എന്താണ് യൂറോപ്യന് പ്രതിസന്ധി?
കഴിഞ്ഞ കുറച്ചുദിവസങ്ങളായി വിപണി താഴോട്ടിറങ്ങുമ്പോഴെല്ലാം പറഞ്ഞുകേള്ക്കുന്ന സ്ഥിരം പല്ലവിയാണ് യൂറോപ്യന് പ്രതിസന്ധി. എന്താണ് ഈ പ്രതിസന്ധി? ഈ പ്രതിസന്ധിയെ കുറിച്ചറിയണമെങ്കില് അല്പ്പം യൂറോപ്യന് ചരിത്രം മനസ്സിലാക്കണം. 1958ല് രൂപീകരിച്ച യൂറോപ്യന് കോള് ആന്റ് സ്റ്റീല് കമ്യൂണിറ്റിയാണ് യൂറോപ്യന് യൂനിയന് എന്ന ആശയത്തിലേക്ക് തന്നെ നയിച്ചത്.
1993ല് മാസ്ട്രിച്ച് ഉടമ്പടിയിലൂടെ യൂനിയന് യാഥാര്ഥ്യമായെങ്കിലും 1999ലാണ് 11 രാജ്യങ്ങള് യൂറോ നാണയമായി അംഗീകരിച്ചത്. ഇതുകൊണ്ട് ഏറ്റവുമധികം നേട്ടമുണ്ടായത് പോര്ച്ചുഗല്, ഇറ്റലി, അയര്ലന്ഡ്, ഗ്രീസ്, സ്പെയിന് (പി.ഐ.ഐ.ജി.എസ്)തുടങ്ങിയ രാജ്യങ്ങള്ക്കാണ്.
യൂറോ ഉപയോഗിക്കുന്നതിനു മുമ്പ് മുകളില് പറഞ്ഞ രാജ്യങ്ങളെല്ലാം തന്നെ ജര്മനി പോലുള്ള രാജ്യങ്ങളില് നിന്നു കൂടിയ പലിശക്കാണ് പണം കടം വാങ്ങിയിരുന്നത്. നിരക്ക് കുറവാണെങ്കിലും നാണയങ്ങളുടെ മൂല്യത്തിലുള്ള വ്യത്യാസമാണ് തുക വര്ധിപ്പിച്ചത്.
എല്ലാ രാജ്യങ്ങളും യൂറോ ആയതോടെ ചെലവു കുറഞ്ഞ രീതിയില് സാമ്പത്തിക സഹായങ്ങള് സ്വീകരിക്കാന് ഈ രാജ്യങ്ങള്ക്കു സാധിച്ചു. ഇതോടെ ഗ്രീസ്, പോര്ച്ചുഗല്, ഇറ്റലി തുടങ്ങിയ രാജ്യങ്ങള് ക്രമാതീതമായി കടം വാങ്ങികൂട്ടാന് തുടങ്ങി. വാസ്തവത്തില് യൂറോപ്പില് ഇപ്പോള് നിലനില്ക്കുന്നത് കടക്കെണിയാണ്.