12 വയസ്സുകാര്ക്ക് സെക്സ്; ബില് അണിയറയില്
കുട്ടികള്ക്കെതിരേയുള്ള ലൈംഗിക പീഡനങ്ങള് തടയുന്ന 2010ലെ ബില്ലിലാണ് വിവാദ വ്യവസ്ഥകളുള്ളത്. കുട്ടികളുടെ അവകാശ സംരക്ഷണത്തിനായുള്ള ദേശീയ കമ്മീഷനാണ് ബില്ല് തയാറാക്കുന്നത്. സംസ്ഥാനങ്ങളുടെ അഭിപ്രായങ്ങള് ആരാഞ്ഞതിന് ശേഷം ബില്ല് കാബിനറ്റിന്റെയും പാര്ലമെന്റ് സ്റ്റാന്ഡിംഗ് കമ്മിറ്റിയുടെയും പരിഗണനയ്ക്കു അയയ്ക്കും.
12-14 പ്രായമുള്ള കുട്ടികള്ക്കും 14-16 പ്രായത്തിലുള്ള കുട്ടികള്ക്കും പരസ്പര ധാരണയോടു കൂടിയ ബാഹ്യമായ ശാരീരിക ഇടപെടല് (നോണ് പെനിട്രേറ്റിങ് സെക്സ്) ആകാമെന്നാണ് കരടുബില്ലില് പറയുന്നത്. 12-14 വിഭാഗത്തിലുള്ളവര് രണ്ട് വയസ്സ് വരെ പ്രായവ്യത്യാസമുള്ളവരുമായി മാത്രമേ ശാരീര ബന്ധത്തില് ഏര്പ്പെടാവൂ. എന്നാല് 14-16 വിഭാഗത്തിലുള്ളവര്ക്ക് മൂന്ന് വയസ്സ് വരെ പ്രായവ്യത്യാസമുള്ള കുട്ടികളുമായി ബാഹ്യമായ ശാരീരിക ബന്ധത്തില് ഏര്പ്പെടാം.
രാജ്യത്ത് നിലവില് 16 വയസ്സിന് മുകളിലുള്ളവര്ക്ക് മാത്രമേ നിയമപരമായി ലൈംഗിക ബന്ധത്തില് ഏര്പ്പെടാന് അനുമതിയുള്ളത്. അമേരിക്കയിലും ബ്രിട്ടനിലും ഇതേ പ്രായം തന്നെയാണ് ലൈംഗിക ബന്ധത്തിനായി നിശ്ചയിച്ചിരിയ്ക്കുന്നത്. എന്നാല് സ്പെയിനില് 13 വയസ്സുമുതല് പരസ്പര ധാരണയോടു കൂടിയ ലൈംഗിക ബന്ധം ആവാം.
നിലവിലുള്ള നിയമപ്രകാരം 12 വയസ്സുള്ള കുട്ടികള് ലൈംഗിക ബന്ധത്തില് ഏര്പ്പെടുകയും അതില് ഏതെങ്കിലും കുട്ടിയുടെ മാതാപിതാക്കള് പരാതിയുമായി എത്തിയാല് കേസ് ജുവനൈല് ജസ്റ്റീസ് ബോര്ഡിനു മുമ്പിലെത്തും. 16ന് വയസ്സിന് താഴെയുള്ളവരുമായി ലൈംഗിക ബന്ധത്തിലേര്പ്പെടുന്നത് ബലാത്സംഗത്തിന്റെ നിര്വചനത്തിലും ഉള്പ്പെടുന്നുണ്ട്.
ഓരോ സംസ്ഥാനങ്ങള്ക്കും ബില്ലിന്മേലുള്ള പോരായ്മകളും അഭിപ്രായങ്ങളും രേഖപ്പെടുത്താം. ബില്ല് പ്രാബല്യത്തിലെത്താന് ഇനിയുമേറെക്കാലം പിടിയ്ക്കുമെന്നാണ് കരുതപ്പെടുന്നത്. അതേ സമയം നിലവിലെ ഇന്ത്യന് സാഹചര്യത്തില് ബില്ലിലെ വ്യവസ്ഥകള് യാഥാര്ഥ്യമാകില്ലെന്ന് കരുതുന്നവരും ഏറെയാണ്.
Click it and Unblock the Notifications
Sign in with Google