കശ്മീര് തിരഞ്ഞെടുപ്പ് അട്ടിമറിക്കാന് അനുവദിക്കില്ല: വാജ്പേയി
ദില്ലി: കശ്മീര് തിരഞ്ഞെടുപ്പ് അട്ടിമറിക്കാന് ആരേയും അനുവദിക്കില്ലെന്ന് പ്രധാനമന്ത്രി വാജ്പേയി. ആഗസ്ത് 15 വ്യാഴാഴ്ച ചെങ്കോട്ടയില് നിന്നുള്ള 56ാമത് സ്വാതന്ത്യ്രദിന പ്രസംഗത്തില് പ്രധാനമന്ത്രി പറഞ്ഞു.
ഈ തിരഞ്ഞെടുപ്പ് കശ്മീരിലെ ജനങ്ങള്ക്ക് പുതിയൊരു യുഗം സമ്മാനിക്കുമെന്നും വാജ്പേയി പറഞ്ഞു. യുദ്ധത്തില് പിടിച്ചെടുക്കാന് കഴിയാത്ത കശ്മീരിനെ തീവ്രവാദത്തിലൂടെ പിടിച്ചെടുക്കാമെന്ന് പാകിസ്ഥാന് കരുതുന്നു. അതിര്ത്തിക്കപ്പുറത്തുനിന്നുള്ള തീവ്രവാദഭീഷണിയെ ചെറുത്തുതോല്പിക്കാന് ഇന്ത്യ പ്രതിജ്ഞാബദ്ധമാണ്. ജമ്മുകശ്മീര് ഇന്ത്യയുടെ അവിഭാജ്യഘടകമാണ്. - വാജ്പേയി പറഞ്ഞു.
പാകിസ്ഥാന്റെ ഇരട്ടനയത്തെ വാജ്പേയി വിമര്ശിച്ചു. അന്താരാഷ്ട്രമുന്നണിയ്ക്കൊപ്പം നിന്ന് തീവ്രവാദത്തെ എതിര്ക്കുന്ന പാകിസ്ഥാന് അതേ സമയം അതിര്ത്തിയ്ക്കപ്പുറത്ത് നിന്നും തീവ്രവാദത്തെ പ്രോത്സാഹിപ്പിക്കുകയാണ്. - വാജ്പേയി പറഞ്ഞു.
ഗുജറാത്തിലെ വര്ഗ്ഗീയകലാപത്തെ ദൗര്ഭാഗ്യകരം എന്നും വാജ്പേയി തന്റെ പ്രസംഗത്തില് വിമര്ശിച്ചു. ന്യൂനപക്ഷത്തിന് സംരക്ഷണവും തുല്ല്യപദവിയും നല്കുമെന്നും അദ്ദേഹം പറഞ്ഞു.
യൂറോപ്യന് രാഷ്ട്രങ്ങള് അവരുടെ ഭിന്നതകളെല്ലാം മറന്ന് ഒന്നായതുപോലെ നമുക്ക് നമ്മുടെ ഭിന്നതകളെല്ലാം സംഭാഷണത്തിലൂടെ പരിഹരിക്കാമെന്നും വാജ്പേയി പറഞ്ഞു.