സംസ്ഥാനത്ത് ഇന്നും നാളെയും ശക്തമായ മഴക്ക് സാധ്യത; എട്ട് ജില്ലകളില് ഓറഞ്ച് അലര്ട്ട്
തിരുവനന്തപുരം: സംസ്ഥാനത്ത് ഇന്നും നാളെയും ശക്തമായ മഴക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്കി. ശക്തമായ മഴയ്ക്ക് സാധ്യതയുള്ളതിനാല് എട്ട് ജില്ലകളില് ഓറഞ്ച് അലര്ട്ടും, ആറ് ജില്ലകളില് യെല്ലോ അലര്ട്ടും പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, എറണാകുളം, കോഴിക്കോട്, വയനാട് ജില്ലകളിലാണ് ഓറഞ്ച് അലര്ട്ട് പ്രഖ്യാപിച്ചിരിക്കുന്നത്. ആലപ്പുഴ, മലപ്പുറം, തൃശ്ശൂര്, പാലക്കാട്, കണ്ണൂര്, കാസര്കോട് ജില്ലകളില് യെല്ലോ അലര്ട്ടും പ്രഖ്യാപിച്ചു.
തെക്ക് കിഴക്കന് ബംഗാള് ഉള്കടലില് രൂപം കൊണ്ട ന്യൂനമര്ദ്ദം നിലവില് കോമറിന് ഭാഗത്തും സമീപ പ്രദേശങ്ങളിലുമായി സ്ഥിതി ചെയ്യുകയാണെന്ന് കാലാവസ്ഥ നിരീക്ഷണകേന്ദ്രം പറഞ്ഞു. 24 മണിക്കൂറിനുള്ളില് തെക്ക് കിഴക്കന് അറബികടലില് പ്രവേശിക്കുന്ന ന്യൂന മര്ദ്ദം തുടര്ന്നുള്ള 48 മണിക്കൂറില് വടക്ക് -വടക്കു പടിഞ്ഞാറ് ദിശയില് സഞ്ചരിച്ചു ശക്തി പ്രാപിക്കാന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
കഴിഞ്ഞ ആഴ്ചയാണ് തെക്കന് ബംഗാള് ഉള്ക്കടലില് ന്യൂനമര്ദ്ദം രൂപപ്പെട്ടത് അവിടെ നിന്നും പടിഞ്ഞാറ് ദിശയിലേക്ക് നീങ്ങിയ ന്യൂനമര്ദ്ദം ശ്രീലങ്കയ്ക്ക് മുകളിലായി രണ്ട് ദിവസം നിന്ന ശേഷമാണ് ഇപ്പോള് വടക്ക് - പടിഞ്ഞാറ് ദിശയിലായി നീങ്ങി കൊണ്ടിരിക്കുന്നതെന്നും കാലാവസ്ഥ വകുപ്പ് മുന്നറിയിപ്പ് നല്കി. അറബിക്കടലില് എത്തിയ ശേഷം ന്യൂനമര്ദ്ദം കൂടുതല് കരുത്താര്ജ്ജിച്ചേക്കുമെന്നാണ് വിവിധ കാലാവസ്ഥാ ഏജന്സികളുടെ പ്രവചനം.
കേരളത്തില് അടുത്ത മൂന്നോ നാലോ ദിവസത്തേക്ക് ഒറ്റപ്പെട്ട ശക്തമായ മഴ തുടരാനാണ് സാധ്യതയെന്നും കേന്ദ്രകാലാവസ്ഥാ നിരീക്ഷണ കേന്ദ്രം പ്രവചിച്ചു. ഇന്നും നാളെയും ഒറ്റപ്പെട്ട അതി ശക്തമായ മഴക്കും സാധ്യതയുണ്ടെന്നും ഇതിനാലാണ് സംസ്ഥാനത്ത് തീവ്രമഴ മുന്നറിയിപ്പ് നല്കിയിരിക്കുന്നതെന്നും കലാവസ്ഥ വകുപ്പ് അറിയിച്ചു. മഴയ്ക്കൊപ്പം ഇടിമിന്നലും ശക്തമായ കാറ്റും തുടരും. ഈ ദിവസങ്ങളില് മത്സ്യതൊഴിലാളികള് യാതൊരു കാരണവശാലും കടലില് പോകരുതെന്നും കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പില് പറയുന്നു. കേരളത്തില് അടുത്ത 3-4 ദിവസം ഒറ്റപ്പെട്ട ശക്തമായ മഴ തുടരാന് സാധ്യതയുണ്ടെന്നും ഇന്നും നാളെയും ഒറ്റപ്പെട്ട അതി ശക്തമായ മഴക്കും സാധ്യതയുണ്ടെന്നും കലാവാസ്ഥ നിരീക്ഷണകേന്ദ്രം പറഞ്ഞു. പൊതുജനങ്ങള്ക്ക് കര്ശന നിര്ദ്ദേശവും നല്കിയിട്ടുണ്ട്. ശക്തമായ കടലാക്രമണത്തിന് സാധ്യതയുള്ളതിനാല് മത്സ്യതൊഴിലാളികള് ഒരു കാരണവശാലും കടലില് പോകരുതെന്നും തീരപ്രദേശങ്ങളില് താമസിക്കുന്നവര് ജാഗ്രത പാലിക്കണമെന്നും അധികൃതര് അറിയിച്ചു. സഞ്ചാരികള് ബിച്ച് സൈഡുകളിലേക്ക് പോകുന്നത് ഒഴിവാക്കണമെന്നും അധികൃതര് നിര്ദ്ദേശം നല്കി.
Click it and Unblock the Notifications
Sign in with Google