ശബരിമല വിഷയമുള്ള ബിജെപി ലഘുലേഖ ചട്ടവിരുദ്ധമെന്ന് തെരഞ്ഞെടുപ്പ് കമ്മീഷൻ..നശിപ്പിക്കാൻ നിർദേശം

ശബരിമല വിഷയം ഉൾപ്പെടുത്തിയ ബിജെപിയുടെ ലഘുലേഖയ്ക്കെതിരെ നടപടിയുമായി തിരഞ്ഞെടുപ്പ് കമ്മീഷൻ. ലഘുലേഖ വിതരണം ചട്ടവിരുദ്ധമാണെന്നും അവ കണ്ടെത്തിയാൽ ഉടൻ നശിപ്പിക്കണമെന്നും കമ്മീഷൻ ജില്ലാ കളക്ടർമാർക്ക് നിർദേശം നൽകി. സിപഎം സംസ്ഥാന സെക്രട്ടറി എംവി ഗോവിന്ദൻ്റെ പരാതിയിലാണ് നടപടി.

പ്രചരണത്തിലുടനീളം ശബരിമല സ്വർണപാളി വിഷയം തന്നെയാണ് ബിജെപി പ്രധാന ആയുധമാക്കിയത്. ക്ഷേത്രഭരണം ഭക്തർക്ക് വേണ്ടിയല്ല, മറിച്ച് പാർട്ടിക്ക് കൊള്ളയടിക്കാനുള്ള ഉപാധിയാക്കി മാറ്റിയിരിക്കുകയാണ് പിണറായി സർക്കാരെന്ന് ബിജെപി വിമർശിച്ചു.

ശബരിമല ക്ഷേത്രത്തിലെ സ്വർണ്ണപ്പാളി തട്ടിക്കാൻ മുൻ ദേവസ്വം ബോർഡ് പ്രസിഡന്റും സിപിഎം നേതാവുമായ പത്മകുമാർ മിനിറ്റ്സിൽ കൃത്രിമം കാണിച്ചെന്ന വാർത്ത ഞെട്ടിക്കുന്നതാണെന്നും ഇന്ന് ബിജെപി നേതാക്കൾ പ്രതികരിച്ചു.ബോർഡ് അംഗങ്ങൾ പോലുമറിയാതെ, ഔദ്യോഗിക രേഖയിൽ പച്ചമഷി കൊണ്ട് തിരുത്തിയെഴുതിയ ആ കൈകൾ വിരൽചൂണ്ടുന്നത് സിപിഎമ്മിന്റെ അഴിമതി രാഷ്ട്രീയത്തിലേക്കാണ്. പത്മകുമാറിന്റെ ഈ നടപടി ഒറ്റപ്പെട്ടതല്ല, മറിച്ച് ക്ഷേത്രസ്വത്ത് കൊള്ളയടിക്കാനുള്ള സിപിഎം അജണ്ടയുടെ വ്യക്തമായ കയ്യൊപ്പാണ്. ഈ വഞ്ചനയ്ക്ക് വിശ്വാസ സമൂഹം മാപ്പുനൽകില്ലെന്നും ബിജെപി പ്രതികരിച്ചു.

പരസ്യ പ്രചാരണം നാളെ അവസാനിക്കും

പരസ്യപ്രചാരണം അവസാനിക്കുന്ന സമയത്ത് രാഷ്ട്രീയ പാർട്ടികൾ നടത്തുന്ന കൊട്ടിക്കലാശം പോലുള്ള പരിപാടികൾ സമാധാനപരമായിരിക്കണമെന്നും, ക്രമസമാധാനപ്രശ്‌നങ്ങൾ ഉണ്ടാകാതെ ശ്രദ്ധിക്കണമെന്നും സംസ്ഥാന തിരഞ്ഞെടുപ്പ് കമ്മീഷണർ എ ഷാജഹാൻ നിർദേശിച്ചു.

തദ്ദേശ തിരഞ്ഞെടുപ്പിന്റെ ആദ്യഘട്ട പോളിങ്ങിന് മുന്നോടിയായി പരസ്യപ്രചാരണം ഡിസംബർ 7 ന് വൈകുന്നേരം 6 ന് അവസാനിക്കും. ഡിസംബർ 9ന് വോട്ടെടുപ്പ് നടക്കുന്ന തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് പരസ്യപ്രചാരണം അവസാനിക്കുന്നത്.

പൊതുജനങ്ങൾക്ക് മാർഗ്ഗ തടസ്സം സൃഷ്ടിച്ചു കൊണ്ടുള്ള സമാപന പരിപാടികൾ പാടില്ല. പരസ്യ പ്രചാരണത്തിന്റെ സമാപനത്തിലുണ്ടാകുന്ന തർക്കങ്ങളും, വെല്ലുവിളികളും, ശബ്ദ നിയന്ത്രണമില്ലാതെയുള്ള അനൗൺസ്‌മെന്റുകളും പ്രചാരണ ഗാനങ്ങൾ ഉച്ചത്തിൽ കേൾപ്പിച്ചു മത്സരിക്കുന്ന പ്രവണതയും കർശനമായി നിയന്ത്രിക്കാൻ കമ്മീഷണർ ജില്ലാ കളക്ടർമാർക്കും പോലീസ് അധികൃതർക്കും നിർദ്ദേശം നൽകി.

പരസ്യപ്രചാരണത്തിന്റെ സമാപനത്തിലും മാതൃകാ പെരുമാറ്റ ചട്ടവും ഹരിതച്ചട്ടവും പാലിക്കുന്നുണ്ടെന്ന് സ്ഥാനാർത്ഥികളും രാഷ്ട്രീയ പാർട്ടികളും ഉറപ്പുവരുത്തണം. 1951 ലെ ജനപ്രാതിനിധ്യ നിയമത്തിലെ സെക്ഷൻ 126(1) പ്രകാരം വോട്ടെടുപ്പ് അവസാനിക്കുന്നതിന് 48 മണിക്കൂർ മുമ്പ് പരസ്യ പ്രചാരണം അവസാനിപ്പിക്കണം. ഈ വ്യവസ്ഥ തദ്ദേശസ്വയംഭരണപൊതുതിരഞ്ഞെടുപ്പിനും ബാധകമാണെന്ന് കമ്മീഷൻ അറിയിച്ചു.