മുഖ്യമന്ത്രി തീരുമാനം കടുപ്പിക്കുമോ? സജി ചെറിയാനെ വിളിപ്പിച്ചു
തിരുവനന്തപുരം: ഭരണഘടനയ്ക്കെതിരായ വിവാദ പരാമര്ശത്തില് മന്ത്രി സജി ചെറിയാനില് നിന്ന് മുഖ്യമന്ത്രി വിശദീകരണം തേടി. വിഷയത്തില് രാജ്ഭവന് ഇടപെട്ടതിന് പിന്നാലെ ആണ് മുഖ്യമന്ത്രി മന്ത്രിയില്നിന്ന് വിശദീകരണം തേടിയത്.
അതേസമയം, ഭരണഘടനയെ വിമര്ശിച്ചിട്ടില്ല, ഭരണകൂടത്തെയാണ് വിമര്ശിച്ചതെന്നാണ് മന്ത്രി നല്കിയ മറുപടി എന്നാണ് വിവരം. പ്രസംഗം വിവാദമായതിന്റെ പശ്ചാത്തലത്തില് സംഭവത്തില് വിശദീകരണം നല്കാന് മന്ത്രി സജി ചെറിയാന് വൈകാതെ മാധ്യമങ്ങളെ കാണും.
അതേസമയം, ഭരണഘടനയ്ക്കെതിരെ മന്ത്രി സജി ചെറിയാന് നടത്തിയ വിവാദ പരാമര്ശത്തില് ഗവര്ണര് ആരിഫ് മുഹമ്മദ് ഖാന് വിശദീകരണം തേടിയിട്ടുണ്ട്. പ്രസ്താവനയുടെ വീഡിയോ അടക്കം ഹാജരാക്കാന് ചീഫ് സെക്രട്ടറിക്ക് നിര്ദ്ദേശം നല്കിയതായാണ് റിപ്പോര്ട്ട്. മന്ത്രിയുടെ പ്രസ്താവന ഭരണഘടനാ ലംഘനമാണോയെന്ന് പരിശോധിക്കുമെന്നും പ്രസംഗം പരിശോധിച്ചതിന് ശേഷം ഗൗരവതരമെങ്കില് രാഷ്ട്രപതിക്ക് റിപ്പോര്ട്ട് നല്കും എന്നും അദ്ദേഹം പറഞ്ഞിട്ടുണ്ട്. വിഷയം ഗൗരവത്തോടെയാണ് രാജ്ഭവന് കാണുന്നത്. ഇത് സംബന്ധിച്ച് ഗവര്ണര് വൈകിട്ട് മാധ്യമങ്ങളെ കാണും.
സജി ചെറിയാന് പറഞ്ഞത്:
മനോഹരമായ ഭരണഘടന ആണ് ഇന്ത്യയില് എഴുതിവെച്ചിരിക്കുന്നതെന്ന് നമ്മള് എല്ലാവരും പറയും. രാജ്യത്തെ ഏറ്റവും പ്രധാനപ്പെട്ടത്. ഞാന് പറയും ഇന്ത്യയിലെ ഏറ്റവും കൂടുതല് ജനങ്ങളെ കൊള്ളയടിക്കാന് പറ്റിയ ഭരണഘടനയാണ് എഴുതിവച്ചിരിക്കുന്നത്. ബ്രിട്ടീഷുകാരന് പറഞ്ഞ് തയ്യാറാക്കി കൊടുത്ത ഒരു ഭരണഘടന ഇന്ത്യാക്കാര് എഴുതിവച്ചു. അത് ഈ രാജ്യത്ത് 75 വര്ഷമായി നടപ്പാക്കുന്നതിന്റെ ഭാഗമായി രാജ്യത്ത് ഏതൊരാള് പ്രസംഗിച്ചാലും ഞാന് സമ്മതിക്കില്ല. ഈ രാജ്യത്ത് ഏറ്റവും കൂടുതല് കൊള്ളയടിക്കാന് പറ്റിയ ഏറ്റവും മനോഹരമായ ഭരണഘടനയെന്ന് ഞാന് പറയും
ഇതിന്റെ മുക്കും മൂലയിലും എല്ലാം കുറച്ച് നല്ല കാര്യങ്ങള് എന്ന പേരില് ജനാധിപത്യം മതേതരത്വം എന്നെല്ലാം എഴുതിവെച്ചുവെച്ചു എന്ന് അല്ലാതെ സാധാരണക്കാരെ ചൂഷണം ചെയ്യുക എന്നത് മാത്രമാണ് ഇതിന്റെ ഉദ്ദേശ്യം, സജി ചെറിയാന് പറഞ്ഞു. പ്രതിവാര രാഷ്ട്രീയ നിരീക്ഷണം നൂറിന്റെ നിറവില് എന്ന പരിപാടി മല്ലപ്പള്ളിയില് ഉദ്ഘാടനം ചെയ്തുകൊണ്ട് പ്രസംഗിക്കുകയായിരുന്നു സജി ചെറിയാന്.
സജി ചെറിയാന്റെ പരാമര്ശത്തിന് പിന്നാലെ രൂക്ഷമായ വിമര്ശനം ഉയര്ന്നുവരികയാണ്. പ്രതിപക്ഷ നേതാവ് വിഡി സതീശനും ബിജെപി അധ്യക്ഷന് കെ സുരേന്ദ്രനും സജി ചെറിയാനെതിരെ വിമര്ശനം നടത്തി. സജി ചെറിയാന്റെ പ്രസംഗം ഗുരുതരമായ സത്യപ്രതിഞ്ജാ ലംഘനമാണെന്നും അദ്ദേഹത്തെ മന്ത്രി സഭയില് നിന്നും പുറത്താക്കാന് മുഖ്യമന്ത്രി തയ്യാറാകണമെന്നുമാണ് കെ സുരേന്ദ്രന് ആവശ്യപ്പെട്ടിരിക്കുന്നത്. ഇന്ത്യന് ഭരണഘടന ചൂഷണത്തിനുള്ള അവസരമൊരുക്കുന്നതാണെന്ന് പറഞ്ഞയാള്ക്ക് ഒരു നിമിഷം പോലും മന്ത്രി സ്ഥാനത്ത് തുടരാന് അവകാശമില്ലെന്നും അദ്ദേഹം പ്രസ്താവനയില് പറഞ്ഞു.
ഭരണഘടനയില് തൊട്ട് സത്യപ്രതിജ്ഞ ചെയ്ത വ്യക്തിയാണ് സജി ചെറിയാന്. ഭരണഘടനയെ സംരക്ഷിക്കേണ്ട ചുമതലയുള്ളയാളാണ് മുഖ്യമന്ത്രി. കമ്മ്യൂണിസ്റ്റുകാരുടെ ഇന്ത്യന് ഭരണഘടനയോടുള്ള അനാദരവ് ആണ് സജി ചെറിയാന്റെ വാക്കുകളിലൂടെ പുറത്തു വന്നിരിക്കുന്നത്. കമ്മ്യൂണിസ്റ്റുകാരന് മാത്രമല്ല കേരളത്തിന്റെ മുഖ്യമന്ത്രി കൂടിയാണ് താനെന്ന് പിണറായി വിജയന് മനസിലാക്കണം.ജനങ്ങളെ കൊള്ളയടിക്കാന് എഴുതിയതാണ് ഇന്ത്യന് ഭരണഘടനയെന്നാണ് മന്ത്രി പറയുന്നത്. ഇത് അങ്ങേയറ്റം വിവരക്കേടും അശ്ലീലവുമാണെന്ന് കെ.സുരേന്ദ്രന് പറഞ്ഞു.
Recommended Video
ഭരണഘടനാ ശില്പികളെ അപമാനിക്കുന്നതാണ് മന്ത്രി നടത്തിയ പ്രസംഗമെന്നാണ് വിഡി സതീശന് പറഞ്ഞത്. സത്യപ്രതിജ്ഞാ ലംഘനം ആണ് മന്ത്രി നടത്തിയതെന്നും സത്യപ്രതിജ്ഞയോടെ കൂറ് കാണിക്കേണ്ട മന്ത്രി അത് ലംഘിച്ചെന്നും സതീശന് പറഞ്ഞു. ജനാധിപത്യം,മതേതരത്വം എന്നീ വാക്കുകളെ പോലും മന്ത്രി അപമാനിച്ചു. മന്ത്രി രാജി വെയ്ക്കാന് തയ്യാറാകണം. രാജിവെച്ചില്ലേങ്കില് അദ്ദേഹത്തെ സര്ക്കാര് പുറത്താക്കണം. അതിന് മുഖ്യമന്ത്രി തയ്യാറായില്ലേങ്കില് പ്രതിപക്ഷം ശക്തമായ നിയമനടപടി സ്വീകരിക്കുമെന്നും അദ്ദേഹം പറഞ്ഞു.
Click it and Unblock the Notifications
Sign in with Google