തന്നെ വലിച്ചിഴച്ചു; മലയാള മനോരമ വാര്ത്തയ്ക്കെതിരെ രഞ്ജിനി
കൊച്ചി: നടി ഇനിയയുടെ ഫോട്ടോ, ഫോട്ടോഗ്രാഫര് സമ്മതമില്ലാതെ വിറ്റെന്ന ആരോപണത്തില് തന്റെ പേര് വലിച്ചിഴച്ചതിനെതിരെ നടിയും അവതാരകയുമായി രഞ്ജിനി ഹരിദാസ് രംഗത്തെത്തി. തന്റെ ഫേസ്ബുക്ക് പോസ്റ്റിലൂടെയാണ് മനോരമ ഓണ്ലൈനില് വന്ന വാര്ത്തയ്ക്കെതിരെ രഞ്ജിനി പ്രതികരിച്ചത്.
ഇനിയയുമായോ ഫോട്ടോഗ്രാഫര് ഫോട്ടോഗ്രാഫര് സരിത് സി വര്മയുമായോ തനിക്ക് ഒരു ബന്ധവുമില്ലെന്ന് രഞ്ജിനി പറഞ്ഞു. അവരെ ഇതുവരെ കണ്ടിട്ടുപോലുമില്ല. അങ്ങനെയിരിക്കെ മനോരമയില് വന്ന വാര്ത്തയില് എന്തിനാണ് തന്റെ പേര് കൂട്ടിച്ചേര്ത്തതെന്ന് നടി ചോദിക്കുന്നു. ഇത്തരം കാര്യങ്ങളില് നിന്നും മനോരമ പിന്മാറണമെന്ന് രഞ്ജിനി അഭ്യര്ഥിച്ചു.
ഫോട്ടോഗ്രാഫര് സരിത് സി വര്മ തന്നെ വഞ്ചിച്ചെന്നു കാട്ടി ഇനിയ രംഗത്തെത്തിയിരുന്നു. ഒരു ക്യാമറപോലും സ്വന്തമായി ഇല്ലാത്ത കാലത്ത് തന്റെ ഫോട്ടോ ഷൂട്ടിനുവന്ന ഇയാള്ക്ക് ഒരു ലക്ഷം രൂപ മുടക്കി താനാണ് ക്യാമറയും മറ്റും വാടകയ്ക്ക് സംഘടിപ്പിച്ചു നല്കിയതെന്ന് ഇനിയ പറയുന്നു.
അന്ന് തന്റെ ഗ്ലാമറസ് ആയ ഒരു ഫോട്ടോ ഇയാള് എടുത്തിരുന്നു. അത് അപ്പോള് തന്നെ ഡിലീറ്റ് ചെയ്യണമെന്നും ആവശ്യപ്പെട്ടു. എന്നാല്, അടുത്തിടെ ഒരു സിനിമാ മാധ്യമത്തില് ആ ചിത്രം കണ്ടതോടെ താന് ഞെട്ടി. മാധ്യമത്തില് വിളിച്ച് അന്വേഷിച്ചപ്പോഴാണ് നേരത്തെ തന്നെ ഈ ചിത്രം വന് തുക കൊടുത്ത് ഫോട്ടാഗ്രാഫര് വിറ്റതാണെന്ന് അറിയുന്നത്. മറ്റൊരാള്ക്കും തന്റെ ഗതി ഉണ്ടാകരുതെന്ന് കാട്ടിയാണ് നടി മനോരമയ്ക്ക് അഭിമുഖം നല്കിയത്.