'നീലവെളിച്ച'ത്തിലെ ഗാനങ്ങൾ സംബന്ധിച്ച വിവാദം; പകര്പ്പവകാശം ഉള്ളവര്ക്ക് പ്രതിഫലം നല്കിയെന്ന് ആഷിഖ് അബു
കൊച്ചി: നീലവെളിച്ചത്തില് എം എസ് ബാബുരാജിന്റെ ഗാനങ്ങള് അനുമതിയില്ലാതെ ഉപയോഗിച്ചതിനെതിരെ അദ്ദേഹത്തിന്റെ കുടുംബം നൽകിയ പരാതിയിൽ മറുപടിയുമായി സംവിധായകൻ ആഷിഖ് അബു. നിയമപരമായ എല്ലാ നടപടികളും പാലിച്ച് ആ ഗാനങ്ങളുടെ നിലവിലെ ഉടമസ്ഥര് ആവശ്യപ്പെട്ട പ്രതിഫലം നല്കി, കരാറൊപ്പുവെച്ചിട്ടാണ് നീലവെളിച്ചം സിനിമയില് അവ ഉപയോഗിച്ചതെന്ന് ആഷിബ് അബു പറഞ്ഞു.
നിലവിലുണ്ടായിരിക്കുന്ന വിവാദം, തെറ്റിദ്ധാരണമൂലമുണ്ടായ ആശയക്കുഴപ്പം കൊണ്ടാണെന്നാണ് അനുമാനിക്കുന്നത്. ഇത് രമ്യമായി പരിഹരിക്കാനായി എം എസ് ബാബുരാജിന്റെ കുടുംബാംഗങ്ങളുമായി നിരന്തര സമ്പര്ക്കത്തിലാണെന്നും ആഷിഖ് അബു വ്യക്തമാക്കി.
ഒപിഎം സിനിമാസിന്റെ വാര്ത്താകുറിപ്പ് പൂര്ണരൂപം ഇങ്ങനെ-
1964 ല് പുറത്തിറങ്ങിയ ഭാര്ഗവീനിലയം' എന്ന ചിത്രത്തിലെ ഗാനങ്ങള് പുതിയ ഗായകരെ ഉപയോഗിച്ചോ അല്ലാതെയോ, പുതിയ ഓര്ക്കസ്ട്രേഷനോടു കൂടി പുനര്നിര്മ്മിച്ച് ഉപയോഗിക്കാനുള്ള അനുമതിയും അവകാശവും ഗാനരചയിതാവായ പി ഭാസ്കരനില് നിന്നും, സംഗീതസംവിധായകനായ എം എസ് ബാബുരാജിന്റെ പിന്തുടര്ച്ചക്കാരില് നിന്നും നീതിയുക്തമായ രീതിയില് ഈ ഗാനങ്ങളുടെ മുന് ഉടമസ്ഥാവകാശമുണ്ടായിരുന്ന നിര്മ്മാണ കമ്പനി സ്വന്തമാക്കിയിരുന്നു.
ഈ അവകാശക്കൈമാറ്റ തുടര്ച്ചയുടെ ഭാഗമായി നിയമപരമായ എല്ലാ പ്രക്രിയകളും പിന്തുടര്ന്ന്, ആ ഗാനങ്ങളുടെ നിലവിലെ ഉടമസ്ഥര് ആവശ്യപ്പെട്ട പ്രതിഫലം നല്കി, കരാറൊപ്പുവെച്ചിട്ടാണ് പ്രസ്തുത ഗാനങ്ങള് പുനര്നിര്മ്മിച്ച് ഉപയോഗിക്കാനുള്ള അവകാശം നീലവെളിച്ചത്തിന്റെ നിര്മ്മാതാക്കളായ ഒ പി എം സിനിമാസ് കരസ്ഥമാക്കിയിട്ടുള്ളത്. ഇതുമായി ബന്ധപ്പെട്ട രേഖകളും, ഇതിലേക്ക് നയിച്ച മുന് കരാര് രേഖകളും ഞങ്ങളുടെ കൈവശമുണ്ട്.(സ്വകാര്യത കണക്കിലെടുത്ത്, ഈ നിയമവ്യവഹാരങ്ങളില് ഭാഗമായ വ്യക്തികളുടെ പേരു വിവരങ്ങള് ഇവിടെ പരാമര്ശിക്കുന്നില്ല.
നിയമത്തിനപ്പുറം, ഈ ഗാനങ്ങള് ചിട്ടപ്പെടുത്തിയ അനശ്വര സംഗീതജ്ഞന് എം എസ് ബാബുരാജിന്റെ കുടുംബത്തെ ഈ ഗാനങ്ങള് പുനര്നിര്മ്മിച്ച് 'നീലവെളിച്ചം' സിനിമയില് ഉപയോഗിക്കുന്ന വിവരം അറിയിക്കുക എന്നതാണ് മര്യാദ എന്നതിനാല്, അദ്ദേഹത്തിന്റെ മൂത്ത മകള് സാബിറയെ ഇക്കാര്യം അറിയിച്ച് അവരുടെ സ്നേഹാശംസകള് ലഭിച്ച ശേഷമാണ് ഈ ഗാനങ്ങള് സിനിമയില് ഉപയോഗിച്ചിടുള്ളത്.
ഈ സാഹചര്യത്തില്, നിലവിലുണ്ടായിരിക്കുന്ന വിവാദം, തെറ്റിദ്ധാരണമൂലമുണ്ടായ ആശയക്കുഴപ്പം കൊണ്ടാണെന്ന് ഞങ്ങള് അനുമാനിക്കുന്നു. ഇത് രമ്യമായി പരിഹരിക്കാനായി എം എസ് ബാബുരാജിന്റെ കുടുംബാംഗങ്ങളുമായി ഞങ്ങള് നിരന്തര സമ്പര്ക്കങ്ങളിലാണ്. ഈ വിവരങ്ങള് അഭ്യുദയകാംക്ഷികളുടെ അറിവിലേക്കായി പ്രസിദ്ധപ്പെടുത്തുന്നു.
Click it and Unblock the Notifications
Sign in with Google