രാജസേനന്, ഭീമന് രഘു, രാമസിംഹന്.. അടുത്തത് കൃഷ്ണകുമാര്? നേതൃത്വത്തോടുള്ള അതൃപ്തി പരസ്യമാക്കി താരം
തിരുവനന്തപുരം: സംസ്ഥാനത്തെ ബി ജെ പി നേതൃത്വത്തോടുള്ള സിനിമാ താരങ്ങളായ നേതാക്കള്ക്കുള്ള അതൃപ്തി അവസാനിക്കുന്നില്ല. സംസ്ഥാന നേതൃത്വത്തെ കുറ്റപ്പെടുത്തി ഭീമന് രഘു, രാജസേനന്, രാമസിംഹന് എന്നിവര് പാര്ട്ടി വിട്ടതിന് പിന്നാലെ അതൃപ്തി പരസ്യമാക്കി നടനും ബി ജെ പി ദേശീയ കൗണ്സില് അംഗവുമായ കൃഷ്ണകുമാറും രംഗത്തെത്തി.
ഇന്ന് ബി ജെ പി ദേശീയ അധ്യക്ഷന് ജെ പി നദ്ദ പങ്കെടുത്ത തിരുവനന്തപുരം ലോക്സഭാ മണ്ഡലം വിശാല ജനസഭയില് തനിക്ക് വേദിയില് ഇടം നല്കിയില്ലെന്ന് കൃഷ്ണകുമാര് പറഞ്ഞു. കവടിയാര് ഉദയ് പാലസില് വെച്ചായിരുന്നു വിശാല ജനസഭ സംഘടിപ്പിച്ചത്. പരിപാടിയില് പങ്കെടുക്കാനായി കൃഷ്ണകുമാറിനെ സംസ്ഥാന നേതൃത്വത്തില് നിന്ന് ആരും ബന്ധപ്പെട്ടിട്ടുമില്ല എന്നാണ് വിവരം.
കേരളത്തിന്റെ ചുമതലയുള്ള പ്രഭാരിയായ മുന് കേന്ദ്രമന്ത്രി പ്രകാശ് ജാവഡേക്കറാണ് കൃഷ്ണകുമാറിനോട് പരിപാടിയില് പങ്കെടുക്കണമെന്ന് ആവശ്യപ്പെട്ടത് എന്നാണ് പുറത്ത് വരുന്ന റിപ്പോര്ട്ട്. എന്നാല് സദസിലിരുന്ന കൃഷ്ണകുമാര് പരിപാടി തീരും മുന്പു തന്നെ മടങ്ങിപ്പോവുകയും ചെയ്തു. ഇതിനു പിന്നാലെ ബി ജെ പി സംസ്ഥാന നേതൃത്വത്തോടുള്ള അതൃപ്തി പരസ്യമാക്കി കൃഷ്ണകുമാര് രംഗത്തെത്തുകയായിരുന്നു.
നമ്മുടെ സമയം നമ്മെ അര്ഹതപ്പെട്ട സ്ഥലത്ത് എത്തിച്ചിരിക്കും എന്നും ഇന്ന് ഇവിടെ ഇരിക്കാനാണു യോഗം എന്നും കൃഷ്ണകുമാര് പറഞ്ഞു. അതിനാല് താന് വളരെ സന്തോഷത്തോടെയാണ് ഇവിടെ ഇരിക്കുന്നത് എന്നും കൃഷ്ണകുമാര് കൂട്ടിച്ചേര്ത്തു. തനിക്ക് വേദിയില് ഇടം കിട്ടാത്തത് താന് ശ്രദ്ധിക്കുന്നത് പോലും മറ്റുള്ളവര് പറഞ്ഞിട്ടാണ് എന്നും അദ്ദേഹം പറഞ്ഞു. ഇടക്ക് രണ്ട് പേര് വദിയില് നിന്ന് ഇറങ്ങി വന്ന് തന്നോടു വേദിയില് വന്ന് ഇരിക്കാന് ആവശ്യപ്പെട്ടിരുന്നു എന്നും താരം കൂട്ടിച്ചേര്ത്തു.
എന്നാല് താനിവിടെ തൃപ്തനാണെന്നും അടുത്തിരിക്കുന്നവരുമായി കൂട്ടായെന്നും പറഞ്ഞ് ക്ഷണം നിരസിക്കുകയായിരുന്നു എന്നും കൃഷ്ണകുമാര് പറഞ്ഞു. അതേസമയം, തര്ക്കങ്ങളുണ്ടെങ്കിലും ബി ജെ പി വിടുന്നതിനെക്കുറിച്ച് ഇപ്പോള് ചിന്തിക്കുന്നില്ലെന്ന് കൃഷ്ണകുമാര് പറഞ്ഞു. ഇക്കഴിഞ്ഞ നിയമസഭാ തിരഞ്ഞെടുപ്പില് തിരുവനന്തപുരം സെന്ട്രല് മണ്ഡലത്തില് നിന്ന് മത്സരിച്ച കൃഷ്ണകുമാര് നല്ല വോട്ട് പിടിച്ചിരുന്നു.
അതിനിടെ പാര്ട്ടി സംസ്ഥാന അധ്യക്ഷന് കെ സുരേന്ദ്രന് ഉള്പ്പെടെയുള്ള നേതാക്കളെ ഫോണില് വിളിച്ചാല് കിട്ടാറില്ലെന്ന് കൃഷ്ണകുമാര് കുറ്റപ്പെടുത്തി. പാര്ട്ടി നേതൃത്വവുമായുള്ള ആശയവിനിമയം വേണ്ട തോതില് നടക്കുന്നില്ലെന്നും നേതാക്കള്ക്ക് അവരുടേതായ തിരക്കുകളുള്ളത് കൊണ്ടാകും തന്നേപ്പോലുള്ളവര് വിളിച്ചാല് കിട്ടാത്തതെന്നും കൃഷ്ണകുമാര് കൂട്ടിച്ചേര്ത്തു.
ബി ജെ പിയില് കലാകാരന്മാര്ക്ക് അര്ഹിക്കുന്ന പരിഗണന കിട്ടുന്നില്ലെന്ന പരാതി ഉന്നയിച്ചാണ് സംവിധായകരായ രാജസേനന്, രാമസിംഹന് (അലി അക്ബര്) എന്നിവരും നടന് ഭീമന് രഘുവും കഴിഞ്ഞ മൂന്നാഴ്ചക്കിടെ പാര്ട്ടി വിട്ടത്. സംവിധായകന് മേജര് രവിയും സംസ്ഥാനന നേതൃത്വത്തെ കുറ്റപ്പെടുത്തി രംഗത്തെത്തിയിരുന്നു. അതേസമയം കലാകാരന്മാര് ഉള്പ്പെടെയുള്ളവരുടെ കൊഴിഞ്ഞുപോക്കിനെക്കുറിച്ച് ചര്ച്ച ചെയ്യാനാണ് നദ്ദ വരുന്നത് എന്ന് നേരത്തെ റിപ്പോര്ട്ടുകളുണ്ടായിരുന്നു.
Click it and Unblock the Notifications
Sign in with Google