സ്വർണത്തേക്കാള്‍ ലാഭം തരുന്നത് വെള്ളിയോ? ഏത് വാങ്ങുന്നതാണ് നല്ലത്? ഒരു വർഷത്തിനിടയില്‍ എല്ലാം തകിടം മറിഞ്ഞു

കേരളത്തിൽ ശനിയാഴ്ച സ്വർണവില തുടർച്ചയായ രണ്ടാം ദിവസവും വർധിച്ചിരിക്കുകയാണ്. ഇന്ന് ഒരു പവന് 240 രൂപയും ഗ്രാമിന് 30 രൂപയും കൂടിയതോടെ ഒരു പവൻ സ്വർണത്തിന്റെ വില 72360 രൂപയും ഗ്രാമിന്റെ വില 9045 രൂപയുമായി. 5 ശതമാനം പണിക്കൂലി, ജിഎസ്ടി, ഹോൾമാർക്കിങ് ചാർജ് എന്നിവ ഉൾപ്പെടെ ഒരു പവന് ഏകദേശം 79000 രൂപ വരെ നല്‍കേണ്ടി വരും. ഡിസൈന്‍ മാറുന്നതിന് അനുസരിച്ച് വിലയും ഉയർന്ന് കൊണ്ടിരിക്കും.

കഴിഞ്ഞ വ്യാഴാഴ്ചത്തെ 73040 രൂപയാണ് സംസ്ഥാനത്ത് ഇന്നുവരെ രേഖപ്പെടുത്തിയതിലെ ഏറ്റവും ഉയർന്ന നിരക്ക്. രാജ്യാന്തര വിപണിയിലും സ്വർണ വില ഇന്ന് മുന്നോട്ട് പോയി. ട്രോയ് ഔൺസിന് 3,326.15 ഡോളർ നിരക്കിലാണ് നിലവിലെ വില്‍പ്പന. സുരക്ഷിത നിക്ഷേപം എന്ന നിലയില്‍ സ്വർണത്തിന്റെ ഡിമാന്‍ഡ് വർധിക്കുന്നതാണ് വില വർധനവിലെ പ്രധാന കാരണം.

യഥാർത്ഥത്തില്‍ സ്വർണത്തേക്കാള്‍ ലാഭം നല്‍കുന്നത് വെള്ളിയിലെ നിക്ഷേപത്തിനാണെന്നാണ് നിക്ഷേപകർ ചൂണ്ടിക്കാണിക്കുന്നത്. കേരളത്തിൽ ഇന്ന് വെള്ളി വില ഒരു കിലോയില്‍ 100 രൂപ കുറഞ്ഞ് 110900 രൂപയായി. ഒരു ഗ്രാം വെള്ളി 110.90 രൂപ, 8 ഗ്രാം 887.20 രൂപ, 10 ഗ്രാം 1,109 രൂപ, 100 ഗ്രാം 11,090 രൂപ എന്നിങ്ങനെയാണ് നിലവിലെ വില.

ഡിഎസ്പി മ്യൂച്വൽ ഫണ്ടിന്റെ ഒരു പഠനമനുസരിച്ച്, 2000 മുതൽ 2024 വരെയുള്ള 26 വർഷങ്ങളിൽ 10 വർഷങ്ങളിൽ വെള്ളി സ്വർണത്തെക്കാൾ മികച്ച പ്രകടനം കാഴ്ചവെച്ചിട്ടുണ്ട്. ഉദാഹരണത്തിന്, 2008 ഡിസംബർ മുതൽ 2011 ഏപ്രിൽ വരെ, വെള്ളിയുടെ വില 353.4% ഉയർന്നപ്പോൾ സ്വർണവില 78.6% മാത്രമാണ് വർധിച്ചത്. എന്നിരുന്നാലും, 2024-ലെ ഏറ്റവും പുതിയ ഉയർച്ചയുടെ സമയത്ത്, വെള്ളിയുടെ വില വർധന സ്വർണത്തിന്റെ പകുതിയോളം മാത്രമായിരുന്നു എന്നതും ശ്രദ്ധേയമാണ്.

കഴിഞ്ഞ 12 മാസത്തെ കണക്കുകള്‍ മാത്രം പരിശോധിക്കുകയാണെങ്കില്‍ സ്വർണ്ണ വില 40% കുതിച്ചുയർന്നു. ഇത് നിക്ഷേപകർക്ക് വലിയ ലാഭം നേടിക്കൊടുത്തു. ഇതേ കാലയളവില്‍ വെള്ളിയുടെ വില വെറും 15% മാത്രമായിരുന്നു.

വെള്ളിയുടെ വിലയെ ബാധിക്കുന്ന പ്രധാന ഘടകങ്ങളിലൊന്ന് അതിന്റെ ഡിമാൻഡ്-വിതരണ അസന്തുലനമാണ്. 2025-ൽ, ആഗോള വെള്ളി ഡിമാൻഡ് 1.20 ബില്യൺ ഔൺസ് ആയിരിക്കുമെന്നും വിതരണം 1.05 ബില്യൺ ഔൺസിൽ മാത്രമായിരിക്കുമെന്നും പ്രതീക്ഷിക്കപ്പെടുന്നു. അതായത് തുടർച്ചയായ അഞ്ചാം വർഷവും ഡിമാൻഡ് വിതരണത്തെ മറികടക്കും.

വ്യാവസായിക രംഗത്ത് നിന്നുമാണ് വെള്ളിക്ക് പ്രധാനമായും ഡിമാന്‍ഡ് ഉണ്ടാകുന്നത്. സോളാർ പാനലുകൾ, ഇലക്ട്രോണിക്സ്, വാട്ടർ പ്യൂരിഫിക്കേഷൻ തുടങ്ങിയ മേഖലകളിൽ വെള്ളി വലിയ തോതില്‍ ഉപയോഗിക്കുന്നു. 2026-ഓടെ സോളാർ മേഖലയിലെ വെള്ളി ഉപഭോഗം 246 മില്യൺ ഔൺസിലെത്തുമെന്നാണ് ബി എം ഒ ക്യാപിറ്റൽ മാർക്കറ്റ്സ് പ്രവചിക്കുന്നത്. എന്നാൽ, നിക്ഷേപ ഡിമാൻഡ് (ജ്വല്ലറി, സിൽവർവെയർ, ഇൻവെസ്റ്റ്മെന്റ്) താരതമ്യേന ദുർബലവുമാണ്.

സ്വർണത്തിന്റെ വില വർധനയ്ക്ക് പിന്നിലെ പ്രധാന ഘടകം ഭൗമരാഷ്ട്രീയ അനിശ്ചിതത്വങ്ങളും (ഉദാഹരണത്തിന്, ട്രംപിന്റെ ടാരിഫ് നയങ്ങൾ) സുരക്ഷിത ആസ്തിയെന്ന നിലയിലുള്ള ആഗോള ഡിമാൻഡുമാണ്. കേന്ദ്ര ബാങ്കുകളുടെ ശക്തമായ വാങ്ങലും (2024-ൽ 1,180 ടൺ) സ്വർണവിലയെ പിന്തുണയ്ക്കുന്നു. എന്നാൽ, വെള്ളിയുടെ വില വ്യാവസായിക ഉപയോഗത്തിന്റെ ഏറ്റക്കുറച്ചിലുകൾക്ക് വിധേയമാണ്, ഇത് അതിന്റെ വിലനിലവാരത്തിൽ അസ്ഥിരത സൃഷ്ടിക്കുന്നു.

ഗോൾഡ്മാൻ സാക്സിന്റെ വിശകലനമനുസരിച്ച്, സ്വർണം തുടർച്ചയായി കേന്ദ്ര ബാങ്ക് ഡിമാൻഡ് കാരണം വെള്ളിയെ മറികടക്കുന്നു, എന്നാൽ വെള്ളിയുടെ വ്യാവസായിക പ്രാധാന്യം ദീർഘകാലത്തേക്ക് അതിന്റെ വില ഉയർത്താൻ സാധ്യതയുണ്ട്. അതുകൊണ്ട് തന്നെ നിക്ഷേപകർ സ്വർണ്ണത്തോടൊപ്പം തന്നെ വെള്ളിയിലും നിശ്ചിത അനുപാതത്തില്‍ നിക്ഷേപിക്കുന്നതാണ് നല്ലതെന്ന് വിദഗ്ധർ ചൂണ്ടിക്കാട്ടുന്നു.