വിശന്ന് മരിക്കുന്നതിലും ഭേദം അതാണ്..; വെടിനിര്ത്തല് കരാര് ഉപയോഗിക്കാനാകാതെ ഇന്ത്യ
കീവ്: റഷ്യന്- യുക്രൈന് യുദ്ധത്തില് താല്ക്കാലിക വെടിനിര്ത്തല് പ്രഖ്യാപിച്ചെങ്കിലും അത് ഉപയോഗപ്പെടുത്താനാകാതെ ഇന്ത്യ. പൗരന്മാര്ക്ക് രാജ്യം വിടാന് മാനുഷിക ഇടനാഴികള് ഒരുക്കുമെന്ന് ഇരുരാജ്യങ്ങളും പ്രഖ്യാപിച്ചെങ്കിലും ഈ ഇടനാഴികള് ഇന്ത്യക്കാരെ സംബന്ധിച്ചിടത്തോളം ഉപയോഗിക്കാന് കഴിയില്ലെന്നതാണ് തിരിച്ചടി. സിവിലിയന്മാര്ക്ക് മരിയുപോള്, വോള്നോവാഖ നഗരങ്ങള് വിടാനാണ് മാനുഷിക ഇടനാഴികള് ഒരുക്കിയിരിക്കുന്നത്. എന്നാല് കിഴക്കന് ഉക്രെയ്നില് കുടുങ്ങിയ ഇന്ത്യക്കാര്ക്ക് ഈ എക്സിറ്റ് റൂട്ടുകള് ഉപയോഗിക്കാന് കഴിഞ്ഞില്ല.
റഷ്യകരാര് ലംഘിച്ചുവെന്നും തുടര്ച്ചയായ ഷെല്ലാക്രമണം മൂലം സിവിലിയന്മാരെ സുരക്ഷിതമായി ഒഴിപ്പിക്കാന് മാനുഷിക ഇടനാഴികള് തുറക്കുന്നത് അസാധ്യമാണെന്നും യുക്രൈന് പറയുന്നു. ചില ഇന്ത്യക്കാര്ക്ക് യുക്രെയ്നിന്റെ പടിഞ്ഞാറന് അതിര്ത്തിയിലേക്ക് മാത്രമേ നീങ്ങാന് കഴിയൂ. സുമിയില് ഉള്ള ഇന്ത്യക്കാരെ ഒഴിപ്പിക്കുന്നതിലാണ് അനിശ്ചിതത്വം നേരിടുന്നത്. അതേസമയം യുക്രൈനിലെ സ്ഥിതിഗതികളും ഒഴിപ്പിക്കല് നടപടികളും അവലോകനം ചെയ്യുന്നതിനായി ന്യൂദല്ഹിയില് പ്രധാനമന്ത്രി നരേന്ദ്ര മോദിയുടെ അധ്യക്ഷതയില് യോഗം ചേര്ന്നു. സുമിയിലും പിസോചിനിലും ഉള്ളവര് ഒഴികെ കൂടുതല് ഇന്ത്യക്കാര് യുക്രൈനില് അവശേഷിക്കുന്നില്ലെന്ന് വിദേശകാര്യ മന്ത്രാലയ വക്താവ് അരിന്ദം ബാഗ്ചി പറഞ്ഞു.
വടക്ക്-കിഴക്കന് യുക്രൈനിലെ സുമിയിലെ വിദ്യാര്ത്ഥികളോട് കേന്ദ്ര സര്ക്കാര് അവിടെ തുടരാന് ആവശ്യപ്പെടുകയും അവരെ ഒഴിപ്പിക്കാന് പ്രദേശത്ത് വെടിനിര്ത്തലിന് ആഹ്വാനം ചെയ്യുകയും ചെയ്തു. മന്ത്രാലയവും ഞങ്ങളുടെ എംബസികളും വിദ്യാര്ത്ഥികളുമായി നിരന്തരം സമ്പര്ക്കം പുലര്ത്തുന്നു, അരിന്ദം ബാഗ്ചി പറഞ്ഞു. എന്നാല് എല്ലാ ഇന്ത്യന് പൗരന്മാരെയും പിസോചിന് ഒഴിപ്പിച്ചതായി യുക്രെയ്നിലെ ഇന്ത്യന് എംബസി അറിയിച്ചു. അവരുടെ സുരക്ഷ എപ്പോഴും ഞങ്ങളുടെ മുന്ഗണനയാണെന്നും എംബസി വക്താക്കള് അറിയിച്ചു. പിസോചിനില് ഒഴിപ്പിക്കേണ്ടത് 289 ല് താഴെ വിദ്യാര്ത്ഥികളായിരുന്നു. ഇന്നത്തോടെ ആ ദൗത്യം പൂര്ത്തിയാക്കാന് കഴിയുമെന്ന് തങ്ങള് പ്രതീക്ഷിക്കുന്നു.
അവിടെ നിന്ന് വിദ്യാര്ഥികളുമായി മൂന്ന് ബസുകള് ഇതിനകം പുറപ്പെട്ടിട്ടുണ്ട്. അഞ്ച് ബസുകളില് ബാക്കിയുള്ളവരെ എത്തിക്കും. ഏതാനും മണിക്കൂറുകള്ക്കുള്ളില് എല്ലാവരെയും അവിടെ നിന്ന് ഒഴിപ്പിക്കാന് തങ്ങള്ക്കാകുമെന്നും എംബസി വക്താക്കള് അറിയിച്ചു. 'റഷ്യയുടെ വടക്കുകിഴക്കന് അതിര്ത്തിയിലുള്ള സുമിയിലാണ് ഇപ്പോള് പ്രധാന ശ്രദ്ധ. വിദ്യാര്ത്ഥികളെ അവിടെ നിന്ന് ഒഴിപ്പിക്കാനുള്ള ഒന്നിലധികം ഓപ്ഷനുകള് ഞങ്ങള് ആലോചിക്കുകയാണ്. എന്നാല് അവിടെ നടന്നുകൊണ്ടിരിക്കുന്ന ഷെല്ലാക്രമണവും അക്രമവും ഗതാഗത സൗകര്യങ്ങളുടെ അഭാവവുമാണ് പ്രധാന വെല്ലുവിളി' അദ്ദേഹം പറഞ്ഞു.
അതേസമയം വലിയ പ്രതിസന്ധിയാണ് തങ്ങള് നേരിടുന്നതെന്ന് സുമിയിലെ വിദ്യാര്ത്ഥികള് പറയുന്നു. 'മാനുഷിക ഇടനാഴി' വഴി പലായനം ചെയ്യിക്കുമെന്ന വാഗ്ദാനങ്ങള്ക്ക് ശേഷം തങ്ങള്ക്ക് പ്രതീക്ഷ നഷ്ടപ്പെട്ടുവെന്നും നഗരത്തില് തുടര്ച്ചയായ ബോംബാക്രമണം സൂചിപ്പിക്കുന്നത് വെടിനിര്ത്തലിന്റെ ഒരു സൂചനയും ഇതുവരെ ഉണ്ടായിട്ടില്ലെന്നുാണെന്ന് സുമിയിലെ വിദ്യാര്ത്ഥികള് ശനിയാഴ്ച പറഞ്ഞു. കഴിഞ്ഞ രണ്ട് ദിവസമായി വെള്ളമോ ഭക്ഷണമോ വൈദ്യുതിയോ ഇല്ല, ഓരോ ദിവസം കഴിയുന്തോറും ബോംബ് സ്ഫോടനങ്ങള് കൂടുതല് വഷളായിക്കൊണ്ടേയിരിക്കുന്നു. പലപ്പോഴും ബോംബുകള് ഞങ്ങളില് നിന്ന് നൂറുകണക്കിന് മീറ്റര് അകലെയാണ് വന്ന് വീഴുന്നത്, സുമിയിലുള്ള സാറ അസാന് പറയുന്നു.
ഞങ്ങള് ഏറ്റവും പുതിയതായി കേട്ടത് ഞങ്ങളെ ഒഴിപ്പിക്കാന് ഞായറാഴ്ച ശ്രമം ഉണ്ടാകുമെന്നാണ്. എന്നാല് ഇത് ഔദ്യോഗിക സ്രോതസ്സുകളിലൂടെയല്ല. നാളെയല്ലെങ്കില്, ഞങ്ങള്ക്ക് എല്ലാ പ്രതീക്ഷകളും നഷ്ടപ്പെടും,' മിസ് അസാന് പറഞ്ഞു. ഇന്ന് പത്താം ദിവസമാണ്. എല്ലാ ദിവസവും ഞങ്ങളെ ഒഴിപ്പിക്കുമെന്ന് ഞങ്ങള് കേള്ക്കുന്നു, പക്ഷേ അത് ഇതുവരെ സംഭവിക്കുന്നില്ല. താമസിയാതെ ഞങ്ങള്ക്ക് അടുത്തുള്ള അതിര്ത്തിയിലേക്ക് സ്വയം നടക്കാന് തുടങ്ങുകയല്ലാതെ മറ്റൊരു മാര്ഗവുമില്ല. വിശപ്പും ദാഹവും കൊണ്ട് മരിക്കുന്നതിനുപകരം രക്ഷപ്പെടാന് ശ്രമിച്ച് മരിക്കാന് ഞങ്ങള് ആഗ്രഹിക്കുന്നു, മറ്റൊരു വിദ്യാര്ത്ഥിയായ ദുഷ്യന്ത് സിറവ് പറഞ്ഞു.
Click it and Unblock the Notifications
Sign in with Google