കോണ്‍. പ്രശ്നം തീരുന്നതുവരെ യു.ഡി.എഫ്. യോഗം ചേരില്ല

തിരുവനന്തപുരം: കോണ്‍ഗ്രസിലെ ഗ്രൂപ്പ് വഴക്ക് തീരുന്നതുവരെ ഐക്യമുന്നണി ഉന്നതാധികാര സമിതി യോഗം ചേരില്ലെന്ന് കണ്‍വീനല്‍ ഉമ്മന്‍ചാണ്ടി വെളിപ്പെടുത്തി.

ദില്ലിയില്‍ നിന്ന് തിരിച്ചെത്തിയ ഉമ്മന്‍ചാണ്ടി വിമാനത്താവളത്തില്‍ പത്രലേഖകരോട് സംസാരിക്കുകയായിരുന്നു. ചില ഘടകകക്ഷികള്‍ മുന്നണിയുടെ പ്രവര്‍ത്തനത്തില്‍ അതൃപ്തി രേഖപ്പെടുത്തിയിട്ടുണ്ടല്ലോയെന്ന് ചൂണ്ടിക്കാണിച്ചപ്പോള്‍ ജനാധിപത്യ വ്യവസ്ഥിതിയില്‍ എല്ലാവര്‍ക്കും അതിനുള്ള സ്വാതന്ത്യ്രം ഉണ്ടെന്ന് അദ്ദേഹം പറഞ്ഞു. ഘടക കക്ഷികളെ ഇക്കാര്യത്തില്‍ കുറ്റപ്പെടുത്താനാവില്ല.

പ്രശ്നങ്ങള്‍ പരിഹരിയ്ക്കേണ്ടത് ഹൈകമാണ്ടാണ്. എല്ലാ കാര്യങ്ങളും കേന്ദ്ര നേതൃത്വത്തെ അറിയിച്ചിട്ടുണ്ട്. എപ്പോള്‍ വേണമെങ്കിലും ഹൈ കമാണ്ട് തീരുമാനം വരാം. രാജ്യസഭാ തിരഞ്ഞെടുപ്പു സമയത്ത് ഉണ്ടായതുപോലെയല്ല ഇപ്പോഴത്തെ സ്ഥിതി. നാല് സംസ്ഥാനങ്ങളിലെ തിരഞ്ഞെടുപ്പ് കഴിയട്ടേയെന്നാണ് ആദ്യം പറഞ്ഞത്. ഇപ്പോഴാണെങ്കില്‍ കരുണാകരന്‍ ആശുപത്രിയിലാണ്. അദ്ദേഹവുമായി ചര്‍ച്ച നടത്താന്‍ ഹൈക്കമാന്‍ഡിന് കഴിഞ്ഞിട്ടില്ല.

കോണ്‍ഗ്രസ്സിനെ അച്ചടക്കമുള്ള പാര്‍ട്ടിയായി മുന്നോട്ട് കൊണ്ടുപോകാനുള്ള തീരുമാനം നേതൃത്വത്തില്‍ നിന്നുതന്നെ ഉണ്ടാകുമെന്നാണ് തന്റെ വിശ്വാസമെന്ന് ഉമ്മന്‍ചാണ്ടി പറഞ്ഞു. ഈ പ്രശ്നം പരിഹരിയ്ക്കാന്‍ ഇനിയും താന്‍ ദില്ലിയിലേയ്ക്ക് പോകില്ലെന്നും ഉമ്മന്‍ ചാണ്ടി പറഞ്ഞു.