പിജി വിദ്യാര്ത്ഥികളുടെ സമരം: ചര്ച്ചയിലെ ആവശ്യം നടപ്പിലാക്കിയെന്ന് ആരോഗ്യമന്ത്രി വീണാ ജോര്ജ്
തിരുവനന്തപുരം: ജനങ്ങളെ ബുദ്ധിമുട്ടിലാക്കുന്ന സമരം മെഡിക്കല് പിജി വിദ്യാര്ത്ഥികള് അവസാനിപ്പിക്കണമെന്നും സര്ക്കാരിന് അനുഭാവപൂര്ണമായ സമീപനമാണുള്ളതെന്നും ആരോഗ്യമന്ത്രി വീണ ജോര്ജ് അറിയിച്ചു. ജനങ്ങള് ദുരിതത്തിലാകാതിരിക്കാനാണ് ചരിത്രത്തില് ആദ്യമായി എന്എജെമാര്മാരെ നിയമിച്ചത്. ഇതിന് മുമ്പും ഇപ്പോഴുമായി രണ്ട് തവണ ഉന്നയിച്ച ആവശ്യങ്ങള് സര്ക്കാര് ചെയ്ത് പരിഹസിച്ചെന്നും മന്ത്രി വ്യക്തമാക്കി.
ആദ്യ സമരത്തിലെ ചര്ച്ചയെ തുടര്ന്ന് ജയിച്ച എല്ലാവരെയും എസ്ആര് ആയി നല്കി. പിഎച്ച്സി, എഫ്എച്ച്സി, എഫ്എല്ടിസി എന്നിവിടങ്ങളില് നിയമിച്ച പിജി വിദ്യാര്ഥികളെ പൂര്ണമായും പിന്വലിച്ചു. കുഹാസിന്റെ റിസള്ട്ട് വേഗത്തിലാക്കി ഹൗസ് സര്ജന്മാരെ നിയമിച്ചു. സ്റ്റൈപെന്ഡ് ഉയര്ത്തുന്നതിന് ധനവകുപ്പിനോട് ആവശ്യപ്പെട്ടു. ഇപ്പോഴത്തെ സമരത്തില് അവര് പ്രധാനമായും രണ്ട് ആവശ്യങ്ങളാണ് ഉന്നയിച്ചത്. ഒന്നാം വര്ഷ പിജി പ്രവേശനം നേരത്തേ നടത്തുക എന്നതാണ് ആദ്യം ഉന്നയിച്ചത്. സുപ്രീം കോടതിയുടെ മുന്നിലുള്ള വിഷയമാണത്. ഇക്കാര്യത്തില് സര്ക്കാരിന് ഇടപെടാന് കഴിയില്ലെന്ന് മന്ത്രി വ്യക്തമാക്കി.
രണ്ടാമതായി അവര് ഉന്നയിച്ച ആവശ്യം ജോലിഭാരം കുറയ്ക്കുക എന്നതാണ്. ഇതിനായി ചരിത്രത്തിലാദ്യമായി എന്എജെആര്മാരെ നിയമിച്ച് ഉത്തരവിട്ടെന്നും മന്ത്രി വ്യക്തമാക്കി. സംസ്ഥാനത്തെ മെഡിക്കല് കോളജുകളില് ഇവരെ നിയമിക്കുന്നതിനുള്ള നടപടികള് ഉടന് പൂര്ത്തിയാക്കാന് നിര്ദേശം നല്കിയെന്നും ഏഴു മെഡിക്കല് കോളജുകളിലുമായി 373 എന്എജെആര്മാരെ നിയമിക്കുന്നതിനാണ് ഉത്തരവായതെന്നും ആരോഗ്യമന്ത്രി വ്യക്തമാക്കി.
സംസ്ഥാനത്തെ മെഡിക്കല് കോളേജുകളില് ഇവരെ നിയമിക്കുന്നതിനുള്ള നടപടികള് ഉടന് പൂര്ത്തിയാക്കാന് നിര്ദേശം നല്കി. ഏഴ് മെഡിക്കല് കോളേജുകളിലുമായി 373 എന്.എ.ജെ.ആര്.മാരെ നിയമിക്കുന്നതിനാണ് ഉത്തരവായത്. ആറ്, ഏഴ് തീയതികളില് പിജി ഡോക്ടര്മാരുടെ പ്രതിനിധികളുമായി ചര്ച്ച നടത്തി. ആ ചര്ച്ചയില് പ്രതിനിധികള് സംതൃപ്തരായിരുന്നു. അവര് സമരം അവസാനിപ്പിക്കാനും തയാറായി. എന്നാല് ഇപ്പോഴത്തെ സമരത്തിനായി നോട്ടീസ് നല്കിയത് ആദ്യം വന്ന പ്രതിനിധികള് ആയിരുന്നില്ല. അതെന്തുകൊണ്ടാണെന്ന് അറിയില്ല.
പിജി ഡോക്ടര്മാരോട് ഹോസ്റ്റല് ഒഴിയണമെന്ന് സര്ക്കാര് നിര്ദേശിച്ചിട്ടില്ല. ഇത് ശ്രദ്ധയില്പ്പെട്ടയുടന് പ്രിന്സിപ്പല്മാരുമായി സംസാരിച്ചു. ഇത്തരം നടപടികള് പാടില്ലെന്നും സര്ക്കുലര് പുറപ്പെടുവിച്ചെങ്കില് ഒഴിവാക്കണമെന്നും നിര്ദേശം നല്കിയിട്ടുണ്ട്. നിരാലംബരും സാധാരണക്കാരുമാണ് മെഡിക്കല് കോളേജ് ആശുപത്രികളിലെത്തുന്നത്. അത്യാഹിത വിഭാഗങ്ങളിലെത്തുന്ന രോഗികള്ക്ക് ബുദ്ധിമുട്ടുണ്ടാകാതിരിക്കാന് സര്ക്കാര് നടപടി സ്വീകരിച്ചിട്ടുണ്ട്. അസി. പ്രൊഫസര്മാര്, അസോ. പ്രൊഫസര്മാര് ഉള്പ്പെടെയുള്ള ഡോക്ടര്മാരുടെ അധിക സേവനം അതത് മെഡിക്കല് കോളേജുകള് ഉറപ്പ് വരുത്തുമെന്നും മന്ത്രി വ്യക്തമാക്കി.
അതേസമയം, പി.ജി. ഡോക്ടര്മാരുടെ സമരം ഒത്തുതീര്പ്പാക്കാന് സര്ക്കാര് അടിയന്തരമായി ഇടപെടണമെന്ന് പ്രതിപക്ഷ നേതാവ് വിഡി സതീശന് ആവശ്യപ്പെട്ടു. സമരം രോഗികളെ ബുദ്ധിമുട്ടിലാക്കുകയും മെഡിക്കല് കോളേജുകളുടെ പ്രവര്ത്തനത്തെ സാരമായി ബാധിക്കുകയും ചെയ്യും. വിഷയത്തില് സര്ക്കാര് തികഞ്ഞ നിസംഗതയാണ് കാണിക്കുന്നത്. സമരം പ്രഖ്യാപിച്ച ഡോക്ടര്മാരോട് സര്ക്കാര് പ്രതികാര നടപടി സ്വീകരിക്കുന്നതായി പരാതിയുണ്ട്. സമര രംഗത്തുള്ള ഗര്ഭിണികളായ പെണ്കുട്ടികള് ഉള്പ്പെടെയുള്ളവരോട് ഹോസ്റ്റല് ഒഴിയണമെന്ന സര്ക്കാര് നിലപാട് സമരം ഒത്തുതീര്പ്പാക്കുന്നതിന് സഹായകരമല്ല. പി.ജി. ഡോക്ടര്മാരുടെ ന്യായമായ ആവശ്യങ്ങള് അംഗീകരിക്കാന് സര്ക്കാര് തയാറാകണം.
നാല് മാസം മുമ്പ് സൂചനാ സമരം നടത്തിയപ്പോള് ആരോഗ്യമന്ത്രി നല്കിയ പല വാഗ്ദാനങ്ങളും നടപ്പാകാത്തതിനെ തുടര്ന്നാണ് സമരരംഗത്തേക്ക് ഇറങ്ങേണ്ടി വന്നതെന്ന് പി.ജി ഡോക്ടര്മാര് പറയുന്നു.സുപ്രീംകോടതി ഉത്തരവിനെത്തുടര്ന്ന് നീറ്റ് പിജി പ്രവേശനം അനിശ്ചിതമായി നീളുന്ന സാഹചര്യത്തില് ഡോക്ടര്മാരുടെ കുറവും അമിതജോലിഭാരവും പിജി ഡോക്ടര്മാരെ കാര്യമായി ബാധിക്കുന്നുണ്ട്. കോവിഡ് കാരണം വൈകി നടന്ന പരീഷയുടെ ഫലം വരാത്തതിനാല് മൂന്ന് ബാച്ച് പി.ജി. ഡോക്ടര്മാര് ജോലി ചെയ്യേണ്ടിടത്ത് രണ്ട് ബാച്ച് ഡോക്ടര്മാരുടെ സേവനം മാത്രമാണ് നിലവില് ലഭിക്കുന്നത്. ഇത് ആത്യന്തികമായി ബാധിക്കുന്നത് പാവപ്പെട്ട രോഗികളെയാണെന്നതിനാല് സമരം ഒത്തുതീര്പ്പാക്കാന് സര്ക്കാര് അടിയന്തര ഇടപെടല് നടത്തണമെന്നും പ്രതിപക്ഷ നേതാവ് ആവശ്യപ്പെട്ടു.
Click it and Unblock the Notifications
Sign in with Google