ദുരന്തത്തിന്റെ ആഴം കുറച്ചത് നല്ലവരായ നാട്ടുകാർ, അഭിനന്ദിച്ച് മുഖ്യമന്ത്രിയും ആരോഗ്യമന്ത്രിയും
തിരുവനന്തപുരം: കരിപ്പൂരിൽ കൊവിഡിനെ പോലും വകവെയ്ക്കാതെ രക്ഷാപ്രവർത്തനം നടത്തിയ നാട്ടുകാർക്ക് അഭിനന്ദന പ്രവാഹം. മുഖ്യമന്ത്രി പിണറായി വിജയനും ആരോഗ്യമന്ത്രി കെകെ ശൈലജയും നാട്ടുകാരെ അഭിനന്ദിച്ച് രംഗത്ത് എത്തി. ദുരന്തത്തിന്റെ ആഴം കുറച്ചത് നല്ലവരായ ജനങ്ങളുടെ നല്ല മനസ് ഒന്നുകൊണ്ട് മാത്രമാണ് എന്ന് കെകെ ശൈലജ പ്രതികരിച്ചു.
Recommended Video
മുഖ്യമന്ത്രിയുടെ പ്രതികരണം ഇങ്ങനെ: ''കരിപ്പൂർ വിമാന താവളത്തിൽ വിമാനം അപകടത്തിൽപെട്ടപ്പോൾ ദ്രുതഗതിയിൽ രക്ഷാപ്രവർത്തനത്തിൽ ഏർപ്പെടാൻ ആയത് വലിയൊരു അളവ് വരെ ദുരന്തത്തിന്റെ വ്യാപ്തി കുറയ്ക്കുവാൻ ഇടയാക്കിയിട്ടുണ്ട്. പരിക്കേറ്റവരെ രക്ഷിക്കാൻ ദുരിതാശ്വാസ പ്രവർത്തനങ്ങളിൽ അധികൃതരോടൊപ്പം കോവിഡ് ഭീതിയും അപകട സാധ്യതയും അവഗണിച്ചു നാട്ടുകാർ മുന്നിട്ടിറങ്ങിയത് സഹജീവി സ്നേഹത്തിൻ്റെ ഉദാത്തമായ അനുഭവമാണ്. രാത്രി ഏറെ വൈകിയും ആശുപത്രികളിൽ രക്തദാനത്തിനായി എത്തിച്ചേർന്ന യുവാക്കളുടെ നീണ്ട നിരയും ദുരന്തത്തിനിടയിലും കേരളത്തിന് ആശ്വാസവും പ്രതീക്ഷയും നൽകുന്നു. രക്ഷാ പ്രവർത്തനത്തിലേർപ്പെട്ട ഓരോരുത്തരെയും അഭിവാദ്യം ചെയ്യുന്നു''.
കരിപ്പൂര് വിമാനാപകടത്തില് പരിക്കേറ്റവരെ രക്ഷിക്കാന് സമയോചിതമായി ഇടപെട്ട് രക്ഷാപ്രവര്ത്തനം നടത്തിയ നാട്ടുകാരുള്പ്പെടെയുള്ള എല്ലാവര്ക്കും നന്ദി അറിയിക്കുന്നുവെന്ന് ആരോഗ്യ മന്ത്രി ഫേസ്ബുക്കിൽ കുറിച്ചു. ''ദുരന്തത്തിന്റെ ആഴം കുറച്ചത് നല്ലവരായ ജനങ്ങളുടെ നല്ല മനസ് ഒന്നുകൊണ്ട് മാത്രമാണ്. നാട്ടുകാര്, എയര്പോര്ട്ട് ജീവനക്കാര്, സന്നദ്ധ പ്രവര്ത്തകര്, പോലീസ്, ഫയര്ഫോഴ്സ്, സുരക്ഷാ ജീവനക്കാര്, ആംബുലന്സ് പ്രവര്ത്തകര്, ഡ്രൈവര്മാര്, ഉദ്യോഗസ്ഥര് തുടങ്ങി എല്ലാവരും ഒറ്റക്കെട്ടായാണ് ദുരന്ത മുഖത്ത് പ്രവര്ത്തിച്ചത്''.
''പെട്ടന്നുണ്ടായ ദുരന്തത്തിന്റെ നടുക്കത്തില് പലരും കോവിഡ് പ്രോട്ടോകോള് പോലും പാലിക്കാന് സാധിക്കാതെയാണ് ദുരന്തമുഖത്തേയ്ക്ക് ഇറങ്ങിയത്. പരമാവധി ആള്ക്കാരെ രക്ഷിക്കാനും സാധിച്ചു. അതേസമയം കണ്ടൈന്മെന്റ് സോണായ എയര്പോര്ട്ട് പരിസരത്ത് രക്ഷാദൗത്യവുമായിറങ്ങിയ എല്ലാവരും സ്വരക്ഷയ്ക്കും നാടിന്റെ സുരക്ഷയ്ക്കും വേണ്ടി ജാഗ്രത പാലിക്കണം എന്നും ആരോഗ്യമന്ത്രി ആവശ്യപ്പെട്ടു. വിമാന അപകടത്തിൽപ്പെട്ടവർക്ക് കൊവിഡ് പരിശോധന നടത്തുകയാണ്. രക്ഷാ പ്രവർത്തനം നടത്തിയവരോട് നിരീക്ഷണത്തിൽ പ്രവേശിക്കാൻ അധികൃതർ ആവശ്യപ്പെട്ടിട്ടുണ്ട്.
എല്ലാവരുടേയും പരിശോധനകള് നടത്തുന്നതാണ് എന്ന് ആരോഗ്യമന്ത്രി വ്യക്തമാക്കി. ആരും ഇതൊരു ബുദ്ധിമുട്ടായി കരുതരുത്. രക്ഷാദൗത്യത്തില് പങ്കെടുത്തവര് ഇന്ന് തന്നെ ആരോഗ്യ വകുപ്പിനെ വിവരം അറിയിക്കേണ്ടതാണ്. ദിശ 1056, 0471 2552056 എന്ന നമ്പരിലേക്കോ മലപ്പുറം, കോഴിക്കോട് ജില്ലാ കണ്ട്രോള് റൂം നമ്പരിലേക്കോ (മലപ്പുറം: 0483 2733251, 2733252, 2733253, കോഴിക്കോട്: 0495 2376063, 2371471, 2373901) ബന്ധപ്പെട്ട് പേര്, മേല്വിലാസം, ഫോണ് നമ്പര് എന്നിവ നല്കേണ്ടതാണ്. എത്രയും വേഗം ഇവരുടെ ലൈന് ലിസ്റ്റ് തയ്യാറാക്കി ആരോഗ്യ വകുപ്പ് മേല്നടപടി സ്വീകരിക്കും എന്ന് മന്ത്രി അറിയിച്ചു.
Click it and Unblock the Notifications
Sign in with Google