സൗമ്യ കൊലക്കേസ്: ഗോവിന്ദച്ചാമി അപ്പീല് നല്കും
അത്യപൂര്വ്വ കേസായി കാണാനാകില്ലെന്നാണു വിശ്വാസം. പ്രതിക്കു വധശിക്ഷ പ്രഖ്യാപിക്കും മുന്പു സ്വീകരിക്കേണ്ട മാനദണ്ഡം കോടതി പാലിച്ചോയെന്ന കാര്യങ്ങള് പരിശോധിക്കേണ്ടതുണ്ട്. സത്യസന്ധമായി മൊഴി നല്കിയ സാക്ഷിക്കെതിരേ പൊതുജനം തിരിച്ചടിച്ചു. ഗോവിന്ദച്ചാമിയെ കോടതിയില് നിന്ന് പുറത്തേക്കു കൊണ്ടുവരുമ്പോള് ജനങ്ങള് കല്ലും ചെരുപ്പും എറിഞ്ഞത് ശരിയായില്ലെന്ന് ഗോവിന്ദച്ചാമിയുടെ അഭിഭാഷകനായ അഡ്വ. ബി എ ആളൂര് പറഞ്ഞു. ജനങ്ങള് എല്ലാ കേസിലും ഇങ്ങനെ പ്രതികരിക്കാത്തത് എന്തുകൊണ്ടാണെന്നും ആളൂര് ചോദിച്ചു.
വ്യക്തിക്ക് സ്വതന്ത്രമായി സാക്ഷി പറയാനുള്ള അവകാശത്തെയാണു പ്രോസിക്യൂഷനും സംഘടനകളും ഹനിച്ചത്. ഈ സാഹചര്യത്തില് മൊഴി നല്കാന് ആരെങ്കിലും ഇനി തയാറാകുമോയെന്ന കാര്യവും ചിന്തിക്കേണ്ടതാണ്.
സ്ത്രീ സമൂഹത്തിനു പ്രതി ഭീഷണിയാണെന്ന് ആരോപിക്കും മുന്പ് അതിനുള്ള സാഹചര്യം പരിശോധിക്കണം. ഇതിനു സാഹചര്യം ഒരുക്കിയതു റെയില്വേയാണ്. റെയില്വേക്കെതിരെ ആരും ആഞ്ഞടിച്ചില്ല. പ്രതിഷേധിക്കാന് ഒരു പ്രസ്ഥാനവും മുന്നോട്ടു വന്നില്ല. തങ്ങളുടെ തെറ്റു മറയ്ക്കാന് ഗോവിന്ദച്ചാമിയെ കുറ്റപ്പെടുത്തുന്ന നിലപാടാണു റെയില്വ സ്വീകരിച്ചതെന്നും അദ്ദേഹം പറഞ്ഞു.