സൗദിയെ മാത്രമല്ല വെനസ്വേലയേയും ഭയന്ന് റഷ്യ: ഇന്ത്യക്ക് കൂടുതല് ഇളവില് ക്രൂഡ് ഓയില് നല്കി
റഷ്യയുടെ ഉക്രൈന് അധിനിവേശം ആരംഭിച്ചത് മുതല് ഇന്ത്യക്ക് മുന്നില് തെളിഞ്ഞ് വന്ന സാധ്യതായിരുന്നു റഷ്യയില് നിന്നുള്ള പെട്രോളിയം ഇറക്കുമതി. പശ്ചാത്യ രാജ്യങ്ങള് റഷ്യക്കുമേല് ഉപരോധം ഏർപ്പെടുത്തിയതോടെ ഇന്ത്യക്ക് വലിയ വിലക്കിഴിവില് എണ്ണ നല്കാന് റഷ്യ തയ്യാറാവുകയായിരുന്നു. ഇതോടെ പരമ്പരാഗത ഇറക്കുമതിക്കാരായ അറബ് രാഷ്ട്രങ്ങളെ മറികടന്ന് ഇന്ത്യയിലേക്ക് ഏറ്റവും കൂടുതല് എണ്ണ ഇറക്കുമതി ചെയ്യുന്ന രാജ്യമായി റഷ്യ മാറുകയും ചെയ്തു.
ബാരലിന് 60 ഡോളറിനേക്കാൾ ഉയർന്ന നിരക്കിൽ ഈടാക്കുന്നുണ്ടെങ്കിലും, ഇന്ത്യൻ റിഫൈനർമാർക്ക് റഷ്യൻ എണ്ണ ലാഭകരമായതോതില് വാങ്ങുന്നത് തുടരുകയായിരുന്നു. എന്നാല് പതിയെ പതിയെ ഇന്ത്യക്കുള്ള വിലക്കിഴിവില് റഷ്യ കുറവ് വരുത്താന് തുടങ്ങി. ബ്രെന്റ് ക്രൂഡ് നിലവാരത്തേക്കാൾ 4 ഡോളർ മാത്രം വിലക്കുറവിലാണ് ഇന്ത്യയ്ക്ക് ഇപ്പോൾ റഷ്യന് എണ്ണ ലഭിക്കുന്നത്. അതായത്, ഇന്ത്യൻ റിഫൈനർമാർ പതിവായി ഉപയോഗിക്കുന്ന രണ്ട് ഇനങ്ങളായ സൗദി അറബ് ലൈറ്റിനേക്കാൾ എട്ട് ഡോളറും ഇറാഖി ബാരലിനേക്കാള് 6 ഡോളർ വ്യത്യാസവുമാണ് റഷ്യന് എണ്ണയ്ക്ക് ഉണ്ടായിരുന്നുള്ളു.
ഗള്ഫ് മേഖലയെ അപേക്ഷിച്ച് റഷ്യയില് നിന്നും ക്രൂഡ് ഓയില് ഇന്ത്യയിലേക്ക് എത്തിക്കാന് ഗതാഗത ചിലവ് കൂടുതലാണ്. ഈ സാഹചര്യത്തില് കൂടുതല് ഇളവ് ലഭിച്ചില്ലെങ്കില് റഷ്യയില് നിന്നും എണ്ണ ഇറക്കുമതി ചെയ്യുന്നതില് പുനഃരാലോചന നടത്തേണ്ടി വരുമെന്ന മുന്നറിയിപ്പ് ഇന്ത്യന് റിഫൈനറിമാരില് നിന്നുണ്ടായി. ഇതോടൊപ്പം തന്നെയാണ് വെനസ്വേലയില് നിന്നുള്ള എണ്ണ ഇറക്കുമതി സാധ്യതകളും ഇന്ത്യ പരിശോധിക്കുന്നത്.
എന്നാല് ഇപ്പോഴിതാ കേന്ദ്ര സർക്കാർ പുറത്തുവിട്ട ഏറ്റവും പുതിയ കണക്കുകള് പ്രകാരം റഷ്യയില് നിന്നുള്ള വിലക്കിഴിവുകള് വർധിക്കുന്നുവെന്ന റിപ്പോർട്ടുകളാണ് പുറത്ത് വരുന്നത്. സെപ്തംബറിൽ ഇന്ത്യൻ റിഫൈനറികൾക്ക് കൂടുതല് കിഴിവുകള് ലഭിച്ചുവെന്ന് റിപ്പോർട്ടുകള് പറയുന്നു. ഉയർന്ന വിലയും അറ്റകുറ്റപ്പണി മുടക്കവും കാരണം ഇന്ത്യൻ റിഫൈനർമാർ വാങ്ങലുകൾ കുറച്ചതിനാലാണ് സെപ്തംബർ മുതല് റഷ്യൻ ക്രൂഡിന് സ്പോട്ട് ഡിസ്കൗണ്ട് വർധിക്കാൻ തുടങ്ങിയത്.
ഇന്ത്യയിലെ റിഫൈനർമാർ കൂടുതലും റഷ്യൻ ഓയിൽ ഡെലിവറി അടിസ്ഥാനത്തിലാണ് വാങ്ങുന്നത്. വിൽപ്പനക്കാർ തന്നെ ഷിപ്പിംഗിനും ഇൻഷുറൻസിനും ഏർപ്പാട് ചെയ്യുന്നു. സൗദി അറേബ്യയും റഷ്യയും ഉൾപ്പെടെയുള്ള ഒപെക് ഉൽപ്പാദകരുടെ ഉൽപ്പാദനം വെട്ടിക്കുറച്ചതിനാൽ വിലക്കുറവ് കുറഞ്ഞതിനാൽ ജൂലൈ പകുതി മുതൽ റഷ്യൻ എണ്ണ വില പരിധി നിരക്കായ ബാരലിന് 60 ഡോളറിന് മുകളിലാണ് വ്യാപാരം നടത്തുന്നത്.
മൊത്തത്തിലുള്ള എണ്ണ ആവശ്യത്തിന്റെ 80 ശതമാനത്തിലധികം നിറവേറ്റാൻ ഇന്ത്യ ഇറക്കുമതിയെയാണ് ആശ്രയിക്കുന്നത്. ഇന്ത്യയുടെ ക്രൂഡ് ഓയിൽ ഇറക്കുമതി ഈ വർഷം സെപ്തംബറിൽ 12 മാസത്തിനിടയിലെ ഏറ്റവും താഴ്ന്ന നിരക്കിലുമാണ്. 17.80 ദശലക്ഷം ടൺ ക്രൂഡ് ഓയിലാണ് സെപ്തംബറില് ഇന്ത്യ ഇറക്കുമതി ചെയ്തിരിക്കുന്നത്.
ഇന്ത്യയുടെ മൊത്തം ഇറക്കുമതിയുടെ 38 ശതമാനവും റഷ്യയിൽ നിന്നാണ്. ഇടത്തരം സോർ ഗ്രേഡുകളായ യുറലുകൾ (റഷ്യ), അറബ് ലൈറ്റ് (സൗദി അറേബ്യ) എന്നിവയുടെ വില ഉയരുന്നതും ഇന്ത്യയുടെ ഇറക്കുമതിയെ ബാധിച്ചു. ലോകത്തിലെ ഏറ്റവും മികച്ച രണ്ട് ക്രൂഡ് ഓയിൽ കയറ്റുമതിക്കാരായ സൗദി അറേബ്യയും റഷ്യയും സ്വമേധയാ ഉൽപ്പാദനം വെട്ടിക്കുറച്ചത് ഇറാഖിൽ നിന്ന് കൂടുതൽ ചരക്ക് വാങ്ങാൻ ഇന്ത്യയെ നിർബന്ധിതരാക്കുകയും ചെയ്തു.
Click it and Unblock the Notifications
Sign in with Google