ഭക്ഷ്യവിഷബാധയേറ്റ് നഴ്സ് മരിച്ച സംഭവം; ഹോട്ടല് അടിച്ചു തകര്ത്ത് ഡിവൈഎഫ്ഐ പ്രവര്ത്തകര്
കോട്ടയം: ഭക്ഷ്യവിഷബാധയേറ്റ് കോട്ടയം മെഡിക്കല് കോളേജിലെ നഴ്സ് രശ്മി രാജ് മരിച്ച സംഭവത്തില് ഡി വൈ എഫ് ഐ പ്രവര്ത്തകര് ഹോട്ടല് അടിച്ചുതകര്ത്ത് പ്രതിഷേധിച്ചു. കോട്ടയം സംക്രാന്തിയിലുള്ള മലപ്പുറം കുഴിമന്തി എന്ന ഹോട്ടലാണ് അടിച്ചുതകര്ത്തത്. ഇവിടേക്ക് പ്രതിഷേധ മാര്ച്ച് നടത്തിയ ഡി വൈ എഫ് ഐ പ്രവര്ത്തകര് സി സി ടി വി ക്യാമറകളും ബോര്ഡും ചെടിച്ചട്ടിയും അടിത്തു തകര്ത്തു.
കഴിഞ്ഞ മാസം 28ന് ആണ് രശ്മി ഈ ഹോട്ടലില് നിന്ന് കുഴിമന്തിയും അല്ഫാമും കഴിച്ചത്. തുടര്ന്ന് ശാരീരിക അസ്വസ്ഥത പ്രകടിപ്പിച്ചതോടെ സ്വകാര്യ ആശുപത്രിയിലും പിന്നീട് കോട്ടയം മെഡിക്കല് കോളേജ് ആശുപത്രിയിലും പ്രവേശിപ്പിക്കുകയായിരുന്നു. ഗുരുതരാവസ്ഥയില് വെന്റിലേറ്ററില് പ്രവേശിപ്പിച്ച രശ്മി ഇന്നലെ രാത്രിയോടെയാണ് മരണത്തിന് കീഴടങ്ങിയത്. ഇതേ ഹോട്ടലില് നിന്ന് ഭക്ഷണം കഴിച്ച 21 പേര്ക്കും ഭക്ഷ്യവിഷബാധയേറ്റിരുന്നു.
പരാതിയിടെ തുടര്ന്ന് ഭക്ഷ്യ സുരക്ഷ വിഭാഗം ഹോട്ടല് അടപ്പിച്ചിരുന്നു. നഴ്സ് മരിച്ച സംഭവത്തിന് പിന്നാലെ ഭക്ഷ്യ സുരക്ഷ വിഭാഗം സംസ്ഥാനത്ത് ഉടനീളം ഹോട്ടലുകളില് പരിശോധന കര്ശനമാക്കിയിരുന്നു. 14 ജില്ലകളിലും വ്യാപകമായി പരിശോധനകള് നടത്താന് ഭക്ഷ്യസുരക്ഷാ കമ്മീഷണര്ക്ക് നിര്ദ്ദേശം നല്കിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു.
അവധി ദിവസങ്ങളുമായി ബന്ധപ്പെട്ട് ഓപ്പറേഷന് ഹോളിഡേ എന്ന പേരില് പ്രത്യേക പരിശോധന ഭക്ഷ്യസുരക്ഷാ വകുപ്പ് നടത്തിയിരുന്നു. അവധി ദിവസങ്ങള്ക്ക് ശേഷം ചില കേസുകള് റിപ്പോര്ട്ട് ചെയ്യുന്ന സാഹചര്യത്തിലാണ് വ്യാപക പരിശോധനയ്ക്ക് വീണ്ടും നിര്ദേശം നല്കിയത്. ലൈസന്സോ രജിസ്ട്രേഷനോ ഇല്ലാത്ത സ്ഥാപനങ്ങള്ക്കെതിരെ നടപടി സ്വീകരിക്കും. ലൈസന്സ് ഉണ്ടെങ്കിലും ശുചിത്വമില്ലാത്തതോ മായം കലര്ന്നതോ വൃത്തിഹീനമായ അന്തരീക്ഷത്തില് പാകം ചെയ്യുന്നതോ കാലപ്പഴക്കമുള്ളതോ ആയ ഭക്ഷണം നല്കുന്ന സ്ഥാപനങ്ങള്ക്കെതിരെ കര്ശന നടപടികള് സ്വീകരിക്കുമെന്നും മന്ത്രി വ്യക്തമാക്കി.
ഭക്ഷണത്തില് മായം കലര്ത്തുന്നതും കാലപ്പഴക്കമുള്ള ഭക്ഷണം നല്കുന്നതും ക്രിമിനല് കുറ്റമാണ്. ഇത് സംബന്ധിച്ച് കര്ശനമായ നടപടികള് സര്ക്കാര് സ്വീകരിച്ചുവരുന്നു. ഏതെങ്കിലും തരത്തില് ഇത്തരത്തിലുള്ള മായം കലര്ത്തിയ ഭക്ഷണമോ കാലപ്പഴക്കമുള്ള ഭക്ഷണമോ പിടിക്കപ്പെട്ടാല് ആ സ്ഥാപനത്തിന്റെ ലൈസന്സ് ഉള്പ്പെടെ റദ്ദാക്കുന്നതിനുള്ള നടപടികള് സ്വീകരിക്കും. ലൈസന്സ് റദ്ദാക്കപ്പെട്ടാല് അത് പിന്നീട് വീണ്ടും കിട്ടുക എന്നുള്ളത് വലിയ പ്രയാസമുള്ള കാര്യമായിരിക്കും. മുഖം നോക്കാതെ നടപടി സ്വീകരിക്കണമെന്ന് കര്ശനമായ നിര്ദ്ദേശമാണ് നല്കിയിട്ടുള്ളത്.
ആളുകളുടെ ആരോഗ്യത്തെയും ജീവനെയും ഗുരുതരമായി ബാധിക്കുന്ന ഒരു വിഷയമാണിത്. ഇക്കാര്യത്തില് എല്ലാ സ്ഥാപനങ്ങളുടെ ഭാഗത്ത് നിന്നും പ്രത്യേകിച്ച് ആഹാരം തയ്യാറാക്കുന്നവരുടെയും വിതരണം ചെയ്യുന്നവരുടെയും ഭാഗത്തുനിന്നും വളരെ കൃത്യമായ ബോധ്യത്തോടെയുള്ള ഇടപെടല് ഉണ്ടാകണം. ഒരു ഫുഡ് സേഫ്റ്റി ഉദ്യോഗസ്ഥന്റെ അധികാരപരിധിയിലുള്ള സ്ഥാപനങ്ങള്ക്ക് ലൈസന്സോ രജിസ്ട്രേഷനോ ഉണ്ടോ എന്നുള്ളതും പരാതികളില്മേല് കൃത്യമായി പെട്ടെന്നുള്ള നടപടികള് സ്വീകരിക്കുന്നു എന്നുള്ളതും ഉറപ്പാക്കേണ്ടതാണ്.
പൊതുജനങ്ങള്ക്ക് ഇത് സംബന്ധിച്ചിട്ടുള്ള പരാതികള് അറിയിക്കുന്നതിന് ഭക്ഷ്യ സുരക്ഷാ വകുപ്പിന്റെ പോര്ട്ടല് തയ്യാറാക്കി വരുന്നു. പൊതുജനങ്ങള്ക്ക് ഫോട്ടോയും വീഡിയോയും അപ് ലോഡ് ചെയ്യാനുള്ള സൗകര്യം ഇതിലുണ്ടാകും. ഓരോ പരാതിയില്മേലും പെട്ടെന്ന് തന്നെ നടപടികള് സ്വീകരിക്കുന്നുണ്ടെന്ന് ഉറപ്പാക്കാന് നിര്ദേശം നല്കിയിട്ടുണ്ടെന്നും മന്ത്രി വ്യക്തമാക്കി.
Click it and Unblock the Notifications
Sign in with Google