കോഴിക്കോട്ടെ നിപ പ്രതിരോധം വിജയകരമെന്ന് ആരോഗ്യമന്ത്രി; 21 ദിവസങ്ങള്ക്കുള്ളില് പുതിയ കേസുകളില്ല
കോഴിക്കോട്: സംസ്ഥാനത്തെ നിപ പ്രതിരോധം വിജയകരമെന്ന് ആരോഗ്യ വകുപ്പ് മന്ത്രി വീണ ജോര്ജ്. നിപ വൈറസിന്റെ ഇന്ക്യുബേഷന് കാലയളവായ 21 ദിവസം കഴിഞ്ഞു. ഈ കാലയളവില് ഒരു പുതിയ കേസ് പോലും റിപ്പോര്ട്ട് ചെയ്തിട്ടില്ല. ചിട്ടയായ പ്രവര്ത്തനമാണ് രോഗത്തെ പിടിച്ചു നിര്ത്തുന്നതിനും പുതിയ കേസുകള് ഉണ്ടാവാനുള്ള സാഹചര്യം ഒഴിവാക്കാനും സഹായകമായത്. ഇന്കുബേഷന് കാലയളവിന്റെ ഇരട്ടി ദിവസം (42 ദിവസം) പുതിയ കേസുകള് റിപ്പോര്ട്ട് ചെയ്യപ്പെടാതിരുന്നാല് രോഗം നിയന്ത്രണത്തില് വന്നതായി പ്രഖ്യാപിക്കും. ഈ ദിവസങ്ങളില് ജാഗ്രത തുടരുകയും ചെയ്യണമെന്നും മന്ത്രി ആവശ്യപ്പെട്ടു.
നിപ ബാധിച്ച് മരിച്ച കോഴിക്കോട് സ്വദേശിയായ ആണ്കുട്ടിയുടെ സമ്പര്ക്ക പട്ടികയിലുളള ആര്ക്കും രോഗബാധ ഇല്ലെന്ന് നേരത്തെ തന്നെ സ്ഥിരീകരിച്ചിരുന്നു. സെപ്റ്റംബര് 5 ഞായറാഴ്ച പുലര്ച്ചെയോടെയാണ് പന്ത്രണ്ട് വയസ്സുകാരന് നിപ ബാധിച്ച് മരണപ്പെട്ടത്. 2018 ന് ശേഷം വിണ്ടും ജില്ലയില് നിപ ബാധ സ്ഥിരീകരിച്ചത് തുടക്കത്തില് വലിയ ആശങ്കയ്ക്ക് ഇടയാക്കിയിരുന്നു. കോഴിക്കോട് ജില്ലയ്ക്ക് പുറമെ മലപ്പുറം, കണ്ണൂര് ജില്ലകളിലും ജാഗ്രതാ നിര്ദേശം പുറപ്പെടുവിച്ചു കൊണ്ടായിരുന്നു സര്ക്കാറിന്റെ പ്രതിരോധ പ്രവര്ത്തനങ്ങള്. സമ്പര്ക്ക പട്ടികയില് ഉള്ളവര് എല്ലാം തന്നെ നെഗറ്റീവായതോടെ നിപ കണ്ടെയ്ന്മെന്റ് വാര്ഡുകളിലെ നിയന്ത്രണങ്ങളില് ഇളവ് വരുത്തുകയും ചെയ്തിരുന്നു.
സെപ്റ്റംബര് 4ന് നിപ റിപ്പോര്ട്ട് ചെയ്തപ്പോള് മുതല് വലിയ പ്രവര്ത്തനങ്ങളാണ് നടത്തിയത്. ഹൗസ് ടു ഹൗസ് സര്വേയുടെ ഭാഗമായി പഞ്ചായത്തുകളുടെ സഹായത്തോടെ 16,732 വീടുകളും 76,074 ആളുകളെയും സന്ദര്ശിച്ചു. 50 പേരുടെ സാമ്പിള് പരിശോധനയ്ക്കയച്ചു. ഇവയുടെയെല്ലാം പരിശോധനാ ഫലം നെഗറ്റീവ് ആയി. നിപ വൈറസ് സ്ഥിരീകരിച്ച പഞ്ചായത്തിന് സമീപ പ്രദേശങ്ങളായ കൊടിയത്തൂര്, താമരശ്ശേരി എന്നിവിടങ്ങളില് നിന്നും ഐ സി എം ആറിന്റെ നിര്ദേശാനുസരണം പൂന എന് ഐ വി സംഘം ശേഖരിച്ച വവ്വാലുകളുടെ പരിശോധന ഫലവും പുറത്ത് വന്നതായി മന്ത്രി അറിയിച്ചു.
ഇതില് താമരശ്ശേരിയില് നിന്നും ശേഖരിച്ച ടീറോപസ് വിഭാഗത്തില്പ്പെട്ട ഒരു വവ്വാലിലും കൊടിയത്തൂര് മേഖലയില് നിന്നും ശേഖരിച്ച റോസിറ്റസ് വിഭാഗത്തില്പ്പെട്ട ചില വവ്വാലുകളിലും നിപ വൈറസിന് എതിരായ ഐജിജി (IgG) ആന്റിബോഡി യുടെ സാന്നിധ്യം സ്ഥിരീകരിച്ചിട്ടുണ്ട്. 50 ഓളം പരിശോധനാ ഫലങ്ങള് ഇനിയും വരാനുണ്ട്. ഈ പശ്ചാത്തലത്തില് കൂടുതല് പഠനങ്ങള് ഇതുമായി ബന്ധപ്പെട്ട് നടത്തണം. അതിന് ശേഷം മാത്രമേ കൂടുതല് സ്ഥിരീകരണങ്ങളിലേക്ക് എത്താന് കഴിയുകയുള്ളൂ. നിപയുടെ പ്രഭവ കേന്ദ്രം ഈ വവ്വാലുകളാണെന്ന് കരുതേണ്ടി വരുമെന്നും മന്ത്രി അറിയിച്ചു.
കോവിഡ് മരണപ്പട്ടിക സംബന്ധിച്ച വിമര്ശനങ്ങള്ക്കും ആരോപണങ്ങള്ക്കും ആരോഗ്യമന്ത്രി വ്യക്തമായ മറുപടി നല്കി. കോവിഡ് മരണപ്പട്ടിക സംബന്ധിച്ച് ആര്ക്കും ആശങ്ക വേണ്ട. കോവിഡ് ബാധിച്ച് 30 ദിവസത്തിനുള്ളില് മരിച്ചവരെ ഉള്ക്കൊള്ളിച്ച് പട്ടിക വിപുലമാക്കും. അര്ഹരായ എല്ലാവര്ക്കും ആനുകൂല്യം ഉറപ്പാക്കും. കേന്ദ്ര സര്ക്കാരിന്റെ മാര്ഗനിര്ദേശമനുസരിച്ച് സംസ്ഥാനം മാര്ഗനിര്ദേശം പുറത്തിറക്കും.
വാക്സിനേഷന് 91 ശതമാനത്തിന് മുകളിലായി. രോഗികളുടെ എണ്ണം കൂടുന്നുണ്ടെങ്കിലും ആശുപത്രിയിലും ഐസിയുവിലും പ്രവേശിപ്പിക്കുന്നവരുടെ എണ്ണം വളരെ കുറവാണ്. കോവിഡ് മരണങ്ങളില് 94 ശതമാനത്തോളം വാക്സിനെടുക്കാത്തവരിലാണ് സംഭവിക്കുന്നത്. അനുബന്ധ രോഗമുള്ളവരിലും മരണം കൂടുതലാണ്. ഏതാണ്ടെല്ലാ കോളേജ് വിദ്യാര്ത്ഥികള്ക്കും അധ്യാപകര്ക്കും ആദ്യ ഡോസ് വാക്സിന് നല്കിക്കഴിഞ്ഞു. അതത് ജില്ലകിളിലെ ജില്ലാ മെഡിക്കല് ഓഫീസര്മാര്ക്ക് ചുമതല നല്കിയിട്ടുണ്ട്. ഇനിയാരെങ്കിലും വാക്സിനെടുക്കാനുണ്ടെങ്കില് ഉടന് ആരോഗ്യ പ്രവര്ത്തകരുമായി ബന്ധപ്പെടണമെന്നും ആരോഗ്യ വകുപ്പ് മന്ത്രി കൂട്ടിച്ചേര്ത്തു.
Click it and Unblock the Notifications
Sign in with Google