വൈദ്യുതി ബിൽ ഓരോ മാസവും തന്നെ നൽകാൻ കെഎസ്ഇബി; സെൽഫ് മീറ്റർ റീഡിം​ഗ് വരുമോ?

തിരുവനന്തപുരം: ഉപയോക്താക്കൾക്ക് മാസം തോറം വൈദ്യുതി ബിൽ നൽകുന്നതിന് കെ എസ് ഇ ബി സാധ്യത തേടുന്നു. വൈദ്യുതി റെ​ഗുലേറ്ററി കമ്മീഷന്റെ നിർദ്ദേശം അനുസരിച്ചാണ് ഈ നീക്കം. ആവശ്യപ്പെടുന്നവർക്ക് അവർ സ്വയം നടത്തുന്ന മീറ്റർ പരിശോധനയുടെ അടിസ്ഥാനത്തിൽ ( സെൽഫ് മീറ്റർ റീഡിം​ഗ് ) മാസം തോറും ബിൽ നൽകുന്നത് സാധ്യമാണോ എന്നാണ് ആലോചിക്കുന്നത്.

ഇപ്പോൾ രണ്ട് മാസത്തിൽ ഒരിക്കൽ മീറ്റർ റീഡർ വീടുകളിൽ വന്നാണ് വൈദ്യുതി ബിൽ നൽകുന്നത്. രണ്ട് മസത്തെ ഉപയോ​ഗത്തിന്റെ പകുതി കണക്കാക്കിയാണ് സ്ലാബ് നിർണയിക്കുന്നത്. ഇങ്ങനെ രണ്ട് മാസത്തിൽ ഒരിക്കൽ ബിൽ നൽകുന്നത് കൊണ്ട് ഉപയോ​ഗത്തിന്റെ സ്ലാബ് മാറുമെന്നും അത് കൊണ്ട് കൂടുതൽ പണം നൽകേണ്ടി വരുമെന്നും ചിലർ ഉയർത്തുന്ന വിമർശനം.

വൈദ്യുത നിരക്ക് കൂട്ടുന്നതിനെ പറ്റി അടുത്തിടെ കെ എസ് ഇ ബി നടത്തിയ തെളിവെടുപ്പുകളിൽ മാസം തോറും ബിൽ നൽകണമെന്ന ആവശ്യം ഉയർന്നിരുന്നു. ബിൽ രണ്ട് മാസത്തിൽ ഒരിക്കൽ നൽകുന്നത് കൊണ്ട് ഉപയോ​ഗിക്കാത്ത വൈദ്യുതിക്ക് പണം ഈടാക്കുന്നില്ലെന്നും സ്ലാബ് മാറുന്നില്ലെന്നും റെ​ഗുലേറ്ററി കമ്മീഷൻ വിശദീകരിച്ചിരുന്നു.

എന്നാൽ തെളിവെടുപ്പുകളിൽ പങ്കെടുത്ത ഭൂരിഭാ​ഗവും ഈ വിശദീകരണത്തിൽ തൃപ്തരല്ലെന്നാണ് റിപ്പോർട്ട്. ഇതിന് പിന്നാലെയാണ് ആവശ്യപ്പെടുന്നവർക്ക് മാസം തോറും ബിൽ നൽകാൻ സാധിക്കുമോ എന്ന് പരിശോധിക്കാൻ കമ്മീഷൻ ബോർഡിന് നിർദേശം നൽകിയത്. ബിൽ‌ നൽകുന്നതിൽ അപാകമില്ലെന്നാണ് കമ്മീഷൻ നിരീക്ഷിച്ചത്.

നേരത്തെ കോവിഡ് വ്യാപന സമയത്ത് വീടുകളിൽ മീറ്റർ റീ​ഡിം​ഗ് തടസ്സപ്പെട്ടപ്പോൾ ഉപയോക്താക്കൾ സെൽഫ് മീറ്റർ റീഡിം​ഗ് നടത്തി അറിയിക്കാൻ കെ എസ് ഇ ബി ആപ്പ് വികസിപ്പിച്ചിരുന്നു. ഇതേ മാതൃക സ്വീകരിക്കാനാകുമോ എന്നാണ് കമ്മീഷൻ ചോദിച്ചത്. പതിവ് പോലെ കെ എസ് ഇ ബി രണ്ട് മാസത്തിലാരിക്കൽ വീടുകളിൽ മീറ്റർ റീഡിം​ഗ് നടത്തും.

ഇടയ്ക്കുള്ള മാസത്തെ റീഡിം​ഗ് ഉപയോക്താവ് സ്വയം മീറ്റർ പരിശോധിച്ച് കെ എസ് ഇ ബിയെ അറിയിക്കണം. അതിനുള്ളിൽ ബിൽ കെ എസ് ഇ ബി അയയ്ക്കും അടുത്തമാസം മീറ്റർ റീഡർ പരിശോധിക്കുമ്പോൾ മുൻ മാസത്തെ ഉപയോ​ഗത്തിൽ എന്തെങ്കിലും വ്യത്യാസമുണ്ടെഹ്കിൽ അത് ക്രമീകരിക്കും. എല്ലാ മാസവും വീടുകളിലെത്തി മീറ്റർ റീഡിം​ഗ് പ്രായോ​ഗികമല്ലെന്ന് കെ എസ് ഇ ബി അറിയിച്ചതിനാലാണ് സെൽഫ് റീഡിം​ഗ് സാധ്യമാണോ എന്ന് പരിശോധിക്കാൻ കമ്മീഷൻ നിർദ്ദേശിച്ചത്.