകിടക്കുന്നു. റിയല് എസ്റ്റേറ്റ് കമ്പനിയും ഹൗസിംഗ് ഇന്വെസ്റ്റ്മെന്റ് കോര്പ്പറേഷനും വഴി സുബ്രത റോയ് രാജ്യത്തുടനീളം വലിയ തോതില് ഭൂമി സ്വന്തമാക്കിയിട്ടുണ്ട്.
ഇവിടങ്ങളില് പലതും പിന്നീട് വികസിപ്പിക്കുകയും നിരവധി ഭവന പദ്ധതികള് ആരംഭിക്കുകയും ചെയ്തു. ലഖ്നൗവിന് പുറമെ കാണ്പൂര്, ഗോരഖ്പൂര്, ഹൈദരാബാദ്, ഭോപ്പാല്, കൊച്ചി, ഗുഡ്ഗാവ്, പൂനെ എന്നിവിടങ്ങളിലും മറ്റ് നഗരങ്ങളിലും റെസിഡന്ഷ്യല് സ്കീമുകള് സഹാറ ആരംഭിച്ചു. അമേരിക്കന് ബില്ഡിംഗ് കമ്പനിയുമായും അവര് ബന്ധം സ്ഥാപിച്ചു. ഹിന്ദിയിലും മറ്റ് പ്രാദേശിക ഭാഷകളിലും സുബ്രത റോയ് വിനോദ ചാനലുകളും പത്രങ്ങളും ആരംഭിച്ചിരുന്നു.
മുംബൈയിലെ ഛത്രപതി ശിവാജി അന്താരാഷ്ട്ര വിമാനത്താവളത്തില് സുബ്രത റോയ് സഹാറ സ്റ്റാര് ഹോട്ടല് സ്ഥാപിച്ചു. കൂടാതെ വിദേശത്ത് ഹോട്ടലുകളും ആരംഭിച്ചു. ഒന്നര വര്ഷം മുമ്പ് അദ്ദേഹം ക്യു ഷോപ്പ് ആരംഭിച്ചു, കൂടാതെ ഒറീസ, ജാര്ഖണ്ഡ്, ഛത്തീസ്ഗഡ് എന്നിവിടങ്ങളില് വൈദ്യുതി ഉല്പാദന മേഖലയിലും നിക്ഷേപം നടത്തി. എയര് സഹാറ എന്ന പേരില് എയര്ലൈന് സര്വീസും അദ്ദേഹം ആരംഭിച്ചു.
ലഖ്നൗവില് സഹാറ കോളേജ് ഓഫ് നഴ്സിംഗ് ആന്ഡ് പാരാമെഡിക്കല് സയന്സസ് ആരംഭിച്ച റോയി ലഖ്നൗ ആസ്ഥാനമായി സഹാറ സിറ്റി, സഹാറ എസ്റ്റേറ്റ്, സഹാറ ഹോംസ് എന്നിവ നിര്മ്മിച്ചു. നഗരത്തിലെ ഗോമതി നഗര് ഏരിയയില് 350 കിടക്കകളുള്ള സഹാറ ആശുപത്രിയും നിര്മ്മിച്ചു. നഗരത്തിന്റെ കേന്ദ്രമായ ഹസ്രത്ഗഞ്ചില് സഹാറ മാളും നിര്മ്മിച്ചു. നഗരത്തില് മാള് സംസ്കാരം ആരംഭിച്ച സമയത്താണ് ഈ സൗകര്യം വന്നത്.
ഒരു കാലത്ത്, സുബ്രതാ റോയിയുടെ സുരക്ഷ മുന്നിര നേതാക്കളേക്കാള് കര്ശനമായിരുന്നു. അഖിലേഷ് യാദവ് ഉത്തര്പ്രദേശ് മുഖ്യമന്ത്രിയായിരുന്ന സമയത്ത് സുബ്രത റോയിയുടെ സുരക്ഷ മുഖ്യമന്ത്രിയേക്കാള് ശക്തമായിരുന്നു. സ്വകാര്യ സെക്യൂരിറ്റി ഗാര്ഡുകളും പൊലീസ് സേനയും റോയിയെ യാത്രയിലുടനീളം അനുഗമിച്ചു. സഹാറയുടെ വാഹനവ്യൂഹത്തില് നിരവധി വിദേശ കാറുകളും പൊലീസ് വാഹനങ്ങളും ഉള്പ്പെടുന്നു. 2004 ഫെബ്രുവരിയില്, സുബ്രതാ റോയ് തന്റെ മക്കളായ സുശാന്തോയുടേയും സീമത്തിന്റേയും വിവാഹത്തിന് ചെലവഴിച്ചത് 250 കോടി രൂപയാണ്.
Click it and Unblock the Notifications
Sign in with Google