അ‌ഞ്ച് വർഷത്തിനിടെ 60 പേർ പീഡിപ്പിച്ചു; 18കാരിയുടെ വെളിപ്പെടുത്തൽ, 5 പേർ അറസ്റ്റിൽ

പത്തനംതിട്ട: 18 കാരിയായ വിദ്യാർത്ഥിനിയെ കഴിഞ്ഞ അഞ്ച് വർഷത്തിനിടെ അറുപതിലേറെ പേർ ലൈം​ഗിക ചൂഷണത്തിന് ഇരയാക്കിയതായി പരാതി. സി ഡബ്ല്യു സി ക്ക് നൽകിയ പരാതിയിലാണ് വെളിപ്പെടുത്തൽ. പെൺകുട്ടി നടത്തിയ വെളിപ്പെടുത്തലിന്റെ അടിസ്ഥാനത്തിൽ ഇലവുംതിട്ട പോലീസ് സ്റ്റേഷനിൽ 40 പ്രതികൾക്കെതിരെ പോക്സോ കേസ് രജിസ്റ്റർ ചെയ്തു. സംഭവത്തിൽ രണ്ട് കേസുകളിലായി 5 പേരെ അറസ്റ്റ് ചെയ്തു.

പെൺകുട്ടിക്ക് 13 വയസ്സുള്ളപ്പോൾ മുതൽ കഴിഞ്ഞ 5 വർഷത്തിനിടെ 60ലേറെ പ്രതികൾ ലൈം​ഗിക ചൂഷണത്തിന് ഇരയാക്കിയെന്നാണ് വിവരം. ചൂഷണത്തിന് ഇരയായ കാര്യം പെൺകുട്ടി വെളിപ്പെടുത്താൻ തയ്യാറായതോടെയാണ് പോലീസ് കേസ് രജിസ്റ്റർ ചെയ്തത്.

ഗ്രാമീണ മേഖലകളിലെ സ്ത്രീ ശാക്തീകരണത്തിനായി പ്രവർത്തിക്കുന്ന മഹിളാ സമഖ്യ പദ്ധതി പ്രവർത്തകരോടാണ് പെൺകുട്ടി പ്രശ്നങ്ങൾ സൂചിപ്പിച്ചത്. ​ഗൗരവം മനസ്സിലാക്കിയ പ്രവർത്തകർ ശിശു ക്ഷേമ സമിതിയെ അറിയിച്ചു. പെൺകുട്ടിയുടെ മാതാവും ഹാജരായി.

കുട്ടിക്ക് 13 വയസ്സുള്ള സമയത്ത് സുഹൃത്താണ് ആദ്യം പീഡിപ്പിച്ചത്. പിന്നീട് ഇയാളുടെ സുഹൃത്തുക്കൾ ദുരുപയോ​ഗം ചെയ്തു. പ്രായപൂർത്തിയാകും മുൻപ് കുട്ടിയുടെ ന​ഗ്നചിത്രങ്ങൾ പ്രതികളിൽ ചിലർ കൈവശപ്പെടുത്തി. കുട്ടിയെ കൗൺസിലിം​ഗിന് വിധേയമാക്കി. 62 പ്രതികളുടെ പേര് കുട്ടി വെളിപ്പെടുത്തിയതായാണ് സൂചന. ഉന്നത പോലീസ് അധികൃതരുടെ മേൽനോട്ടത്തിൽ എസ് എച്ച് ഒ മാരുടെ നേതൃത്വത്തിൽ വിവിധ സ്റ്റേഷനുകളിൽ കേസ് അന്വേഷിക്കും.