ടൗട്ടെ അതിതീവ്ര ചുഴലിക്കാറ്റായി, 3 ജില്ലകളില് ഓറഞ്ച് അലര്ട്ട്, ശക്തമായ കാറ്റും മഴയും
തിരുവനന്തപുരം: മധ്യകിഴക്കന് അറബിക്കടലില് ടൗട്ടെ ചുഴലിക്കാറ്റ് ശക്തിപ്രാപിച്ചു അതിശക്ത ചുഴലിക്കാറ്റായി. ഇന്ന് രാവിലെയാണ് ടൗട്ടെ കൂടുതല് ശക്തിപ്രാപിച്ചത്. അതിശക്ത ചുഴലിക്കാറ്റായി മാറിയ ടൗട്ടെ ഇപ്പോള് ഗോവന് തീരത്തിന് 150 കിലോ മീറ്റര് അകലെയാണ് ഉള്ളത്. ചൊവ്വാഴ്ച്ച രാവിലെ ഈ ചുഴലിക്കാറ്റ് ഗുജറാത്ത് തീരത്തെത്തും. മുംബൈയിലും ഗുജറാത്തിലും അതീവ ജാഗ്രതാ മുന്നറിയിപ്പ് ഉണ്ട്. സംസ്ഥാനത്ത് ചുഴലിക്കാറ്റിന്റെ പ്രഭാവത്തെ തുടര്ന്ന് ഇന്നും ശക്തമായ മഴയുണ്ടാവും.
കേരള തീരത്ത് ചുഴലിക്കാറ്റിന്റെ സ്വാധീനം മെയ് 16 വരെ തുടരുമെന്നതിനാല് അതിതീവ്രമോ അതിശക്തമായതോ ആയ മഴക്കും ശക്തമായ കാറ്റിനും സാധ്യതയുണ്ട്. വിവിധ ജില്ലകളില് ഓറഞ്ച് , യെല്ലോ അലെര്ട്ടുകള് പ്രഖ്യാപിച്ചിരിക്കുന്നു. കടലാക്രമണം, ശക്തമായ ഇടിമിന്നല് തുടങ്ങിയ അപകട സാധ്യതകളെ സംബന്ധിച്ചും ജാഗ്രത പാലിക്കണം. വടക്കന് ജില്ലകളായ കണ്ണൂര്, കാസറഗോഡ്, കോഴിക്കോട്, വയനാട്, മലപ്പുറം ജില്ലകളില് ചുഴലിക്കാറ്റിന്റെ പ്രഭാവം മൂലമുള്ള അതിശക്തമായ കാറ്റും അതിശക്തമായ മഴയും കടല്ക്ഷോഭവും വരും മണിക്കൂറുകളിലും തുടരും.
അടുത്ത 12 മണിക്കൂറില് അതിശക്ത ചുഴലിക്കാറ്റ് കൂടുതല് ശക്തിപ്രാപിക്കുമെന്നു കേന്ദ്ര കാലാവസ്ഥ വകുപ്പിന്റെ ചുഴലിക്കാറ്റ് നിരീക്ഷണ കേന്ദ്രം അറിയിക്കുന്നു. ശക്തിപ്രാപിച്ച അതിശക്ത ചുഴലിക്കാറ്റ് വടക്ക് - വടക്കു പടിഞ്ഞാറ് ദിശയില് സഞ്ചരിക്കുമെന്നും മെയ് 17 വൈകുന്നേരത്തോടു കൂടി ഗുജറാത്ത് തീരത്ത് എത്തുകയും തുടര്ന്ന് മെയ് 18 അതിരാവിലെയോട് കൂടി ഗുജറാത്തിലെ പോര്ബന്ദര്, മഹുവ തീരങ്ങള്ക്കിടയിലൂടെ കരയിലേക്ക് പ്രവേശിക്കുമെന്നും പ്രതീക്ഷിക്കപ്പെടുന്നു. ഇനിയൊരു അറിയിപ്പ് ഉണ്ടാകുന്നത് വരെ കേരള തീരത്ത് കടലില് പോകുന്നതിന് ദുരന്ത നിവാരണ അതോറിറ്റി പൂര്ണ്ണ വിലക്കേര്പ്പെടുത്തിയിരിക്കുകയാണ്
അതേസമയം തെക്ക് കിഴക്കന് അറബിക്കടലില് രൂപം കൊണ്ട ന്യൂനമര്ദത്തിന്റെ ശക്തി കുറഞ്ഞതിനാല് എറണാകുളം ജില്ലയില് അടക്കം മഴ കുറഞ്ഞിട്ടുണ്ട്. ഇരുപത്തൊന്നോളം ദുരിതാശ്വാസ ക്യാമ്പുകളാണ് ജില്ലയിലാണ്. 143 കുടുംബങ്ങളെയാണ് ക്യാമ്പിലേക്ക് മാറ്റിയത്. കനത്ത മഴയില് ഇടുക്കി ജില്ലയില് വ്യാപ ക്യാഷി നാശവും ഉണ്ടായിട്ടുണ്ട്. കൊടുങ്ങല്ലൂര്, ചാവക്കാട്, എറിയാട് എന്നിവിടങ്ങളില് കടല് ക്ഷോഭത്തെ തുടര്ന്ന് 354 പേരെയാണ് ക്യാമ്പിലേക്ക് മാറ്റിയത്. ചുഴലിക്കാറ്റിന്റെ വികാസവും സഞ്ചാരപഥവും കേന്ദ്ര കാലാവസ്ഥ വകുപ്പും സംസ്ഥാന ദുരന്ത നിവാരണ അതോറിറ്റിയും സസൂക്ഷ്മം നിരീക്ഷിച്ചു വരികയാണ്.
Click it and Unblock the Notifications
Sign in with Google