ബ്രസീലിന്റെ തോല്വി; പെണ്കുട്ടി ജീവനൊടുക്കി
കാഠ്മണ്ഡു: തന്റെ പ്രിയപ്പെട്ട ടീം ബ്രസീല് ലോകകപ്പില് സമാനതകളില്ലാതെ ദാരുണമായി തോറ്റതില് മനംനൊന്ത് പതിനഞ്ചുകാരിയായ പെണ്കുട്ടി ജീവനൊടുക്കി. കിഴക്കന് നേപ്പാളിലെ സുന്സാരി ജില്ലയിലെ പ്രഗ്യ ഥാപ്പ എന്ന പെണ്കുട്ടിയാണ് ദു:ഖം സഹിക്കാനാകാതെ തൂങ്ങിമരിച്ചത്. കഴിഞ്ഞ ദിവസം രാവിലെ സ്വന്തം വീടിനകത്താണ് പ്രഗ്യ ജീവനൊടുക്കിയത്.
ബ്രസീല് ഫൈനലിലെത്തുമെന്ന് പ്രഗ്യ ഉറപ്പിച്ചിരുന്നു. മറ്റു ടീമുകളുടെ ആരാധകരായ സുഹൃത്തുക്കളുമായി ഇതെക്കുറിച്ച് തര്ക്കത്തില് ഏര്പ്പെടാറുമുണ്ടായിരുന്നു പത്താം ക്ലാസുകാരിയായ പ്രഗ്യ. എന്നാല്, ജര്മന് ടീമിനോട് ദാരുണമായി പരാജയപ്പെട്ടത് പ്രഗ്യയുടെ മനോനിലയെ ബാധിച്ചു. ബ്രസീല് 7-1 ന് തോറ്റ ശേഷം പെണ്കുട്ടി ആരോടും അധികം സംസാരിച്ചിരുന്നില്ലെന്ന വീട്ടുകാര് പോലീസിനോട് പറഞ്ഞു.
ബ്രസീല് ഫൈനല് കാണാതെ പുറത്തായതിനാല് കൂട്ടുകാര് കളിയാക്കിയതും പ്രഗ്യയുടെ മനോവിഷമം ഇരട്ടിപ്പിച്ചു. കൂടാതെ മാതാവും സഹോദരിയും ജര്മനിയുടെ പക്ഷം ചേര്ന്ന് സംസാരിക്കുകകൂടി ചെയ്തതോടെ പ്രഗ്യയ്ക്ക് മനോനിയന്ത്രണം നഷ്ടപ്പെടുകയായിരുന്നു. കൂട്ടുകാരുമായി അല്പ സമയം സംസാരിച്ചശേഷം സ്വന്തം റൂമില് പഠിക്കാനിരുന്ന പ്രഗ്യയെ പിന്നീട് തൂങ്ങിയ നിലയില് കണ്ടെത്തുകയായിരുന്നു.
ജര്മനി ബ്രസീലിനോട് തോറ്റത് ബ്രസീലിയന് ആരാധകരെ കുറച്ചൊന്നുമല്ല വിഷമിപ്പിച്ചതെന്ന് തെളിയിക്കുന്നതായി സംഭവം. ബ്രസീല് തോറ്റതിനേക്കാള് തോറ്റ രീതിയാണ് ആരാധകരെ കൂടുതല് വേദനിപ്പിക്കുന്നത്. ബ്രസീലിന്റെ ഫുട്ബോള് ചരിത്രത്തിലെ തന്നെ ഏറ്റവും വലിയ തോല്വിയായിരുന്നു ചൊവ്വാഴ്ച ബലോ ഹൊറിസോണ്ടയിലെ മൈതാനത്ത് നേരിട്ടത് എന്നതാണ് വാസ്തവം.