ആം ആദ്മി എംഎല്എമാരെ ചാക്കിലാക്കാന് ബിജെപി; എംഎല്എമാര്ക്ക് 25 കോടി വാഗ്ദാനം ചെയ്തെന്ന് കെജ്രിവാള്
ന്യൂഡല്ഹി: ആം ആദ്മി പാര്ട്ടി എം എല് എമാരെ ബി ജെ പി കൂറുമാറ്റാന് ശ്രമം നടത്തിയതായി ആരോപിച്ച് പാര്ട്ടി കണ്വീനറും ഡല്ഹി മുഖ്യമന്ത്രിയുമായ അരവിന്ദ് കെജ്രിവാള്. ഡല്ഹിയിലെ ഏഴ് ആം ആദ്മി പാര്ട്ടി എം എല് എമാരെ അടര്ത്തിയെടുക്കാന് ശ്രമം നടത്തി എന്നാണ് കെജ്രിവാളിന്റെ പ്രതികരണം. പാര്ട്ടി മാറാന് 25 കോടി രൂപ വാഗ്ദാനം ചെയ്തു എന്നാണ് കെജ്രിവാള് ആരോപിക്കുന്നത്.
ബി ജെ പി എ എ പി എം എല് എമാരുമായി ചര്ച്ച നടത്തി. ബി ജെ പി നേതാവിന്റെ സംഭാഷണം ടേപ്പ് റെക്കോര്ഡ് ചെയ്തിട്ടുണ്ട് എന്നും ആം ആദ്മി പറഞ്ഞു. കുറച്ച് ദിവസങ്ങള്ക്ക് ശേഷം തങ്ങള് കെജ്രിവാളിനെ അറസ്റ്റ് ചെയ്യും എന്നും അതിനുശേഷം തങ്ങള് എം എല് എമാരെ തകര്ക്കും എന്നും ബി ജെ പി ഭീഷണിപ്പെടുത്തിയതായും അദ്ദേഹം ആരോപിച്ചു. 21 എം എല് എമാരുമായി ബി ജെ പി ചര്ച്ച നടത്തിയിട്ടുണ്ട്.
ഡല്ഹിയിലെ ആം ആദ്മി പാര്ട്ടി സര്ക്കാരിനെ താഴെയിറക്കും എന്നാണ് ബി ജെ പിയുടെ ഭീഷണി എന്നും കെജ്രിവാള് കൂട്ടിച്ചേര്ത്തു. ബി ജെ പി ബന്ധപ്പെട്ട എം എല് എമാര് കൂറുമാറാന് വിസമ്മതിച്ചെന്നും മുഖ്യമന്ത്രി പറഞ്ഞു. തിരഞ്ഞെടുപ്പില് ആം ആദ്മി പാര്ട്ടിയെ തോല്പ്പിക്കാന് ശക്തിയില്ലാത്തതിനാല് ഡല്ഹിയിലെ എ എ പി സര്ക്കാരിനെ അവിശുദ്ധ മാര്ഗത്തിലൂടെ താഴെയിറക്കാനാണ് ബി ജെ പി ശ്രമിക്കുന്നതെന്നും കെജ്രിവാള് കുറ്റപ്പെടുത്തി.
ഇതിനര്ത്ഥം തന്നെ അറസ്റ്റ് ചെയ്യുന്നത് ഒരു മദ്യ കുംഭകോണം അന്വേഷിക്കാനല്ല. അവര് ഡല്ഹിയിലെ ആം ആദ്മി പാര്ട്ടി സര്ക്കാരിനെ താഴെയിറക്കാന് ഗൂഢാലോചന നടത്തുകയാണ് എന്നാണ്. കഴിഞ്ഞ ഒമ്പത് വര്ഷമായി ബി ജെ പി സര്ക്കാരിനെ താഴെയിറക്കാന് നിരവധി ഗൂഢാലോചനകള് നടത്തി എന്നും അദ്ദേഹം ചൂണ്ടിക്കാട്ടി. തങ്ങളുടെ എം എല് എമാരെല്ലാം ഒറ്റക്കെട്ടാണ് എന്നും കെജ്രിവാള് വ്യക്തമാക്കി.
ഡല്ഹിയിലെ ജനങ്ങള്ക്കായി ആം ആദ്മി സര്ക്കാര് എത്രമാത്രം പ്രവര്ത്തിക്കുന്നുവെന്ന് ജനങ്ങള്ക്ക് അറിയാം. ബി ജെ പി സൃഷ്ടിക്കുന്ന എല്ലാ പ്രതിബന്ധങ്ങളും തങ്ങള് തരണം ചെയ്യുമെന്നും കെജ്രിവാള് പറഞ്ഞു. അതേസമയം ഡല്ഹിയില് രാഷ്ട്രീയ അശാന്തി ഉണ്ടാക്കാനാണ് ബി ജെ പി ശ്രമിക്കുന്നതെന്ന് മന്ത്രി അതിഷ് ആരോപിച്ചു.
Click it and Unblock the Notifications
Sign in with Google