'അവർക്കെതിരെ സംസ്ഥാന സർക്കാരിനൊപ്പം നിൽക്കാൻ തയ്യാർ..'; നിലപാട് വ്യക്തമാക്കി പികെ കുഞ്ഞാലിക്കുട്ടി

Updated: Friday, December 15, 2023, 12:09 [IST]

മലപ്പുറം: കേന്ദ്ര സര്‍ക്കാരിന്റെ അവഗണനയ്ക്കും, ജനദ്രോഹ നയങ്ങൾക്കുമെതിരെ കേരളത്തിലെ ഭരണപക്ഷവുമായി ചേർന്ന് പ്രവർത്തിക്കാൻ തയ്യാറാണെന്ന് മുസ്ലീം ലീഗ് ദേശീയ ജനറൽ സെക്രട്ടറി പികെ കുഞ്ഞാലിക്കുട്ടി. ഇക്കാര്യത്തിൽ ഭരണപക്ഷവും പ്രതിപക്ഷവും ഒന്നിച്ചുനില്‍ക്കണമെന്നും കുഞ്ഞാലിക്കുട്ടി ആവശ്യപ്പെട്ടു. ട്വന്റി ഫോർ ന്യൂസ് ചാനലിന് നൽകിയ പ്രത്യേക അഭിമുഖത്തിലാണ് മുൻ മന്ത്രി കൂടിയായി പികെ കുഞ്ഞാലിക്കുട്ടിയുടെ പരാമർശം.

കേരളത്തിന്റെ വിഹിതം കേന്ദ്രം തന്നേ പറ്റൂവെന്നും, അതിന് വേണ്ടി ഇവിടുത്തെ സര്‍വകക്ഷികളും ഒന്നിച്ചുനില്‍ക്കണമെന്നും കുഞ്ഞാലിക്കുട്ടി പറഞ്ഞു. കേരളത്തിന്റെ അവകാശങ്ങള്‍ക്ക് വേണ്ടി ശബ്‌ദിക്കാന്‍ ഞങ്ങള്‍ തയ്യാറാണ്. സംസ്ഥാനത്തെ ഗവര്‍ണർ അന്തസ്സ് പുലര്‍ത്തുന്നില്ലെന്നും, അദ്ദേഹം പച്ചയ്ക്ക് രാഷ്ട്രീയം പറയുകയാണെന്നും കുഞ്ഞാലിക്കുട്ടി വിമർശിച്ചു. ഗവർണർക്ക് എതിരായ എസ്എഫ്ഐ പ്രതിഷേധവും, അതിനെ നേരിട്ട ഗവർണറുടെ രീതിയും നേരത്തെ വിവാദങ്ങൾക്ക് വഴിവെച്ചിരുന്നു.

ഗവര്‍ണറെ എല്ലാ കാര്യങ്ങളിലും പ്രതിപക്ഷം അനുകൂലിക്കുന്നില്ലെന്ന സൂചനയാണ് കുഞ്ഞാലിക്കുട്ടിയുടെ വാക്കുകളിൽ നിന്ന് വ്യക്തമാകുന്നത്. പദവി നോക്കാതെ ഓരോന്ന് വിളിച്ചുപറയുന്നതും ബില്ലുകളില്‍ ഒപ്പിടാതിരിക്കുന്നതും പച്ചയ്ക്ക് രാഷ്ട്രീയം പറയുന്നതും ശരിയാണോ എന്ന് സ്വയം ആലോചിക്കണം. കൂടാതെ ഗവര്‍ണര്‍ വിഷയത്തില്‍ സര്‍ക്കാരിന്റെ ഭാഗത്ത് വീഴ്‌ചയുണ്ടായിട്ടുണ്ടെന്നും അദ്ദേഹം കുറ്റപ്പെടുത്തി.

കേന്ദ്രം കേരളത്തിന് ഫണ്ട് നല്‍കണമെന്നാണ് തങ്ങളുടെ നിലപാടെന്ന് പികെ കുഞ്ഞാലിക്കുട്ടി വ്യക്തമാക്കി. കേന്ദ്ര നിലപാടിനെതിരെ യോജിച്ച നീക്കത്തിന് സര്‍ക്കാര്‍ തയ്യാറായാല്‍ പ്രതിപക്ഷവും അതിനെ പിന്തുണയ്ക്കും. കേരളത്തിന് അര്‍ഹതപ്പെട്ടത് കിട്ടാതിരുന്നാല്‍ ജനങ്ങളാണ് അതിന്റെ ബുദ്ധിമുട്ട് അനുഭവിക്കുകയെന്നും അദ്ദേഹം ചൂണ്ടിക്കാട്ടി.

അതേസമയം, സംസ്ഥാന സർക്കാരിനെതിരെ ഗവർണർ വിഷയത്തിൽ ഉൾപ്പെടെ വിമർശനം ശക്തമാക്കുന്ന കോൺഗ്രസിന്റെ നിലപാടിൽ നിന്ന് വിഭിന്നമായാണ് കുഞ്ഞാലിക്കുട്ടിയുടെ ഇപ്പോഴത്തെ പ്രതികരണം എന്നതാണ് ശ്രദ്ധേയം. പലസ്‌തീൻ ഐക്യദാർഢ്യ റാലിയിൽ ഉൾപ്പെടെ അവസാന നിമിഷം വരെ സിപിഎമ്മിനോടും സർക്കാരിനോടും മൃദസമീപനം വച്ചുപുലർത്തിയ ലീഗ് ഒടുവിൽ കോൺഗ്രസിന്റെ സമ്മർദ്ദത്തിന് വഴങ്ങുകയായിരുന്നു.

എന്നാൽ കേന്ദ്ര സർക്കാരിനെതിരായ യോജിച്ച നീക്കത്തിന് പ്രതിപക്ഷത്തെ വലിയൊരു കക്ഷി തന്നെ ആഹ്വാനം ചെയ്‌തതോടെ സർക്കാരിന് കിട്ടുന്ന ആശ്വാസം ചെറുതല്ല. സംസ്ഥാനത്തിന്റെ സാമ്പത്തിക പ്രതിസന്ധിക്ക് കേന്ദ്ര സർക്കാരാണ് കാരണമെന്ന നിരന്തര ആരോപണങ്ങൾ ഉയർത്തുന്ന എൽഡിഎഫ് സർക്കാരിന് കുഞ്ഞാലിക്കുട്ടിയുടെ ഏറ്റവും പുതിയ നിലപാട് ഗുണമാവുമെന്ന് ഉറപ്പാണ്.