ഗുജറാത്തില്‍ 'ഇരട്ട എഞ്ചിന്‍' ബിജെപിക്ക് കരുത്താവുമോ: സർവേ പറയുന്നത്, കേരളത്തിന്റെ എതിർപ്പ് 54 ശതമാനം

അഹമ്മാദാബാദ്: ഏറെ അഭ്യൂഹങ്ങള്‍ക്കൊടുവില്‍ ഗുജറാത്ത് നിയമസ തിരഞ്ഞെടുപ്പിനുള്ള തിയതി തിരഞ്ഞെടുപ്പ് കമ്മീഷന്‍ പ്രഖ്യാപിച്ചിരിക്കുകയാണ്. രണ്ട് ഘട്ടങ്ങളിലായി ഡിസംബർ ഒന്ന്, അഞ്ച് തിയതികളിലായിട്ടാണ് നടക്കുക. എട്ടാം തിയതിയാണ് വോട്ടെണ്ണല്‍. കൃത്യം ഒരുമാസമാണ് ഇനി തിരഞ്ഞെടുപ്പിന് ശേഷിക്കുന്നത് എന്നതിനാല്‍ തന്നെ വരും ദിവസങ്ങളില്‍ സംസ്ഥാനത്ത് പ്രചരണങ്ങള്‍ കൂടുതല്‍ ശക്തമാവും.

ഇത്തവണയും ഇരട്ട എഞ്ചിന്‍ മുദ്രാവാക്യം ഉയർത്തിയാവും ബി ജെ പി തിരഞ്ഞെടുപ്പിനെ നേരിടുകയെന്ന കാര്യം ഉറപ്പാണ്. കേന്ദ്രത്തിലേയും സംസ്ഥാനത്തേയും ബി ജെ പി ഭരണം സ്ഥാനത്ത് വന്‍ വികസന മുന്നേറ്റം കൊണ്ടുവന്നുവെന്നാണ് പാർട്ടി അവകാശപ്പെടുന്നത്.

മറ്റ് സംസ്ഥാനങ്ങളിലേയും തെരഞ്ഞെടുപ്പുകളിൽ ബി ജെ പി പലപ്പോഴും ഈ മുദ്രാവാക്യം പ്രയോഗിക്കുകയും പലയിടത്തും ഇത് വോട്ടർമാരുടെ ഭാവനയെ നല്ലരീതിയില്‍ ആകർഷിക്കുകയും ചെയ്തിട്ടുണ്ട്. ഒരേ പാർട്ടിയുടെ രണ്ട് സർക്കാരുകളും ഒരേ താളത്തിലായിരിക്കുമെന്നതിനാലും അവ തമ്മിലുള്ള മികച്ച ഏകോപനം സംസ്ഥാനത്തിന്റെ വികസനത്തിന് കാരണമാകുമെന്നതിനാലും സംസ്ഥാനത്തും ബി ജെ പി ഭരണം വേണമെന്നാണ് പാർട്ടി വോട്ടർമാരോട് ആവശ്യപ്പെടുന്നത്.

അതേസമയം, ലോക്‌നീതി-സിഎസ്‌ഡിഎസ് സർവേ ഗുജറാത്തിലെ വോട്ടർമാരുടെ മനസ്സിൽ ഇരട്ട എഞ്ചിന്‍ മുദ്രാവാക്യം എത്രത്തോളം വിശ്വസനീയമാണെന്ന് പരിശോധിക്കുന്നുണ്ട്. ഗുജറാത്തിൽ, ഇരട്ട എഞ്ചിൻ ഗവൺമെന്റിനുള്ള പിന്തുണ 2017-ൽ 16% ആയിരുന്നെങ്കില്‍ 2022-ൽ 27% ആയി വർദ്ധിച്ചവെന്നാണ് വ്യക്തമാക്കുന്നത്.

കേന്ദ്ര സർക്കാരിൽ പൂർണ അതൃപ്തിയുള്ളവർ പോലും (17%) ഇപ്പോഴും ഇരട്ട എഞ്ചിൻ സർക്കാർ എന്ന ആശയത്തെ പിന്തുണയ്ക്കുന്നു എന്നതാണ ശ്രദ്ധേയം. ബി ജെ പി അധികാരത്തിലിരിക്കുന്ന സർക്കാർ എവിടെയായിരുന്നാലും, അത് ഇരട്ട എഞ്ചിൻ സർക്കാരിന് ഗണ്യമായ പിന്തുണ നല്‍കുന്നുവെന്നും സർവ്വേ വ്യക്തമാക്കുന്നു.

ഗുജറാത്ത് (27%), അസം (41%), ഗോവ (34%), ഉത്തർപ്രദേശ് (31%), ഉത്തരാഖണ്ഡ് (33%) എന്നിവിടങ്ങളിലെ വോട്ടർമാർ ഡബിള്‍ എഞ്ചിന് അനുകൂലമായ നിലപാട് സ്വീകരിക്കുമ്പോള്‍ കേരളം (54 % ) തമിഴ്‌നാട് (40%), പശ്ചിമ ബംഗാൾ (33%) പോലെ പ്രതിപക്ഷ പാർട്ടികള്‍ ഭരണത്തിലിരിക്കുന്ന സംസ്ഥാനങ്ങള്‍ ഡബിള്‍ എഞ്ചിന്‍ സർക്കാറിന് വിരുദ്ധമായ നിലപാടാണ് സ്വീകരിക്കുന്നത്.

മിക്ക സംസ്ഥാനങ്ങളിലും, 'ഇരട്ട-എഞ്ചിൻ ഗവൺമെന്റിന്' ഉള്ള പിന്തുണയും എതിർപ്പും കേന്ദ്ര സർക്കാരുമായുള്ള സംതൃപ്തിയുടെ നിലവാരത്തിന് സമാന്തരമായി പ്രവർത്തിക്കുകയും ചെയ്യുന്നു. ഉത്തരാഖണ്ഡ് (42%), ഉത്തർപ്രദേശ് (17%) തുടങ്ങിയ സംസ്ഥാനങ്ങൾ കേന്ദ്രസർക്കാറിന്റെ കാര്യത്തില്‍ പൂർണ്ണ സംതൃപ്തി രേഖപ്പെടുത്തുന്നുവരാണ്. പഞ്ചാബ് (43%) കേരളം (32%), തമിഴ്നാട് (14%), പശ്ചിമ ബംഗാൾ തുടങ്ങിയ സംസ്ഥാനങ്ങളിലാണ് കടുത്ത അസംതൃപ്തി നിലനില്‍ക്കുന്നത്.

English summary

Will BJP run on 'double engine' in Gujarat: According to the survey Kerala's opposition is 54 percent