മോഷണത്തിനിടെ മുട്ട കുടിച്ചത് വിനയായി; റാന്നിയുടെ ഉറക്കം കെടുത്തിയ കള്ളനെ പോലീസ് പിടികൂടി

പത്തനംതിട്ട: മുട്ടത്തോടില്‍ നിന്ന് ലഭിച്ച വിരലടയാളം പിന്തുടര്‍ന്ന് സംസ്ഥാനത്തെ വിവിധ ജില്ലകളില്‍ മോഷണം നടത്തിയ പ്രതിയെ പോലീസ് വലയിലാക്കി. തൃശ്ശൂര്‍ ചാവക്കാട് പുത്തന്‍ കടപ്പുറം കരിമ്പി കെകെ ഫക്രുദ്ദിനെയാണ് പോലീസ് പിടികൂടിയത്. ഇലന്തൂര്‍ രാജ് ഹോട്ടലില്‍ മോഷണം നടത്തുന്നതിനിടയിലാണ് ഫക്രുദ്ദീന്‍ മുട്ടപൊട്ടിച്ച് കുടിച്ചത്. മുട്ടത്തോടില്‍ നിന്ന് ലഭിച്ച വിരലടയാളം ഫക്രുദ്ദീന്‍റെയാണെന്ന് പോലീസ് കണ്ടെത്തുകയായിരുന്നു.

പത്തനംതിട്ട, തൃശ്ശൂര്‍, പാലക്കാട്, ആലപ്പുഴ, കണ്ണൂര്‍ ജില്ലകളിലൊക്കെ ഇയാര്‍ മോഷണം നടത്തിയിട്ടുണ്ടെന്ന് റാന്നി പോലീസ് ഇന്‍സ്പെക്ടര്‍ വിപിന്‍ ഗോപിനാഥ് പറഞ്ഞു. ആരാധനാലയങ്ങളും വ്യാപാര കേന്ദ്രങ്ങളും കേന്ദ്രീകരിച്ചായിരുന്നു ഇയാളുടെ കവര്‍ച്ച. രണ്ട് മാസത്തിനിടെ റാന്നിയിലെ ആരാധാനാലയങ്ങളിലടക്കം നിരവധി സ്ഥാപനങ്ങളില്‍ വ്യാപകമായ മോഷണം നടന്നിരുന്നു. തുടര്‍ന്ന് ജില്ലാ പോലീസ് മേധാവിയുടെ നിര്‍ദ്ദേശപ്രകാരം പോലീസ് അന്വേഷണം ഉര്‍ജ്ജിതമാക്കിയിരുന്നു.

ഇതിനിടയിലാണ് പെരുമ്പഴയില്‍ വെച്ച് സംശയകരമായ സാഹചര്യത്തില്‍ ഫക്രൂദ്ധീനെ ഷാഡോ പോലീസ് പിടികൂടിയത്. ജുലായ് 29 ന് മന്ദമരുതി മാര്‍ത്തോമ പള്ളിയിലും ജൂണ്‍ 28 ന് ഇടക്കുളം സെന്‍റ് തോമസ് ക്നാനായാ പള്ളിയിലും മോഷണം നടത്തിയിരുന്നവെന്ന് പ്രതിപോലീസിനോട് സമ്മതിച്ചു. മോഷ്ടിച്ചു കിട്ടുന്ന പണം മദ്യപിക്കാനും ധൂര്‍ത്തടിക്കാനുമാണ് പ്രതി ചിലവിട്ടിരുന്നതെന്ന് പോലീസ് പറഞ്ഞു.

English summary

Egg shell became prime evidence; this is how police caught the thief