പിസി ജോര്ജ് ഉപകരണം മാത്രം, പിന്നില് സംഘപരിവാര് നേതാക്കള്: വിഡി സതീശന്
തിരുവനന്തപുരം: മുന് എം എല് എ പി സി ജോര്ജിന്റെ വിദ്വേഷ പ്രസംഗത്തിന് പിന്നില് സംഘപരിവാര് ഗൂഢാലോചനയാണെന്ന് പ്രതിപക്ഷ നേതാവ് വി ഡി സതീശന്. പി സി ജോര്ജ് ഒരു ഉപകരണം മാത്രമാണ് എന്നും ജോര്ജിന്റെ പിന്നില് സംഘപരിവാര് നേതാക്കളുണ്ട് എന്നും വി ഡി സതീശന് ആരോപിച്ചു. കസ്റ്റഡിയില് എടുത്ത ജോര്ജിനെ സ്വീകരിക്കാന് ബി ജെ പി പ്രവര്ത്തകര്ക്ക് സൗകര്യം ഒരുക്കിയത് ദൗര്ഭാഗ്യകരമാണെന്നും അദ്ദേഹം കൂട്ടിച്ചേര്ത്തു.
പി സി ജോര്ജിന്റെ വിദ്വേഷ പ്രസംഗത്തിനെതിരെ യൂത്ത് കോണ്ഗ്രസും യൂത്ത് ലീഗും പരാതി നല്കിയിരുന്നു എന്ന് അദ്ദേഹം ചൂണ്ടിക്കാട്ടി. എന്നാല് പ്രസംഗം നടത്തി 24 മണിക്കൂറിന് ശേഷമാണ് എഫ് ഐ ആര് ഇടാന് പോലും പൊലീസ് തയാറായത് എന്നും അദ്ദേഹം പറഞ്ഞു. കസ്റ്റഡിയില് എടുത്തതിന് ശേഷം പി സി ജോര്ജിനെ സ്വന്തം വാഹനത്തില് ആഘോഷപൂര്വമാണ് തിരുവനന്തപുരത്ത് എത്തിച്ചത് എന്നും അദ്ദേഹം പരിഹസിച്ചു.
വഴിയരികില് കാത്ത് നില്ക്കുന്ന സംഘപരിവാര് പ്രവര്ത്തകര്ക്ക് അഭിവാദ്യം അര്പ്പിക്കാനും പൊലീസ് സൗകര്യം ചെയ്തു കൊടുത്തു എന്നും ഇത് അങ്ങേയറ്റം ദൗര്ഭാഗ്യകരമായ സംഭവമാണെന്നും അദ്ദേഹം അഭിപ്രായപ്പെട്ടു. വെള്ളത്തിന് തീപിടിപ്പിക്കുന്ന വര്ത്തമാനം പറഞ്ഞ്, വിദ്വേഷത്തിന്റെ കാമ്പയിന് നടത്തുകയാണ് പി സി ജോര്ജെന്ന് വി ഡി സതീശന് വ്യക്തമാക്കി.
കേരളത്തിന്റെ രാഷ്ട്രീയ സാമൂഹിക ഇടങ്ങളില് സ്ഥാനം നഷ്ടപ്പെട്ട സംഘപരിവാര് ശക്തികള് ഇടം ഉണ്ടാക്കാനുള്ള ശ്രമമാണ് പി സി ജോര്ജിലൂടെ നടത്തുന്നത്. ന്യൂനപക്ഷ വര്ഗീയ ശക്തികളും ഇതേ നിലപാടാണ് സ്വീകരിക്കുന്നത് എന്നും രണ്ട് കൂട്ടരും പരസ്പരം സഹായിക്കുന്നു എന്നും അദ്ദേഹം പറഞ്ഞു. മുഖ്യമന്ത്രി പിണറായി വിജയനും സി പി ഐ എമ്മും സ്വീകരിച്ച വര്ഗീയ പ്രീണന നയത്തിന്റെ ഭവിഷ്യത്താണിതെന്നും അദ്ദേഹം പറഞ്ഞു.
Recommended Video
വോട്ട് ബാങ്ക് രാഷ്ട്രീയത്തിന് വേണ്ടി വര്ഗീയ ശക്തികളുടെ തോളില് കയ്യിടാതെ മുഖ്യധാരാ രാഷ്ട്രീയ കക്ഷികള് നിലപാടെടുക്കാന് തയാറാകണം എന്നും വി ഡി സതീശന് ആവശ്യപ്പെട്ടു. ഹിന്ദു മഹാസമ്മേളനം എന്ന പേരില് ഹൈന്ദവ വിശ്വാസത്തിന്ന് വിരുദ്ധമായ കാര്യങ്ങളാണ് നടക്കുന്നത് എന്നും അദ്ദേഹം പറഞ്ഞു. ലോകം മുഴുവന് തറവാടായി കാണുന്നതാണ് ഹിന്ദു മത വിശ്വാസം എന്നും സാധാരണക്കാര്ക്കിടയില് മതത്തിന്റെ പേരില് മതില്ക്കെട്ടുകള് തീര്ക്കാനുള്ള ശ്രമത്തെ യു ഡി എഫ് ചെറുത്തു തോല്പ്പിക്കുമെന്നും സതീശന് പറഞ്ഞു.
വിദ്വേഷവും വെറുപ്പും പ്രചരിപ്പിക്കുന്നതല്ല അഭിപ്രായ സ്വാതന്ത്യം എന്ന് ബി ജെ പി സംസ്ഥാന അധ്യക്ഷന് കെ സുരേന്ദ്രന് മറുപടിയെന്നോണം വി ഡി സതീശന് പറഞ്ഞു. ഭരണഘടന നല്കുന്ന അഭിപ്രായ സ്വാതന്ത്യത്തിന് പരിമിതികളുണ്ടെന്നും പി സി ജോര്ജിന്റെ വാക്കുകളെ ന്യയികരിക്കുന്നവരാണ് വിദ്വേഷ കാമ്പയിന്റെ പിറകില് ചരട് വലിക്കുന്നത് എന്നും അദ്ദേഹം പറഞ്ഞു.
എന്റമ്മോ...ഒരു രക്ഷയുമില്ല; കലക്കന് ചിത്രങ്ങളുമായി പ്രിയങ്ക