'മെഴുക് ഉരുക്കി സ്വകാര്യഭാഗത്ത് ഒഴിച്ചു; ദിവസം 12 വരെ പുരുഷന്‍മാരുമായി ശയിക്കാന്‍ നിര്‍ബന്ധിച്ചു'

Updated: Wednesday, September 2, 2020, 14:43 [IST]

ദില്ലി: പലതരം പീഡനങ്ങള്‍ക്കും അടിച്ചമര്‍ത്തലുകള്‍ക്കും വിധേയമായിട്ടും ധീരമായി പൊരുതി മുന്നോട്ട് വന്ന് മറ്റുള്ളവര്‍ക്ക് പ്രചോദനമാകുന്ന വ്യക്തികളുടെ അനുഭവക്കുറിപ്പ് പങ്കുവെന്ന ഫേസ്ബുക്ക് പേജാണ് ഹ്യൂമന്‍സ് ഓഫ് ബോംബെ. ഇതിനോടകം തന്നെ നിരവധി പേരുടെ ജീവിതങ്ങള്‍ ഈ പേജ് വഴി പുറം ലോകം അറിഞ്ഞു. ഏറ്റവും ഒടുവില്‍, വളരെ ചെറുപ്പം മുതല്‍ തന്നെ ലൈംഗിക തൊഴിലാളിയായി ജീവിക്കേണ്ടി വന്ന ഒരു പെണ്‍കുട്ടിയുടെ യാതനകള്‍ നിറഞ്ഞ ജീവിതമാണ് ഹ്യൂമൻസ് ഓഫ് ബോംബെയുടെ പേജിലൂടെ തുറന്നു കാട്ടുന്നത്. അവരുടെ വാക്കുകള്‍ ഇങ്ങനെ..

അച്ഛന്‍ നഷ്ടമായ ബാല്യം

അച്ഛനെ നഷ്ടപ്പെടുമ്പോള്‍ എനിക്ക് 10 വയസ്സായിരുന്നു. അമ്മ നിത്യരോഗിയും. അച്ഛന്‍ പോയതോടെ അമ്മയുടേയും അനുജത്തിയുടെയും ഉത്തരവാദിത്തം എന്റെ മേൽ വന്നു. അങ്ങനെയാണ് ഞാൻ സ്കൂൾ പഠനം നിര്‍ത്തി കൊൽക്കത്തയിലെ ഒരു ഫാക്ടറിയിൽ ജോലി ചെയ്യാൻ തുടങ്ങി. എന്നാൽ അധികം വൈകാതെ ഫാക്ടറി അടച്ചുപൂട്ടി. രോഗങ്ങളും എന്നെ അലട്ടിയിരുന്നു.

ഉണരുമ്പോള്‍ പൂണൈയില്‍

അങ്ങനെയാണ് എന്നോടൊപ്പം ട്രെയിനിൽ യാത്ര ചെയ്ത കകോലി ബിശ്വാസ് എന്ന സ്ത്രീ എനിക്ക് ഹാൽദിയയിൽ ജോലി വാഗ്ദാനം ചെയ്യുന്നത്. അതോടെ ഞാന്‍ വളരെ സന്തോഷവതിയായി. അങ്ങോട്ടേക്കുള്ള യാത്രാമധ്യേ അവര്‍ എനിക്ക് ചായയും കേക്കും തന്നു. താമസിയാതെ ഞാൻ ബോധരഹിതനായി. ഉണരുമ്പോള്‍ ഞാന്‍ പുണൈയിലായിരുന്നു.

മര്‍ദ്ദനം

എന്നെ മറ്റൊരു വീട്ടിലാക്കിയതിന് ശേഷം അവര്‍ പോയി. മറ്റ് മുപ്പതോളം പെണ്‍കുട്ടികളും അവിടെ ഉണ്ടായിരുന്നു. നിങ്ങളെ ബഡി ദീദിക്ക് വിറ്റെന്ന് അവരാണ് എന്നോട് പറയുന്നതു. ഞാൻ കൂടുതൽ എന്തെങ്കിലും പറയുന്നതിന് മുമ്പ്, ബാഡി ദിദി വന്ന് നിങ്ങൾ ഇവിടെ വരുന്ന എല്ലാ ആൺകുട്ടികളോടും കിടപ്പറ പങ്കിടണമെന്ന് പറഞ്ഞു. ഞാന്‍ എതിര്‍ത്തതോടെ അവര്‍ എന്നെ ഇരുമ്പ് വടി ഉപോയിഗിച്ച് അടിക്കുകയും പൂട്ടിയിടുകയും ചെയ്തു.

പല്ലുകള്‍ നഷ്ടപ്പെട്ടു

എന്റെ സ്വകാര്യഭാഗങ്ങളിൽ ചൂടുള്ള മെഴുക് ഉരുക്കിയൊഴിച്ചു പൊള്ളിച്ചു. ജനാലയിലൂടെ എന്നെ പുറത്തേക്ക് എറിയമെന്ന് ഭീഷണിപ്പെടുത്തി. ഒരിക്കല്‍ എന്നെ തള്ളിയിടുകയും ചെയ്തു. ഉയരത്തില്‍ നിന്നും താഴേക്ക് പതിച്ച എന്‍റെ പല്ലുകള്‍ നഷ്ടപ്പെട്ടു. ഞാൻ എന്റെ ശരീരം വിൽക്കാൻ തയാറാകുന്നതു വരെ രണ്ട് മാസത്തോളം ക്രൂര പീഡനം തുടർന്നു.

പന്ത്രണ്ട് വരെ

ഒടുവില്‍ അവരുടെ മര്‍ദ്ദനങ്ങള്‍ക്ക് എനിക്ക് വഴങ്ങേണ്ടി വന്നു. രാവിലെ 7 മുതല്‍ രാത്രി 11 വരെയായി ദിവസം പത്ത് മുതല്‍ പന്ത്രണ്ട് വരെ പുരുഷന്‍മാരുമായി കിടക്ക പങ്കിടേണ്ടി വന്നു. എന്‍റെ ശരീരം വല്ലാതെ വേദനിച്ചു. രാത്രികളില്‍ അമ്മയെ അമ്മയെ ഓര്‍ത്ത് കരഞ്ഞു. രക്ഷപ്പെടാൻ പല ശ്രമങ്ങളും ഞാൻ നടത്തിയെങ്കിലും മുന്‍ ഗേറ്റില്‍ ശക്തമായ കാവൽ ഉണ്ടായതിനാൽ പലതും പരാജയപ്പെട്ടു.

ആ സാഹചര്യത്തിലും

ഒരിക്കല്‍ എന്റെ അടുക്കൽ വന്നയാളിന്റെ ഫോൺ ഉപയോഗിച്ച് ബന്ധുവിനെ വിളിച്ച് രക്ഷപ്പെടാനുള്ള ശ്രമം പിടിക്കപ്പെട്ടതോടെ മൊബൈൽ ഫോണിനും നിരോധനം വന്നു. 16 വയസ്സ് മാത്രം പ്രായമുള്ളപ്പോൾ ആർത്തവം ഒഴിവാക്കാൻ അവർ മരുന്നുകൾ തന്നുതുടങ്ങി. ഇതോടെ രക്തസ്രാവവും വേദനയും കൊണ്ട് ഞാനേറെ കഷ്ടപ്പെട്ടു. ആ സാഹചര്യത്തിലും ഞാന്‍ മറ്റുള്ളവര്‍ക്കൊപ്പം ശയിക്കാന്‍ നിര്‍ബന്ധിക്കപ്പെട്ടു.

ട്രെയിൻ ടിക്കറ്റ്

കുറച്ച് മാസങ്ങൾക്ക് ശേഷം, എന്റെ ഉപഭോക്താക്കളിൽ ഒരാൾ പോലീസുകാരനാണെന്ന് ഞാൻ കണ്ടെത്തി. അദ്ദേഹത്തോട് ഞാന്‍ സഹായം അഭ്യര്‍ത്ഥിച്ചു. മനസ്സലിവ് തോന്നിയ അദ്ദേഹം കൊൽക്കത്തയ്ക്ക് ഒരു ട്രെയിൻ ടിക്കറ്റ് കൈമാറി. എന്നെ തനിക്കൊപ്പം കൊണ്ടുപോകുകയാണെന്ന് അദ്ദേഹം ബഡി ദീദിയെ ബോധ്യപ്പെടുത്തി. എന്നിട്ട് എന്നെ റെയില്‍വെ സ്റ്റേഷനില്‍ കൊണ്ടുപോയി വിട്ടു. 3000 രൂപയും അദ്ദേഹം എനിക്ക് തന്നു.

6 വർഷത്തിനുശേഷം

6 വർഷത്തിനുശേഷം ഞാൻ അങ്ങനെ അമ്മയെ കണ്ടു. നീ ഞങ്ങളെ എന്നെന്നേക്കുമായി ഉപേക്ഷിച്ചെന്ന് കരുതിയെന്ന് പറഞ്ഞ അമ്മയോട് സത്യം പറയാനുള്ള ശക്തി എനിക്കില്ലായിരുന്നു. ആ യാതനകള്‍ അവരറിഞ്ഞാല്‍ അവര്‍ ഹൃദയം പൊട്ടി മരിക്കും. തുടക്കത്തില്‍ എല്ലാം മറന്ന് വീട്ടില്‍ തന്നെ അടച്ചിരിക്കാനായിരുന്നു ശ്രമം. എന്നാല്‍ ഒരു എന്‍ജിഒയുടെ പ്രോല്‍സാഹനത്തോടെയാണ് പുതിയൊരു ജീവിതം തുടങ്ങുന്നത്.

നന്മക്കായി

പിന്നീട് എംബ്രോയിഡറി ഫാക്ടറിയിൽ ജോലിചെയ്യാൻ തുടങ്ങി, എന്റെ കുടുംബത്തെ പോറ്റാൻ മതിയായ വരുമാനം നേടി. എന്‍റെ അമ്മയ്ക്ക് വേണ്ടി ഒരു വീട് വാങ്ങണം. ഏറ്റവും വലിയ ആഗ്രഹം അതാണ്. എന്നെ രക്ഷിച്ച പൊലീസുകാരനും ഉപദ്രവിച്ച ദീദിയും മനുഷ്യരായിരുന്നു. ലോകത്ത് നല്ലതും ചീത്തയും ഉണ്ട്. നന്മക്കായി പോരാടാനാണ് ഞാന്‍ ആഗ്രഹിക്കുന്നതെന്നും അവര്‍ പറഞ്ഞു.