സിപിഎം: തിരുവനന്തപുരം, കൊല്ലം ജില്ലാ തിരഞ്ഞെടുപ്പുകള് റദ്ദാക്കും
തിരുവനന്തപുരം: കടുത്ത വിഭാഗീയത നടന്നുവെന്ന് പാര്ട്ടി തല അന്വേഷണ കമ്മീഷന് കണ്ടെത്തിയ തിരുവനന്തപുരം, കൊല്ലം ജില്ലാക്കമ്മിറ്റികളിലെ തിരഞ്ഞെടുപ്പുകള് റദ്ദാക്കാന് സിപിഎം സംസ്ഥാനക്കമ്മിറ്റി തീരുമാനിച്ചു.
ഔദ്യോഗിക പാനലിനെതിരെ മത്സരത്തിലൂടെ വിജയിച്ച് തിരുവനന്തപുരം ജില്ലാക്കമ്മിറ്റിയിലെത്തിയ ഒന്പത് പിണറായി പക്ഷക്കാരും കൊല്ലം ജില്ലാക്കമ്മിറ്റിയിലെത്തിയ നാല് വിഎസ് പക്ഷക്കാരും ജില്ലാക്കമ്മിറ്റികളില് നിന്നും പുറത്താകും. ഇവര്ക്ക് പകരമായി പരാജയപ്പെട്ടവരെ അതാത് ജില്ലാ കമ്മിറ്റികളില് ഉള്പ്പെടുത്താനും തീരുമാനമായിട്ടുണ്ട്.
സംസ്ഥാനക്കമ്മിറ്റി തീരുമാനം തിരുവനന്തപുരത്ത് വിഎസ് പക്ഷത്തിന് നേട്ടമാകുമ്പോള് കൊല്ലത്ത് പിണറായി പക്ഷത്തിനാണ് ഇത് ആശ്വാസം പകരുക.
പി. കരുണാകരന് അധ്യക്ഷനും എം.സി ജോസഫൈന്, എം.വി ഗോവിന്ദന് എന്നിവര് അംഗങ്ങളുമായ സമിതിയുടെ കണ്ടെത്തലിന്റെ അടിസ്ഥാനത്തില് തിരുവനന്തപുരം ജില്ലാക്കമ്മിറ്റി പുനസംഘടിപ്പിയ്ക്കാനും തീരുമാനിച്ചിട്ടുണ്ട്.
തിരുവനന്തപുരം ജില്ലാക്കമിറ്റി പിരിച്ചുവിട്ട് താത്കാലിക ജില്ലാ കമ്മിറ്റി രൂപീകരിയ്ക്കണമെന്ന് ആവശ്യപ്പെട്ട വിഎസ് പക്ഷത്തിന് ഈ തീരുമാനം വലിയ നേട്ടമായാണ് വിലയിരുത്തപ്പെടുന്നത്. കേന്ദ്ര നേതാക്കളുടെ നിലപാടാണ് വിഎസ് പക്ഷത്തിന് പിന്തുണയായതെന്നാണ് സൂചന.
ജില്ലാക്കമ്മിറ്റിയുടെ പുനസംഘടനയ്ക്കായി ജനുവരി 25ന് പ്രത്യേക പ്ലീനം വിളിച്ചു ചേര്ക്കാനും തീരുമാനിച്ചിട്ടുണ്ട്.