സ്വർണം പണയം വെക്കുന്നോ? ഇക്കാര്യം സുക്ഷിച്ചോ , ഇല്ലെങ്കില് പണി കിട്ടും; അവസാനം സ്വർണം കാണില്ല
പെട്ടെന്ന് എന്തെങ്കിലും ഒരു ആവശ്യം വന്നാല് വീട്ടിലുള്ള സ്വർണം സമീപത്തെ ധനകാര്യ സ്ഥാപനങ്ങളില് കൊണ്ടുപോയി പണയം വെക്കുന്നവരാണ് നമ്മളില് പലരും. വേഗത്തിൽ പണം ലഭിക്കും, ക്രെഡിറ്റ് സ്കോർ ആവശ്യമില്ല, പലിശ നിരക്ക് വ്യക്തിഗത വായ്പയെക്കാൾ കുറവാണ്, വായ്പ തിരിച്ചടച്ചാൽ സ്വർണ്ണം തിരികെ ലഭിക്കും എന്നിവയെല്ലാമാണ് സ്വർണപ്പണയ വായ്പയുടെ പ്രധാന അനുകൂല ഘടകങ്ങള്. ഇതുകൊണ്ടെല്ലാം തന്നെ ആളുകള് സ്വർണ്ണ വായ്പ എടുക്കുന്നത് ഏറ്റവും സുരക്ഷിതമായ കടമെടുക്കൽ മാർഗമാണ് എന്ന് വിശ്വസിക്കുന്നു.
റിസർവ് ബാങ്ക് ഓഫ് ഇന്ത്യയുടെ കണക്കുകള് പ്രകാരം രാജ്യത്തെ സ്വർണ്ണ വായ്പകൾ അടുത്തിടെ ഏകദേശം ഇരട്ടിയായി 1.7 ലക്ഷം കോടി കവിഞ്ഞു. രാജ്യത്തെ കുടുംബങ്ങൾ റെക്കോർഡ് തോതിൽ ആഭരണങ്ങൾ പണയം വെക്കാന് ആരംഭിച്ചതോടെ സ്വർണ്ണപ്പണയം ഏറ്റവും വേഗത്തിൽ വളരുന്ന ക്രെഡിറ്റ് രൂപങ്ങളിലൊന്നായി മാറുകയും ചെയ്തിരിക്കുന്നു.
എന്നാല് യഥാർത്ഥത്തില് സ്വർണ്ണപ്പണയും അത്ര ഗുണപരമായ കാര്യം അല്ല. ആവർത്തിച്ചുള്ള പണയവും തുടർച്ചയായ പലിശ തിരിച്ചടവും നിങ്ങളുടെ സമ്പത്ത് ക്രമേണ ഇല്ലാതാകുന്നതിന് തന്നെ കാരണമാകുന്നു. ഒരു താൽക്കാലിക പരിഹാരമായി തുടങ്ങുന്നത് പലപ്പോഴും ആഭരണങ്ങൾ എന്നെന്നേക്കുമായി നഷ്ടപ്പെടുന്നതിനും, അതോടൊപ്പം കുടുംബത്തിന്റെ വിശ്വാസവും സുരക്ഷിതത്വവും അപ്രത്യക്ഷമാകുന്നതിനും ഇടയാക്കുന്നു.
സ്വർണ്ണ വായ്പകൾ എന്തുകൊണ്ട് സുരക്ഷിതമല്ല?
ആഭരണങ്ങൾ ഈടായി നൽകുന്നതിനാൽ, വായ്പ നൽകുന്നവർക്ക് റിസ്ക് കുറവാണ്. അതിനാൽ തന്നെ വേഗത്തിൽ പണവും ന്യായമായ പലിശ നിരക്കും ലഭിക്കുമെന്നായിരിക്കും ധനകാര്യ സ്ഥാപനങ്ങളുടെ പ്രധാന വാഗ്ദാനം. സ്വർണ്ണ വായ്പകൾ എന്തുകൊണ്ട് സുരക്ഷിതമല്ല? തിരിച്ചടവ് പൂർത്തിയാക്കിയാൽ സ്വർണ്ണം തിരികെ ലഭിക്കുമെന്ന് കുടുംബങ്ങൾ വിശ്വസിക്കുന്നു. എന്നാൽ, കണക്കുകൾ പറയുന്നത് മറ്റൊരു കഥയാണ്.
ബാങ്കുകളും ബാങ്കിങ് ഇതര ധനകാര്യ സ്ഥാപനങ്ങളും സ്വർണ്ണ വായ്പകൾക്ക് 9% മുതൽ 20% വരെ പലിശ ഈടാക്കുന്നു. പലിശ വ്യക്തിഗത വായ്പയെക്കാൾ കുറവാണ് എന്നതിൽ മാത്രം ശ്രദ്ധ കേന്ദ്രീകരിക്കുന്നവർ, കാലക്രമേണ പലിശ കൂടിവരുന്നത് ശ്രദ്ധിക്കാറില്ല. ഒരേ ആഭരണങ്ങൾ ഉപയോഗിച്ച് വായ്പ പുതുക്കുകയോ പുതിയ വായ്പകൾ എടുക്കുകയോ ചെയ്യുമ്പോൾ, പലിശ തുക ആഭരണത്തിന്റെ മൂല്യത്തിന് തുല്യമോ അതിലും കൂടുതലോ ആകാം.
ഇവിടെയാണ് അപകടം. പല കുടുംബങ്ങളും താൽക്കാലികമായി പലിശ മാത്രം തിരിച്ചടയ്ക്കുന്നു. അപ്പോള് മുതല് മാത്രം അവിടെ അവശേഷിക്കുന്നു. വായ്പ കാലാവധി അവസാനിക്കുമ്പോൾ, ആഭരണങ്ങൾ തിരികെ വാങ്ങാൻ ആവശ്യമായ പണം ഉണ്ടാകില്ല. അതിനാൽ, വായ്പ പുതുക്കുകയോ മറ്റൊരു ആഭരണം കൂടി പണയം വെക്കുകയോ ചെയ്യുന്നു. ഇത് ഇങ്ങനെ തുടർന്ന് പോകുന്ന വലിയൊരു വിഭാഗം തന്നെയുണ്ട്.
ആർബിഐ കണക്കുകള് പ്രകാരം സ്വർണ്ണ വായ്പകളിൽ നോണ് പെർഫോമിങ് അസറ്റ്സ് ഏതാണ്ട് പൂജ്യത്തിനടുത്താണ്. ഇതിനർത്ഥം, തിരിച്ചടവ് സാധ്യമാകാതെ വരുമ്പോൾ, വായ്പ നൽകുന്നവർ ആഭരണങ്ങൾ ലേലം ചെയ്ത് പണം ഈടാക്കുന്നു. മറുവശത്തോ ആഭരണം പൂർണ്ണമായി നഷ്ടമാകുന്നു. ചുരുക്കത്തില് വർഷങ്ങളുടെ സമ്പാദ്യം, കുടുംബത്തിന്റെ പാരമ്പര്യ ആഭരണങ്ങൾ, അല്ലെങ്കിൽ വിവാഹ ആഭരണങ്ങൾ ഒറ്റ ലേലത്തിൽ അപ്രത്യക്ഷമാകുന്നു.
ഇത്തരം പ്രശ്നങ്ങള് ഉണ്ടെങ്കിലും സ്വർണപ്പണയം പൂർണ്ണമായും ഒഴിവാക്കാന് പലർക്കും പറ്റിയെന്ന് വരില്ല. ഈ സമയത്ത് ശ്രദ്ധിക്കേണ്ട ചില കാര്യങ്ങളാണ് ഇനി പറയുന്നത്
ഒഴിവാക്കേണ്ടത്
സ്കൂൾ ഫീസ്, ഗ്രോസറി, വാടക, അല്ലെങ്കിൽ വീട്ടുചെലവുകൾ പോലുള്ള പ്രതിമാസ ചെലവുകൾക്കായി സ്വർണ്ണ വായ്പ എടുക്കുന്നത് ഒഴിവാക്കണം. ഇത്തരം ആവശ്യങ്ങൾക്ക് വായ്പ എടുത്താൽ, അത് കൃത്യസമയത്ത് തിരിച്ചടയ്ക്കാൻ കഴിയാതെ വരും, പലിശ കൂടുകയും മറ്റൊരു ആഭരണം പണയം വെക്കേണ്ടി വരുകയും ചെയ്യും.
ചെറുകിട വ്യവസായികൾ അടുത്ത സീസണിലെ വിൽപ്പനയെ ആശ്രയിച്ച് വായ്പ എടുക്കുന്നത് അപകടകരമാണ്. വിൽപ്പന പ്രതീക്ഷിച്ചതിലും കുറഞ്ഞാൽ, വായ്പ പുതുക്കേണ്ടി വരും, പലിശ ഭാരം വർധിക്കും. ഓഹരി വിപണിയിലോ ട്രേഡിംഗിലോ മറ്റൊരു ബിസിനസ്സിലോ സ്വർണ്ണം പണയം വെച്ച് നിക്ഷേപിക്കുന്നത് അതീവ റിസ്കാണ്. നിക്ഷേപം പരാജയപ്പെട്ടാൽ, നഷ്ടം പണം മാത്രമല്ല, കുടുംബത്തിന്റെ സമ്പത്താണ്.
എപ്പോള് എടുക്കാം
പെട്ടെന്നുള്ള മെഡിക്കൽ എമർജൻസി, മണിക്കൂറുകൾക്കുള്ളിൽ പണം ആവശ്യമുള്ള സാഹചര്യങ്ങൾ എന്നിവയ്ക്ക് സ്വർണ്ണ വായ്പ ഒരു ജീവൻരക്ഷാ മാർഗമാകാം. എന്നാൽ, തിരിച്ചടവിനുള്ള ഉറവിടം (ഇൻഷുറൻസ്, ശമ്പളം, അല്ലെങ്കിൽ ഉറപ്പായ പണം) വ്യക്തമായിരിക്കണം.
ഒരു മാസത്തിനുള്ളിൽ ഫിക്സഡ് ഡെപ്പോസിറ്റ് മെച്യൂർ ആകുന്നുണ്ടെങ്കിൽ, അല്ലെങ്കിൽ ഹ്രസ്വകാല പണലഭ്യതാ പ്രശ്നത്തിന്, സ്വർണ്ണ വായ്പ ഉപയോഗിക്കാം. എന്നാൽ, പണം ലഭിച്ച ഉടൻ വായ്പ അടച്ചുതീർക്കണം.
Click it and Unblock the Notifications
Sign in with Google