തൃശൂരില്‍ ആറ് വയസ്സുകാരന്റെ കണ്ണില്‍ മുളക് തേച്ച് അധ്യാപികമാരുടെ ക്രൂരത

തൃശൂര്‍: ആറ് വയസ്സുകാരനായ യുകെജി വിദ്യാര്‍ത്ഥിയുടെ കണ്ണില്‍ അധ്യപികമാര്‍ മുളക് തേച്ചതായി പരാതി. കടപ്പുറം തൊട്ടാപ്പ് ബദര്‍പള്ളിക്കടുത്തുള്ള ആല്‍ബര്‍ട്ട് ഐന്‍സ്റ്റീന്‍ മോഡല്‍ ഇംഗ്ലീഷ് സ്‌കൂളിലാണ് സംഭവം.

കടപ്പുറം സ്വദേശിയായ റമളാന്‍ ഷുഹൈബിന്റെ മകനാണ് അധ്യാപകരുടെ പീഡത്തിന് ഇരയായി എന്ന് പരാതിപ്പെട്ടത്. ബന്ധുക്കള്‍ പരാതിപ്പെട്ടതിനെ തുടര്‍ന്ന് ഒരു അധ്യാപികക്കെതിരെ പോലീസ് കേസെടുത്തിട്ടുണ്ട്.

എന്നാല്‍ വിദ്യാര്‍ത്ഥിയുടെ കണ്ണില്‍ മുളക് തേച്ചു എന്ന ആരോപണം സ്‌കൂള്‍ അധികൃതര്‍ നിഷേധിച്ചു. പേടിപ്പിക്കാന്‍ വേണ്ടി മുളക് കാണിക്കുക മാത്രമേ ചെയ്തുള്ളൂ എന്നാണ് വിശദീകരണം. അങ്ങനെയെങകില്‍ തന്നെയും ഒരു എല്‍കെജി വിദ്യാര്‍ത്ഥിയെ ഇത്തരത്തില്‍ ഭയപ്പെടുത്താമോ എന്ന ചോദ്യവും ശേഷിക്കുന്നു.

സ്‌കൂളില്‍ വഴക്കുണ്ടാക്കിയതിനാണത്രെ ഇത്തരത്തില്‍ ശിക്ഷ നടപ്പാക്കിയത്. ഓഫീസിലേക്ക് വിളിച്ച് വരുത്തി, ഒരു അധ്യാപിക പിടിച്ചുവക്കുകയും മറ്റൊരു അധ്യാപിക കണ്ണില്‍ മുളക് തേക്കുകയും ആണ് ഉണ്ടായതെന്നാണ് കുട്ടി വീട്ടുകാരോടും പിന്നീട് ചൈല്‍ഡ് ലൈന്‍ പ്രവര്‍ത്തകരോടും പറഞ്ഞത്. സ്‌കൂള്‍ തോട്ടത്തില്‍ നിന്നാണ് അധ്യാപിക മുളക് എടുത്തതെന്നും പറയുന്നു.

സ്‌കൂളില്‍ നിന്ന് വീട്ടിലെത്തിയ കുട്ടി അസ്വസ്ഥത പ്രകടിപ്പിച്ചപ്പോഴാണ് സംശയം തോന്നിയത്. ഇനി സ്‌കൂളില്‍ പോകില്ലെന്ന് വാശിപിടിച്ചപ്പോഴാണ് വിശദമായി അന്വേഷിച്ചത്. അപ്പോഴാണ് ഇക്കാര്യങ്ങള്‍ വെളിപ്പെടുത്തിയത്.

English summary

Complaint against Teachers by UKG student from Thrissur