പ്രവാസികള്ക്ക് സന്തോഷ വാര്ത്ത; നാട്ടിലേക്ക് ചാര്ട്ടേഡ് വിമാനങ്ങള്? വിമാനകമ്പനികളുമായി ചര്ച്ച നടത്തും
തിരുവനന്തപുരം: ഗള്ഫ് രാജ്യങ്ങളിലേക്കുള്ള പ്രവാസികളുടെ യാത്രാ പ്രശ്നത്തിന് പരിഹാരം കാണാന് മുഖ്യമന്ത്രി പിണറായി വിജയന്റെ അധ്യക്ഷതയില് ഉന്നതതല അവലോകന യോഗം ചേര്ന്നു. ഉത്സവ, അവധിക്കാല സീസണുകളില് ഗള്ഫ് രാജ്യങ്ങളില് നിന്നും കേരളത്തിലേയ്ക്ക് വിമാന കമ്പനികള് പലപ്പോഴും അമിതമായ ടിക്കറ്റ് നിരക്ക് ഈടാക്കുന്നു എന്നത് ഏറെക്കാലമായി പ്രവാസികള് ഉന്നയിക്കുന്ന പ്രശ്നമാണ്.
ഇക്കാര്യത്തില് സംസ്ഥാനത്തിന് ഏതൊക്കെ തരത്തില് ഇടപെടാനാകും എന്നതു സംബന്ധിച്ച് വിലയിരുത്തുന്നതിനായാണ് മുഖ്യമന്ത്രി പിണറായി വിജയന്റെ അധ്യക്ഷതയില് ഉന്നതതല അവലോകനയോഗം ചേര്ന്നത്. ഗള്ഫ് മേഖലയില് നിന്നും നാട്ടിലേയ്ക്കു വരുന്ന സാധാരണക്കാരയ പ്രവാസികള്ക്ക് സഹായകരമാകുന്ന തരത്തില് വിമാനടിക്കറ്റ് ലഭ്യമാക്കാന് നടപടി സ്വീകരിക്കുമെന്ന് നേരത്തേ സര്ക്കാര് തീരുമാനിച്ചിരുന്നു. ഇതിനായി ബജറ്റിലും തുക വകയിരുത്തിയിരുന്നു. ഇതിന്റെ തുടര്നടപടി എന്ന നിലയിലാണ് അവലോകനയോഗം ചേര്ന്നത്.
ഓണ്ലെനായി ചേര്ന്ന യോഗത്തില് ചീഫ് സെക്രട്ടറി ഡോ. വി.പി ജോയ്, നോര്ക്ക വകുപ്പ് പ്രിന്സിപ്പല് സെക്രട്ടറി സുമന് ബില്ല, ധനവകുപ്പ് പ്രിന്സിപ്പല് സെക്രട്ടറി ബിശ്വന്ത് സിന്ഹ, ഗതാഗതവകുപ്പ് സെക്രട്ടറി ബിജു പ്രഭാകര്, സിയാല് എം.ഡി. എസ്. സുഹാസ്, കിയാല് എം.ഡി ദിനേഷ് കുമാര്, നോര്ക്ക റൂട്ട്സില് നിന്നും റസിഡന്റ് വൈസ് ചെയര്മാന് പി. ശ്രീരാമകൃഷ്ണന്, സി.ഇ.ഒ ഹരികൃഷ്ണന് നമ്പൂതിരി.കെ, ജനറല് മാനേജര് അജിത്ത് കോളശ്ശേരി എന്നിവര് സംബന്ധിച്ചു.
ഇന്ത്യയില് നിന്നുളള വിമാനകമ്പനികളുടെ നിരക്കിനേക്കാള് കുറവില് ഗള്ഫില് നിന്നും ചാര്ട്ടേഡ് ഫ്ളൈറ്റുകള് ലഭ്യമാണോ എന്നത് പരിശോധിക്കും. ഇതിന്റെ ആദ്യപടിയായി വിമാനകമ്പനിയുമായി പ്രാഥമിക ചര്ച്ച നടത്താന് യോഗത്തില് തീരുമാനമായി. ഇതിനായി സിയാല് എം.ഡി യേയും നോര്ക്ക വകുപ്പ് പ്രിന്സിപ്പല് സെക്രട്ടറിയേയും യോഗം ചുമതലപ്പെടുത്തി.
വിവിധ ഗള്ഫ് രാജ്യങ്ങളില് നിന്നുള്പ്പെടെ ചാര്ട്ടേഡ് വിമാനങ്ങള് ഏകോപിപ്പിക്കാന് സംവിധാനമുളള കമ്പനികളുമായാണ് ചര്ച്ച. പ്രാഥമിക ചര്ച്ചകള്ക്കു ശേഷം അനുമതിക്കായി കേന്ദ്രവ്യോമയാന മന്ത്രാലയത്തെ സമീപിക്കാനും യോഗത്തില് തീരുമാനമായി. വിമാനസര്വ്വീസുകള്ക്കു പുറമേ കപ്പല്മാര്ഗ്ഗമുളള യാത്രാസാധ്യതകള് സംബന്ധിച്ചും യോഗം വിലയിരുത്തി.
Click it and Unblock the Notifications
Sign in with Google