കർഷക സമരം; ഖാലിസ്ഥാൻ ബന്ധമുള്ള 1178 അക്കൗണ്ടുകൾ കൂടി ബ്ലോക്ക് ചെയ്യണമെന്ന് ട്വിറ്ററിനോട് കേന്ദ്രസർക്കാർ

Updated: Monday, February 8, 2021, 14:03 [IST]

ദില്ലി; കർഷകരുടെ പ്രതിഷേധവുമായി ബന്ധപ്പെട്ട് 1178 അക്കൗണ്ടുകൾ കൂടി ബ്ലോക്ക് ചെയ്യണമെന്ന് ട്വിറ്ററിനോട് കേന്ദ്രസർക്കാർ.മൈക്രോ ബ്ലോഗിംഗ് പ്ലാറ്റ്‌ഫോം ദുരുപയോഗം ചെയ്തതിന് ഖാലിസ്ഥാൻ അനുഭാവികളുമായി ബന്ധമുണ്ടെന്ന് സംശയിക്കുന്നതോ പാകിസ്ഥാന്റെ പിന്തുണയുള്ളതോ ആയ അക്കൗണ്ടുകൾ ബ്ലോക്ക് ചെയ്യാനാണ് നിർദ്ദേശം നൽകിയിരിക്കുന്നത്.

ട്വിറ്ററിലെ 257 അക്കൗണ്ടുകൾ തടയാൻ കേന്ദ്രം നേരത്തേ നിർദേശം നൽകിയിരുന്നു. തുടർന്ന് ഇത് ട്വിറ്റർ പൂട്ടുകയും ചെയ്തിരുന്നു. പിന്നാലെയാണ് വീണ്ടും അക്കൗണ്ടുകൾ ബ്ലോക്ക് ചെയ്യണമെന്ന ആവശ്യവുമായി കേന്ദ്രം ട്വിറ്ററിനെ സമീപിച്ചിരിക്കുന്നത്. ഐടി നിയമത്തിലെ സെക്ഷൻ 69 എ പ്രകാരം പുറപ്പെടുവിച്ച നിർദേശങ്ങൾ ട്വിറ്റർ ഇതുവരെ പാലിച്ചിട്ടില്ല. ആഭ്യന്തര മന്ത്രാലയത്തിൽ നിന്നും മറ്റ് സുരക്ഷാ ഏജൻസികളിൽ നിന്നും ഉപദേശം ലഭിച്ചതിനെത്തുടർന്നാണ് ഐടി മന്ത്രാലയം അടുത്തിടെ ആവശ്യം ഉയർത്തിയത്.

തടയാൻ ഉത്തരവിട്ട അക്കൗണ്ടുകൾ ഖാലിസ്ഥാനി അനുഭാവികളോ പാകിസ്ഥാന്റെ പിന്തുണയുള്ളതോ വിദേശ പ്രദേശങ്ങളിൽ നിന്ന് പ്രവർത്തിക്കുന്നതോ ആണ്. ഈ അക്കൗണ്ടുകൾ കർഷകരുടെ തെറ്റായ വിവരങ്ങളും പ്രകോപനപരമായ ഉള്ളടക്കങ്ങളും പങ്കിടാനാണ് ഉപയോഗിക്കുന്നതെന്നാണ് കേന്ദ്രസർക്കാർ വൃത്തങ്ങൾ പറയുന്നത്. ട്വിറ്ററിലെ ഈ അക്കൗണ്ടുകളുടെ പ്രവർത്തനങ്ങൾ രാജ്യത്തിന്റെ വിവിധ ഭാഗങ്ങളിൽ നടക്കുന്ന കർഷകരുടെ പ്രതിഷേധം കണക്കിലെടുത്ത് ക്രമസമാധാനത്തിന് ഭീഷണിയാകാൻ സാധ്യതയുണ്ടെന്നാണ് സർക്കാരിന്റെ നിലപാട്.ഉത്തരവ് പാലിക്കാൻ വിസമ്മതിച്ചാൽ കമ്പനിക്ക് പിഴ ചുമത്തുമെന്നും ഏഴ് വർഷം വരെ തടവ് ശിക്ഷ ലഭിക്കുമെന്നും സർക്കാർ ട്വിറ്ററിന് മുന്നറിയിപ്പ് നൽകി.

സെൽഫിയെടുത്തും കുശലം ചോദിച്ചും തിരുവനന്തപുരത്തെ ബീച്ചുകളിൽ ശശി തരൂർ- ചിത്രങ്ങൾ

നേരത്തേ സർക്കാരിന്റെ നിർദ്ദേശങ്ങൾ അവഗണിച്ചാൽ ട്വിറ്ററിനെതിരെ കടുത്ത നടപടികളിലേക്ക് നീങ്ങുമെന്ന് സർക്കാർ മുന്നറിയിപ്പ് നൽകിയിരുന്നു. കർഷകരുടെ പ്രതിഷേധത്തെ പിന്തുണച്ച് ട്വീറ്റുകൾ ലൈക്ക് ചെയ്യാനുള്ള ട്വിറ്റർ സ്ഥാപകൻ ജാക്ക് ഡോർസിയുടെ സമീപകാല തീരുമാനം സോഷ്യൽ മീഡിയ പ്ലാറ്റ്‌ഫോമിലെ നിഷ്പക്ഷതയെക്കുറിച്ച് ചോദ്യങ്ങൾ ഉയർത്തുന്നുവെന്ന് കരുതുന്ന സർക്കാർ വ്യക്തമാക്കിയിരുന്നു.