മുഷറഫ് വാക്കു പാലിക്കുന്നു !
ഇസ്ലാമബാദ്: പാകിസ്താനെ ഒരു ആധുനിക ജനാധിപത്യരാഷ്ട്രമായി മാറ്റുമെന്നുള്ള തന്റെ പ്രസ്താവന വെറുംവാക്കല്ലെന്ന് പാക് പട്ടാളമേധാവി മുഷറഫ് തെളിയിക്കുന്നു. വെറും മദ്രസ സംസ്കാരത്തിലൊതുങ്ങാതെ പാകിസ്താന്റെ ഇടുങ്ങിയ മതമൗലികസ്വഭാവങ്ങള് മാറ്റുമെന്നാണ് മുഷറഫ് കഴിഞ്ഞ ദിവസം രാഷ്ട്രത്തോട് നടത്തിയ പ്രസംഗത്തില് അഭിപ്രായപ്പെട്ടിരുന്നത്.
ആദ്യമായി അദ്ദേഹം ഒരു വലിയ ചുവടുവയ്ക്കുന്നു. സ്വകാര്യടെലിവിഷന് ചാനലുകള്ക്ക് പാകിസ്താന്റെ മണ്ണില് സ്വാതന്ത്യ്രം നല്കാന് തീരുമാനിച്ചിരിക്കുകയാണ്. ജനവരി 16ബുധനാഴ്ച പാക് മന്ത്രിസഭായോഗത്തിലാണ് ടെലിവിഷന് ചാനല് രംഗത്ത് സര്ക്കാരിന്റെ കുത്തകയവസാനിപ്പിക്കാനുള്ള തീരുമാനം എടുത്തത്.
പാകിസ്താനില് ഇനി മുതല് സ്വകാര്യചാനലുകള്ക്ക് പ്രവര്ത്തിക്കാന് കഴിയും. അതേ സമയം വിദേശചാനലുകള്ക്ക് പ്രവര്ത്തനസ്വാതന്ത്യ്രം അനുവദിച്ചിട്ടില്ല. പാകിസ്താന് പൗരനോ പാകിസ്താനില് സ്ഥിരതാമസക്കാരനോ ആയവര്ക്ക് മാത്രമേ സ്വകാര്യടെലിവിഷന് ചാനല് തുടങ്ങാന് അനുമതി നല്കൂ.
പാകിസ്താനില് ഇപ്പോള് സര്ക്കാര് നിയന്ത്രണത്തിലുള്ള മൂന്നു ടിവി ചാനലുകളാണ് ഉള്ളത്. സര്ക്കാര് നിയന്ത്രണത്തിലുള്ള ഏതാനും റേഡിയോ സ്റേഷനുകളും പ്രവര്ത്തിക്കുന്നുണ്ട്. സ്വകാര്യചാനലുകള്ക്ക് ലൈസന്സ് നല്കുന്നതിന്റെ മേല്നോട്ടത്തിനായി പാകിസ്ഥാന് ഇലക്ട്രോണിക് റഗുലേറ്ററി അതോറിറ്റി(പിഇഎംആര്എ)രൂപീകരിക്കും. ഈ അതോറിറ്റിക്ക് ഒരു ചെയര്മാനും ഒമ്പത് അംഗങ്ങളുമുണ്ടായിരിക്കും. ഇവരെ മുഷറഫാണ് നിയമിക്കുക.