വരാക്കര ആത്മഹത്യ, പെണ്കുട്ടിയുടെ സഹപാഠി അറസ്റ്റില്, സഹപാഠിയുമായി പ്രണയമില്ലെന്ന് പോലീസ്?
തൃശൂര്: വരാക്കരയില് മൂന്നംഗ കുടുംബം ആത്മഹത്യ ചെയ്ത സംഭവത്തില് മരിച്ച പെണ്കുട്ടിയുടെ സഹപാഠി അറസ്റ്റില്. ആത്മഹത്യാ പ്രേരണക്കുറ്റം ചുമത്തിയാണ് അത്താണി സ്വദേശിയായ അനന്തുവിനെ പൊലീസ് അറസ്റ്റ് ചെയ്തത്. പെണ്കുട്ടിയുടേയും കുടുംബത്തിന്റേയും ആത്മഹത്യയ്ക്ക് ശേഷം അനന്തു ഒളിവിലായിരുന്നു.
പെണ്കുട്ടിയുമായി പ്രണയത്തിലാണെന്ന് അവകാശപ്പെട്ട് അനന്തു പെണ്കുട്ടിയുടെ പ്രതിശ്രുതവരന് ചിത്രങ്ങള് അയച്ച് നല്കിയതോടെയാണ് വിവാഹം മുടങ്ങിയത്. ഈ മനോവിഷമത്തിലാണ് കുടുംബം ആത്മഹത്യ ചെയ്യുന്നത്. പെണ്കുട്ടിയുടെ ഡയറി പരിശോധിച്ചതില് നിന്നും യുവാവുമായി പ്രണയബന്ധത്തിലായിരുന്നില്ലെന്ന നിഗമനത്തിലാണ് പൊലീസ് എത്തിച്ചേരുന്നത്.
വരാക്കര തൂപ്രത്ത് വീട്ടില് ബാബുവും ഭാര്യ സവിതയും മകള് ശില്പ്പയുമാണ് കഴിഞ്ഞ ദിവസം വിഷം കഴിച്ച് മരിച്ചത്. എംകോമിന് ശില്പ്പയുടെ സഹപാഠിയായിരുന്നു അനന്തു. ഗ്രൂപ്പ് ഫോട്ടോയില് നിന്നെടുത്ത ശില്പയുടെ ചിത്രം തന്റെ ചിത്രത്തിനൊപ്പം ചേര്ത്ത് പ്രണയഫോട്ടോയെന്ന് അവകാശപ്പെട്ടാണ് അനന്തു അയച്ചത്.
പ്രതിശ്രുതവരനേയും പൊലീസ് ചോദ്യം ചെയ്തിരുന്നു. വിവാഹവുമായി മുന്നോട്ട് പോയാല് കൂടുതല് ചിത്രങ്ങള് പ്രചരിപ്പിയ്ക്കുമെന്ന് അനന്തു ഭീഷണിപ്പെടുത്തിയതായും പ്രതിശ്രുത വരന് മൊഴി നല്കി.