പെരുമഴ വരുന്നു; ഈ ആറ് ജില്ലകളിലെ സ്കൂളുകള്ക്ക് നാളെ അവധി
തിരുവനന്തപുരം/കാസര്കോട്: കേരളത്തില് ഇന്നും നാളേയും കനത്ത മഴ പെയ്യുമെന്ന് കേന്ദ്ര കാലാവസ്ഥാ വകുപ്പ്. അതിതീവ്രമഴക്കുള്ള സാധ്യതയാണ് കേരളത്തിലെ മൂന്ന് ജില്ലകളില് പ്രവചിച്ചിരിക്കുന്നത്. 24 മണിക്കൂറില് 204.4 മില്ലി മീറ്ററില് കൂടുതല് മഴ ലഭിക്കുന്നതിനെ ആണ് അതിതീവ്രമായ മഴ എന്നത് കൊണ്ട് അര്ത്ഥമാക്കുന്നത്. ഈ സാഹചര്യത്തില് കണ്ണൂര്, കാസര്കോട്, മലപ്പുറം ജില്ലകളില് നാളെ റെഡ് അലര്ട്ട് ആയിരിക്കും.
അതേസമയം കണ്ണൂരിന് പിന്നാലെ കാസര്കോട്ടും കോഴിക്കോട്ടും തൃശൂരും മലപ്പുറത്തും എറണാകുളത്തും നാളെ വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചു. കാസര്കോട് ജില്ലയിലെ മിക്ക പ്രദേശങ്ങളിലും കഴിഞ്ഞ 24 മണിക്കൂറില് അതിശക്തമായ മഴ രേഖപ്പെടുത്തിയിട്ടുണ്ട് എന്ന് ജില്ലാ കളക്ടര് കെ. ഇമ്പശേഖര് പറഞ്ഞു. കാലവര്ഷക്കാറ്റ് ശക്തി പ്രാപിക്കുന്നതിനാല് നാളെ അതി തീവ്രമഴയ്ക്കുള്ള റെഡ് അലെര്ട്ട് മുന്നറിയിപ്പ് കേന്ദ്ര കാലാവസ്ഥാ വകുപ്പ് ജില്ലയ്ക്ക് നല്കിയിട്ടുണ്ട് എന്നും അദ്ദേഹം ചൂണ്ടിക്കാട്ടി.
ഈ സാഹചര്യത്തില് മുന്കരുതല് എന്ന നിലയില് ജില്ലയിലെ സ്റ്റേറ്റ്, സി ബി എസ് ഇ, ഐ സി എസ് സി സ്കൂളുകള്, കേന്ദ്രീയ വിദ്യാലയങ്ങള്, അങ്കണവാടികള്, മദ്രസകള് തുടങ്ങിയ വിദ്യാഭ്യാസ സ്ഥാപനങ്ങള്ക്ക് നാളെ (ജൂലൈ 15, തിങ്കളാഴ്ച) അവധിയായിരിക്കും എന്ന് ജില്ലാ കളക്ടര് അറിയിച്ചു. അവധി മൂലം നഷ്ട്ടപ്പെടുന്ന പഠനസമയം ക്രമീകരിക്കാന് വിദ്യാഭ്യാസ സ്ഥാപന മേധാവികള് നടപടി സ്വീകരിക്കണം.
എന്നാല് കാസര്കോട് ജില്ലയിലെ പ്രൊഫഷണല് കോളേജുകള്ക്കും മറ്റും നാളത്തെ അവധി ബാധകമല്ല എന്നും മുന്കൂട്ടി പ്രഖ്യാപിച്ച പരീക്ഷകളില് മാറ്റമുണ്ടായിരിക്കില്ല എന്നും കളക്ടര് വ്യക്തമാക്കി. അതേസമയം കോഴിക്കോട് ജില്ലയില് നാളെ പ്രൊഫഷണല് കോളേജ് ഉള്പ്പെടയുള്ള എല്ലാ വിദ്യാഭ്യാസ സ്ഥാപനങ്ങള്ക്കുമാണ് കളക്ടര് അവധി പ്രഖ്യാപിച്ചിരിക്കുന്നത്. എന്നാല് മുന്കൂട്ടി നിശ്ചയിച്ച പരീക്ഷകള്ക്ക് മാറ്റമുണ്ടാവില്ല
ജില്ലയില് കഴിഞ്ഞ ദിവസങ്ങളിലും ഇന്നുമായി തീവ്ര മഴയുള്ളതിനാലും നാളെയും ശക്തമായ മഴ മുന്നറിയിപ്പുള്ള സാഹചര്യത്തിലും (ഓറഞ്ച് അലേര്ട്ട്) കോഴിക്കോട് ജില്ലയിലെ പ്രൊഫഷണല് കോളേജ് ഉള്പ്പെടയുള്ള എല്ലാ വിദ്യാഭ്യാസ സ്ഥാപനങ്ങള്ക്കും നാളെ (15-07-2024) അവധി പ്രഖ്യാപിച്ചു. ജില്ലയിലെ അങ്കണവാടികള്ക്കും അവധി ബാധകമാണ്. എന്നാല് മുന്കൂട്ടി നിശ്ചയിച്ച പരീക്ഷകള്ക്ക് മാറ്റമുണ്ടാവില്ല എന്നാണ് കളക്ടറുടെ ഉത്തരവില് പറയുന്നത്.
എറണാകുളം, തൃശൂര്, പാലക്കാട്, കോഴിക്കോട്, വയനാട് ജില്ലകളില് നാളെ ഓറഞ്ച് അലര്ട്ടാണ്. ഇവിടെ ഒറ്റപ്പെട്ടയിടങ്ങളില് അതിശക്തമായ മഴയ്ക്കുള്ള സാധ്യതയാണ് കേന്ദ്ര കാലാവസ്ഥാ വകുപ്പ് പ്രവചിച്ചിരിക്കുന്നത്. 24 മണിക്കൂറില് 115.6 മില്ലി മീറ്റര് മുതല് 204.4 മില്ലി മീറ്റര് വരെ മഴ ലഭിക്കുന്നതിനെയാണ് അതിശക്തമായ മഴ എന്നത് കൊണ്ട് കാലാവസ്ഥ വകുപ്പ് അര്ത്ഥമാക്കുന്നത്.
ജൂലൈ 16 ന് കോഴിക്കോട്, കണ്ണൂര്, കാസറഗോഡ് ജില്ലകളിലും 17 ന് മലപ്പുറം, കോഴിക്കോട്, കണ്ണൂര്, കാസറഗോഡ് എന്നീ ജില്ലകളിലും ഓറഞ്ച് അലര്ട്ടായിരിക്കും. 16 ന് പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം ജില്ലകളിലും 17 ന് ആലപ്പുഴ, എറണാകുളം, തൃശ്ശൂര്, പാലക്കാട് ജില്ലകളിലും 18 ന് എറണാകുളം, തൃശ്ശൂര്, മലപ്പുറം, കോഴിക്കോട്, കണ്ണൂര്, കാസറഗോഡ് എന്നീ ജില്ലകളിലും യെല്ലോ അലര്ട്ടായിരിക്കും.
Click it and Unblock the Notifications
Sign in with Google