പാലത്തിലെ വിള്ളലടക്കാന്‍ ബലികൊടുക്കേണ്ടി വന്നത് ഒരു ജീവന്‍; കരാറുകാരോട് പറഞ്ഞിട്ടും നന്നാക്കിയില്ല

കോട്ടയം: എംസി റോഡിലെ നീലിമംഗലം പാലത്തിലെ വിള്ളല്‍ അടക്കാന്‍ അധികൃതര്‍ തയ്യാറായത് ഒരാളുടെ മരണത്തിന് ശേഷം. കഴിഞ്ഞ ദിവസമാണ് പാലത്തിലെ സ്ലാബിന്റെ വിള്ളലില്‍ ചാടാതിരിക്കാന്‍ ഓട്ടോ വെട്ടിച്ചത് വെട്ടിച്ച ഓട്ടോറിക്ഷ അപകടത്തില്‍പെട്ട് ഡ്രൈവര്‍ മരണപ്പെടുകയായിരുന്നു. നാളുകളായി ഇവിടത്തെ സ്ലാബുകള്‍ ചേരുന്ന ഭാഗത്ത് കോണ്‍ക്രീറ്റ് ഇളകി വള്ളലുകള്‍ വീണിട്ട്. നന്നാക്കുന്നതിനായി കരാറുകരനോട് നിര്‍ദ്ദേശിച്ചിരുന്നുവെങ്കിലും നന്നാക്കിയില്ലെന്നാണ് അധികൃതര്‍ പറഞ്ഞത്. പിന്നീട് അപകടം നടന്ന ദിവസം വൈകിട്ടുതന്നെ സിമന്റും മണലും ഉപയോഗിച്ച് അറ്റകുറ്റപ്പണി കരാറുകാര്‍ നടത്തിയിരുന്നു. ഇന്നലെ അപകടനില പൂര്‍ണമായും മാറ്റിയെന്നും അധികൃതര്‍ പറഞ്ഞു. കെഎസ്ടിപിയാണ് എംസി റോഡ് നവീകരണത്തിന്റെ ഭാഗമായി പാലം നിര്‍മാണം പൂര്‍ത്തിയാക്കിയിരുന്നത്. ഇന്നും നാളെയും ഗതാഗതം പഴയപാലം വഴിയായിരിക്കും. പുതിയ പാലം തുറന്നാലും ചെറിയ വാഹനങ്ങള്‍ പഴയ പാലം വിടണമെന്ന ആലോചനയിലാണ് അധികൃതര്‍.

പാലത്തിന്റെ അപകടാവസ്ഥ പൂര്‍ണമായും മാറ്റുംമെന്നും കോണ്‍ക്രീറ്റ്, വെല്‍ഡിങ് ജോലികളാണ് ഇനി ബാക്കിയുള്ളതെന്നും ഗതാഗതത്തിനു തടസ്സം വരാത്ത രീതിയിലാണ് പണി നടത്തുന്നതെന്നും പ്രധാന വഴികളിലെ പാലങ്ങളുടെ സമീപന പാതകള്‍ അപകടത്തിലാണോയെന്നു പരിശോധിക്കുമെന്നും അധികൃതര്‍ പറഞ്ഞു. കളത്തിപ്പടി ജംഗ്ഷനിലെ കുഴിയടക്കാത്തതിലും നാട്ടുകാരില്‍ പ്രതിഷേധം ഉയരുന്നുണ്ട്.
2 ആഴ്ചയ്ക്കിടെ 5 ഇരുചക്രവാഹന യാത്രക്കാരാണ് ഇവിടെ അപകടത്തില്‍പെട്ടത്. കുടിവെള്ള പൈപ്പ് പൊട്ടി വെള്ളം ഒഴുകുന്നതാണ് കുഴി ഉണ്ടാവാന്‍ കാരണമെന്ന് പൊതുമരാമത്ത് വകുപ്പ് ഉദ്യോഗസ്ഥര്‍ പറയുന്നത്. വാട്ടര്‍ അതോറിറ്റിയുടെ പൈപ്പ് മാറ്റി സ്ഥാപിക്കണമെന്ന് അധികൃതരോട് ആവശ്യപ്പെട്ടിട്ടുണ്ട്. ഇത് മാറ്റി സ്ഥാപിക്കാതെ കുഴി അടക്കാന്‍ കഴിയില്ലെന്നാണ് അധികൃതര്‍ പറയുന്നത്. അതേസമയം പൂവത്തുംമൂട് പാലത്തിന് സമീപത്തെ കുഴികള്‍ അടയ്ക്കാന്‍ തീരുമാനമായിട്ടുണ്ടെന്നും നാളെ പണി ആരംഭിക്കുമെന്നും പൊതുമരാമത്ത് വകുപ്പ് അറിയിച്ചിട്ടുണ്ട്.

കണ്ണൂരിലെ കൊയ്യം വളക്കൈ റോഡിനും ഭരണാനുമതി നല്‍കിയതായി ഇന്നലെ പൊതുമരാമത്ത് വകുപ്പ് അറിയിച്ചിരുന്നു. ഏറെ നാളത്തെ പ്രതിഷേധങ്ങള്‍ക്കൊടുവിലാണ് വളക്കൈ കൊയ്യം റോഡിന് ഭരണാനുമതി നല്‍കിയത്. രണ്ട് വട്ടം കാളവണ്ടി സമരമുള്‍പ്പെടെ നടത്തിയിരുന്നു. അവസാനം കേരളപ്പിറവി ദിനത്തില്‍ കണ്ണൂര്‍ പിഡബ്ല്യുഡി ഓഫീസിലേക്ക് നടത്തിയ കാളവണ്ടി സമരമാണ് വിജയിച്ചത്. ഇതിലൂടെയാണ് റോഡിന് ഭരണാനുമതി ലഭിച്ചത്. കണ്ണൂരിലെ മലയോര ഭാഗങ്ങളെ എയര്‍പോര്‍ട്ടുമായി ബന്ധിപ്പിക്കുന്ന പ്രധാന റോഡാണിത്. ഇവിടത്തെ ജനങ്ങളുടെ ഏറെ നാളത്തെ ആവശ്യമായിരുന്നു ഈ റോഡിന്റെ നവീകരണം. മെക്കാര്‍ഡം ടാര്‍ ചെയ്ത് നവീകരിക്കണമെന്നായിരുന്നു ഇവരുടെ ആവശ്യം.

English summary

public work department renovate neelimangalam bridge in kottayam after one man death