• search
  • Live TV
കാര്യങ്ങൾ അതിവേഗം അറിയാൻ
നോട്ടിഫിക്കേഷൻ അനുവദിക്കൂ  
For Daily Alerts
LIVE

പിണറായി സര്‍ക്കാരിനെതിരെ അവിശ്വാസ പ്രമേയം അവതരിപ്പിച്ച് പ്രതിപക്ഷം!!

നിയമസഭാ സമ്മേളനത്തില്‍ പിണറായി സര്‍ക്കാരിനെതിരെ അവിശ്വാസ പ്രമേയം അവതരിപ്പിച്ച് പ്രതിപക്ഷം. വിഡി സതീശനാണ് പ്രമേയം അവതരിപ്പിച്ചത്. നിരവധി ആരോപണങ്ങളാണ് പ്രതിപക്ഷം സര്‍ക്കാരിനെതിരെ ഉന്നയിക്കുന്നത്. ലൈഫ് മിഷനിലെ തട്ടിപ്പും സ്വര്‍ണക്കടത്തുമായി മുഖ്യമന്ത്രിയുടെ ഓഫീസിന് ബന്ധമുണ്ടെന്ന ആരോപണങ്ങളും പ്രമേയത്തില്‍ ഉയര്‍ന്നു. എല്ലാറ്റിന്റെയും ഉത്തരവാദിത്തം ശിവശങ്കറിന്റെ തലയില്‍ കെട്ടിവെക്കാന്‍ നോക്കുന്നുവെന്ന് സതീശന്‍ ആരോപിച്ചുഅദാനിയെ ഒരേ സമയം എതിര്‍ക്കുകയും രഹസ്യമായി സഹായിക്കുകയും ചെയ്തുവെന്ന് പ്രതിപക്ഷ നേതാവ് രമേശ് ചെന്നിത്തല ആരോപിച്ചു. ഭരണപക്ഷവും പ്രതിപക്ഷവും പരസ്പരം ഏറ്റുമുട്ടുകയും ചെയ്തു. സ്വന്തം ശീലം വെച്ച് മറ്റുള്ളവരുടെ അളക്കുന്നതാണ് പ്രശ്‌നമെന്നായിരുന്നു ചെന്നിത്തലയ്ക്ക് പിണറായിയുടെ മറുപടി.

Newest First Oldest First
9:30 PM, 24 Aug
40തിനെതിരെ 87 വോട്ടുകൾക്കാണ് അവിശ്വാസ പ്രമേയം പരാജയപ്പെട്ടത്
9:30 PM, 24 Aug
പ്രതിപക്ഷത്തിന്റെ അവിശ്വാസ പ്രമേയം പരാജയപ്പെട്ടു
9:30 PM, 24 Aug
അവിശ്വാസ പ്രമേയത്തിന്മേൽ സഭയിൽ വോട്ടെടുപ്പ്
9:29 PM, 24 Aug
അവിശ്വാസ പ്രമേയത്തില്‍ മുഖ്യമന്ത്രിയുടെ മറുപടി അവസാനിച്ചു
9:21 PM, 24 Aug
നിയമസഭയിൽ മന്ത്രി കെ ടി ജലീലിനെതിരായ ആരോപണങ്ങള്‍ തള്ളി മുഖ്യമന്ത്രി. കിറ്റ് വിതരണത്തിനായി കോണ്‍സുല്‍ ജനറലാണ് മന്ത്രിക്ക് സന്ദേശം അയച്ചതെന്നും മുഖ്യമന്ത്രി. ജലീൽ നിയമ ലംഘനം നടത്തിയിട്ടില്ലെന്നും മുഖ്യമന്ത്രി കൂട്ടിച്ചേർത്തു.
9:19 PM, 24 Aug
മുഖ്യമന്ത്രിക്ക് ഉത്തരമില്ലെന്ന ആക്ഷേപവുമായി പ്രതിപക്ഷം. സ്പീക്കറുടെ ഡയസിന് മുമ്പിൽ മുദ്രാവാക്യം വിളികളുമായി പ്രതിപക്ഷം.
9:18 PM, 24 Aug
അവിശ്വാസ പ്രമേശ ചർച്ച പത്താം മണിക്കൂറിൽ.
7:07 PM, 24 Aug
മുഖ്യമന്ത്രി ബജറ്റ് പ്രസംഗങ്ങൾ ആവർത്തിക്കുകയാണെന്ന് രമേശ് ചെന്നിത്തല
6:24 PM, 24 Aug
മെഡിക്കല്‍ സര്‍വീസ് കോര്‍പറേഷന്റെ നടപടി സുതാര്യമായിരുന്നു. കൊറോണ പ്രതിരോധത്തിന് സുരക്ഷാ ഉപകരണങ്ങളുടെ കുറവ് വന്നിട്ടില്ല. ആദ്യഘട്ടത്തില്‍ തന്നെ ഇടപെട്ടതുകൊണ്ടാണിത്. 100 രൂപയ്ക്ക് പിപിഇ കിറ്റ് ലഭിക്കും. പക്ഷേ, നിലവാരിമില്ലാത്തതാകും. ഗുണ നിലവാരം പ്രധാനമാണെന്നും ആരോഗ്യ മന്ത്രി ശൈലജ പ്രതിപക്ഷ ഉപനേതാവ് എംകെ മുനീറിനുള്ള മറുപടിയായി പറഞ്ഞു.
6:22 PM, 24 Aug
വിപ്പ് ലംഘിച്ച ജോസ് വിഭാഗത്തിന്റേത് പാര്‍ട്ടി വിരുദ്ധ നടപടി എന്ന് ജോസഫ് വിഭാഗം. ഇരു എംഎല്‍എമാരും യുഡിഎഫിനെ വഞ്ചിച്ചു. അച്ചടക്ക നടപടി സ്വീകരിക്കുമെന്നും ജോസഫ് വിഭാഗം അറിയിച്ചു.
6:19 PM, 24 Aug
പ്രതിപക്ഷത്തിന് അവരില്‍ തന്നെ വിശ്വാസമില്ലെന്ന് മുഖ്യമന്ത്രി. യുഡിഎഫിലെ ബന്ധങ്ങള്‍ ശിഥിലമായി. ജനങ്ങളില്‍ തെറ്റിദ്ധാരണ ഉണ്ടാക്കാനാണ് പ്രതിപക്ഷത്തിന്റെ ശ്രമം എന്നും മുഖ്യമന്ത്രി.
6:15 PM, 24 Aug
സര്‍ക്കാരിനെതിരെ അഴിമതി ആരോപണവുമായി പ്രതിപക്ഷ നേതാവ് രമേശ് ചെന്നിത്തല. ഹൈവേയിലെ സര്‍ക്കാര്‍ ഭൂമി സ്വകാര്യ വ്യക്തികള്‍ക്ക് കൈമാറുന്നതില്‍ അഴിമതിയുണ്ടെന്ന് ചെന്നിത്തല ആരോപിച്ചു. കൊറോണ പ്രതിരോധം പിആര്‍ എക്‌സര്‍സൈസായി. ലാവ്‌ലിന്‍ എന്ന് കേള്‍ക്കുമ്പോള്‍ മുഖ്യമന്ത്രി ചൂടാകുന്നുവെന്നും ചെന്നിത്തല പറഞ്ഞു.
4:51 PM, 24 Aug
സംസ്ഥാന സര്‍ക്കാരിനെതിരെ രേഖാമൂലം അഴിമതി ആരോപണം ഉന്നയിച്ച് പ്രതിപക്ഷ ഉപനേതാവ് എംകെ മുനീര്‍. പിപിഇ കിറ്റും തെര്‍മോ മീറ്ററും വാങ്ങുന്നതിലാണ് അഴിമതി ആരോപണം.
4:48 PM, 24 Aug
ദേശീയ പാതയോരത്തെ സര്‍ക്കാര്‍ ഭൂമി സ്വകാര്യ വ്യക്തികള്‍ക്ക് കൈമാറുന്നതില്‍ അഴിമതിയുണ്ടെന്ന് പ്രതിപക്ഷ നേതാവ് രമേശ് ചെന്നിത്തല. വിശ്രമ കേന്ദ്രങ്ങള്‍ പണിയാന്‍ ഐഒസി ഈ ഭൂമി ചോദിച്ചിട്ട് നല്‍കിയിട്ടില്ല. പൊതുമരാമത്ത് മന്ത്രി അറിയാതെ സെക്രട്ടറി ഉത്തരവിറക്കി. മുഖ്യമന്ത്രി അഴിമതിക്ക് കൂട്ടുപിടിക്കുകയാണെന്നും രമേശ് ചെന്നിത്തല ആരോപിച്ചു.
4:01 PM, 24 Aug
രമേശ് ചെന്നിത്തലയെ മുഖ്യമന്ത്രിയാക്കാനുള്ള പൊറോട്ട നാടകമാണിതെന്ന് കോവൂര്‍ കുഞ്ഞുമോന്‍
3:38 PM, 24 Aug
ഗണേഷ് കുമാറിന്റെ പെരുമാറ്റത്തെ ചൊല്ലി സഭയില്‍ തര്‍ക്കം. മുഖ്യമന്ത്രി പിണറായി വിജയനും പ്രതിപക്ഷ നേതാവ് രമേശ് ചെന്നിത്തലയും നേര്‍ക്കുനേര്‍. ഗണേഷ് കുമാര്‍ പ്രതിപക്ഷത്തോട് അപമര്യാദയായി പെരുമാറിയെന്ന് രമേശ് ചെന്നിത്തല പറഞ്ഞു. എന്നാല്‍ മാന്യമായ അംഗത്തോട് മോശമായി പെരുമാറിയെന്ന് മുഖ്യമന്ത്രിയും പറഞ്ഞു.
3:20 PM, 24 Aug
അവിശ്വാസ പ്രമേയം ഉറപ്പായും പരാജയപ്പെടുമെന്ന് എം സ്വരാജ്. ഭരണ നേട്ടങ്ങള്‍ എണ്ണിപ്പറഞ്ഞാണ് സ്വരാജ് സംസാരിച്ചത്. യുഡിഎഫ് സര്‍ക്കാരിന്റെ കാലത്തേക്കാള്‍ കൂടുതല്‍ പിഎസ്‌സി നിയമനങ്ങള്‍ പിണറായി വിജയന്‍ സര്‍ക്കാരിന്റെ കാലത്ത് ഉണ്ടായി എന്നും സ്വരാജ് പറഞ്ഞു.
3:18 PM, 24 Aug
അവിശ്വാസ പ്രമേയം പ്രതിപക്ഷം കാണിച്ച രാഷ്ട്രീയ അബദ്ധമാണെന്ന് വീണ ജോര്‍ജ്. വിഡി സതീശന്‍ അവതരിപ്പിച്ച പ്രമേയം ദുര്‍ബലമാണ്. പറയുന്നതെല്ലാം തെറ്റുന്ന പ്രതിപക്ഷ നേതാവ് രമേശ് ചെന്നിത്തലയ്‌ക്കെതിരെയാണ് പ്രമേയം കൊണ്ടുവരേണ്ടതെന്നും വീണ ജോര്‍ജ് പരിഹസിച്ചു.
2:49 PM, 24 Aug
സ്വര്‍ണക്കടത്ത് കേസില്‍ സംശയമുനയിലുള്ള ശിവശങ്കറിന്റെ ഏക ഗോഡ്ഫാദര്‍ മുഖ്യമന്ത്രിയാണെന്ന് ഷാഫി പറമ്പില്‍ എംഎല്‍എ പറഞ്ഞു. വിമര്‍ശനങ്ങളോട് അസഹിഷ്ണുത പാടില്ല. മുഖ്യമന്ത്രിയുടെ ഓഫീസുമായി ബന്ധമില്ലാത്തത് മുഖ്യമന്ത്രിക്ക് മാത്രമാണെന്നും ഷാഫി പറമ്പില്‍ പറഞ്ഞു.
2:47 PM, 24 Aug
അവിശ്വാസ പ്രമേയത്തെ അനുകൂലിക്കുകയോ എതിര്‍ക്കുകയോ ചെയ്യില്ലെന്ന് ബിജെപി എംഎല്‍എ രാജഗോപാല്‍. ഭരണ-പ്രതിപക്ഷ പാര്‍ട്ടികള്‍ ഒരുമിച്ച് ജനങ്ങളെ സേവിക്കണം. സംസ്ഥാനത്ത് കൂടുതല്‍ വ്യവസായം വരേണ്ടതുണ്ടെന്നും രാജഗോപാല്‍ പറഞ്ഞു.
2:45 PM, 24 Aug
ഉപദേശകരെ കൂടുതല്‍ വച്ചത് മുതല്‍ തുടങ്ങി മുഖ്യമന്ത്രിയുടെ കഷ്ടകാലം എന്ന് പിസി ജോര്‍ജ്. വനപാലകരുടെ കസ്റ്റഡിയില്‍ മരിച്ച പിപി മത്തായിയുടെ കേസില്‍ ഒരാളെ പോലും അറസ്റ്റ് ചെയ്യാന്‍ സാധിച്ചില്ലെന്നും പിസി ജോര്‍ജ് പറഞ്ഞു.
2:44 PM, 24 Aug
ഉദ്യോഗസ്ഥരെ നിയന്ത്രിക്കാന്‍ കഴിയാതെ ചക്ര വ്യൂഹത്തിലാണ് മുഖ്യമന്ത്രി എന്ന് പിടി തോമസ് എംഎല്‍എ. സര്‍ക്കാരിനെതിരെ ജനങ്ങള്‍ അവിശ്വാസം പാസാക്കി കഴിഞ്ഞുവെന്നും ചര്‍ച്ചയില്‍ പങ്കെടുത്ത് പിടി തോമസ് പറഞ്ഞു.
2:42 PM, 24 Aug
തിരുവനന്തപുരം വിമാനത്താവളം സ്വകാര്യവല്‍ക്കരിക്കുന്നത് പുനഃപരിശോധിക്കണമെന്ന് ആവശ്യപ്പെട്ടുള്ള പ്രമേയത്തെ ബിജെപി അംഗം ഒ രാജഗോപാല്‍ എതിര്‍ത്തില്ല. സംസ്ഥാന ബിജെപി ഘടകം സ്വകാര്യ വല്‍ക്കരണത്തിന് അനുകൂലമാണ്.
1:20 PM, 24 Aug
അവിശ്വാസ പ്രമേയം ചുരുട്ടിക്കൂട്ടി രാഷ്ട്രീയ ചവറ്റുകൊട്ടയില്‍ എറിയണമെന്ന് പ്രദീപ് കുമാര്‍ എംഎല്‍എ. ചാനലുകളില്‍ വരുന്ന കാര്യങ്ങള്‍ മാത്രമാണ് പ്രമേയത്തിലുള്ളത്. ഷേയ്ക്‌സ്പിയറിന്റെ ചില ഉദ്ധരണികള്‍ ചേര്‍ക്കുക മാത്രമാണ് സതീശന്‍ ചെയ്തത്. പിണറായി സര്‍ക്കാരിനെ പിന്തുണയ്ക്കാന്‍ അവസരം ലഭിച്ചതില്‍ അഭിമാനമുണ്ടെന്നും പ്രദീപ് കുമാര്‍.
12:56 PM, 24 Aug
സ്വര്‍ണക്കടത്ത് കേസില്‍ ഒന്നാം പ്രതി മുഖ്യമന്ത്രിയെന്ന് മുസ്ലി ലീഗ് അംഗം കെഎം ഷാജി. തന്നെ പറ്റി മാത്രം പറയരുത് എന്നാണ് മുഖ്യമന്ത്രിയുടെ നിലപാട്. ആത്മീയ കള്ളക്കടത്തിനാണ് ഒരു മന്ത്രിക്ക് താല്‍പ്പര്യമെന്നും അഴീക്കോട് എംഎല്‍എ കുറ്റപ്പെടുത്തി.
12:03 PM, 24 Aug
പ്രതിപക്ഷ പ്രമേയം മല എലിയെ പ്രസവിച്ച പോലെ എന്ന് എസ് ശര്‍മ. പാലാ, വട്ടിയൂര്‍കാവ്, കോന്നി മണ്ഡലങ്ങള്‍ യുഡിഎഫിന് നഷ്ടപ്പെട്ടു. ഇടതുപക്ഷത്തിന് അരൂരും നഷ്ടപ്പെട്ടമായി. എങ്കിലും താരതമ്യം ചെയ്യുമ്പോള്‍ ജനപിന്തുണയില്ലാത്തത് പ്രതിപക്ഷത്തിനാണ്. സര്‍ക്കാരിന്റെ ജനപിന്തുണ ചോദ്യം ചെയ്യാന്‍ പ്രതിപക്ഷത്തിന് ധാര്‍മിക അവകാശമില്ലെന്നും ശര്‍മ.
11:54 AM, 24 Aug
വിമാനത്താവള വിഷയത്തില്‍ ബിജെപി അംഗം ഒ രാജഗോപാലിന് സഭയില്‍ സംസാരിക്കാന്‍ അനുമതി നല്‍കിയില്ലെന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍. കള്ളക്കടത്ത് പണം പോയത് എകെജി സെന്ററിലേക്കെന്നും സുരേന്ദ്രന്‍ ആരോപിച്ചു. നിയമസഭക്ക് പുറത്ത് ബിജെപി പ്രതിഷേധം സംഘടിപ്പിച്ചു.
11:51 AM, 24 Aug
പ്രതിപക്ഷ ആരോണങ്ങള്‍ തള്ളി ഭരണപക്ഷം. ജനപിന്തുണ നഷ്ടപ്പെട്ട പ്രതിപക്ഷത്തിന് എങ്ങനെ അവിശ്വാസ പ്രമേയം കൊണ്ടുവരാന്‍ സാധിക്കുമെന്ന് ചോദ്യം.
11:41 AM, 24 Aug
കേരളത്തില്‍ അവതാരങ്ങളുടെ കാലമാണെന്നും സ്വപ്‌ന സുരേഷ് അത്തരത്തിലൊരു അവതാരമാണെന്നും തിരുവഞ്ചൂര്‍ രാധാകൃഷ്ണന്‍. സതീശന്‍ അവതരിപ്പിച്ച പ്രമേയത്തെ തിരുവഞ്ചൂര്‍ പിന്താങ്ങി.
11:39 AM, 24 Aug
തിരുവനന്തപുരം വിമാനത്താവളത്തിന്റെ ടെന്‍ഡര്‍ തുക അദാനി ഗ്രൂപ്പിന് ചോര്‍ത്തി കൊടുത്തുവെന്ന് സതീശന്‍. അദാനിയുമായി മല്‍സരിച്ചവര്‍ അദാനിയുടെ ബന്ധുവിനെ കണ്‍സള്‍ട്ടന്റാക്കി. ധനമന്ത്രിക്ക് എല്ലാം അറിയാമെന്ന് സതീശന്‍.
READ MORE

English summary
Oppostion moves no confidence motion against pinarayi government live updates
വാർത്തകൾ അതിവേഗം അറിയൂ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X
X