സ്വർണവില 70000 ത്തിലേക്ക് ഇടിയുമോ? സാധ്യത ഇല്ലാതില്ല; ഇതാ ചരിത്രത്തിലെ ഏറ്റവും വലിയ 5 ഇടിവുകള്‍

റെക്കോർഡ് നിരക്കിലേക്ക് ഉയർന്ന സ്വർണ വിലയില്‍ ആശ്വാസമായി മോശമല്ലാത്ത ഇടിവാണ് കഴിഞ്ഞയാഴ്ച ഉണ്ടായത്. പിന്നീട് വില അല്‍പം മുകളിലേക്ക് കയറിയെങ്കിലും സംസ്ഥാന ചരിത്രത്തിലെ ഏറ്റവും ഉയർന്ന നിരക്കായ 97000 ന് മുകളിലേക്ക് ഇതുവരെ എത്തിയിട്ടില്ല. ഭാവിയില്‍ വില കുറയുമെന്നും അത് അല്ല വീണ്ടും മുന്നോട്ട് തന്നെ കുതിക്കുമെന്നും പറയുന്ന വിദഗ്ധരുണ്ട്.

ചിലരൊക്കെ പ്രതീക്ഷീക്കുന്നത് കയറിയത് പോലെ തന്നെ വില കുത്തനെ താഴേക്ക് പോകുമെന്നാണ്. അവരുടെ പ്രതീക്ഷകള്‍ ഒരിക്കലും നടക്കില്ലെന്ന് പറയാന്‍ സാധിക്കില്ല. അതിന് ഏറ്റവും മികച്ച ഉദാഹരണങ്ങള്‍ ചരിത്രത്തില്‍ തന്നേയുണ്ട്. അത്തരത്തില്‍ ലോകത്തെ തന്നെ ഞെട്ടിച്ച ഏറ്റവും വലിയ അഞ്ച് സ്വർണ വില ഇടിവുകളാണ് ഇവിടെ പരിചയപ്പെടുത്തുന്നത്.

1. 1869 സെപ്റ്റംബർ 24 - യുഎസ് "ബ്ലാക്ക് ഫ്രൈഡേ"

1869 സെപ്റ്റംബർ 24-ന് യുഎസിൽ സംഭവിച്ച "ബ്ലാക്ക് ഫ്രൈഡേ" എന്നറിയപ്പെടുന്ന സ്വർണ വിലയിടിവ്, സാമ്പത്തിക വിപണിയിൽ വൻ പരിഭ്രാന്തിയായിരുന്നു സൃഷ്ടിച്ചത്. പ്രമുഖ ധനകാര്യ വിദഗ്ധരായ ജേ ഗൗൾഡും ജെയിംസ് ഫിസ്കും ചേർന്ന് സ്വർണ വിപണിയെ കൈപ്പിടിയിൽ ഒതുക്കാൻ ശ്രമിച്ചത് ദുരന്തത്തിന് കാരണമാകുകയായിരുന്നു.

പ്രസിഡന്റ് യുലിസസ് എസ്. ഗ്രാന്റിന്റെ ഒരു ബന്ധുവിലൂടെ ലഭിച്ച രഹസ്യ വിവരങ്ങൾ ഉപയോഗിച്ച്, അവർ വൻതോതിൽ സ്വർണം വാങ്ങി വില കുത്തനെ ഉയർത്താൻ ശ്രമിച്ചു. എന്നാൽ, ഈ പദ്ധതി പുറത്തറിഞ്ഞതോടെ, പ്രസിഡന്റ് ഗ്രാന്റ് ട്രഷറി വകുപ്പിനോട് 4 മില്യൺ ഡോളറിന്റെ സ്വർണം വിപണിയിൽ ഇറക്കാൻ ഉത്തരവിട്ടു. ഇതോടെ, സ്വർണത്തിന്റെ വില ഔൺസിന് 160 ഡോളറിൽ നിന്ന് 130 ഡോളറിലേക്ക് കൂപ്പുകുത്തി, ഓഹരി വിപണിയിലും വൻ തകർച്ചയുണ്ടായി.

1980 ജനുവരി - 850

1980 ജനുവരിയിൽ, സ്വർണ വില ഔൺസിന് 850 ഡോളർ എന്ന എക്കാലത്തെയും ഉയർന്ന നിലവാരത്തിലെത്തി (ജനുവരി 21-ന് ലണ്ടൻ ഫിക്സ് 850 ഡോളർ). എന്നാൽ, തുടർന്ന് സംഭവിച്ച വൻ വിലയിടിവ് റെക്കോർഡുകളിൽ ഇടംനേടി. ഉയർന്ന പണപ്പെരുപ്പം, ഭൗമരാഷ്ട്രീയ അസ്ഥിരത, യുഎസ് മോനിറ്ററി പോളിസിയിലെ പ്രധാന മാറ്റങ്ങൾ എന്നിവയാണ് ഈ കുതിപ്പിനും തകർച്ചയ്ക്കും കാരണമായത്. ഈ സംഭവം ആഗോള വിപണിയിൽ സ്വർണത്തിന്റെ വിലനിലവാരത്തെക്കുറിച്ചുള്ള ചർച്ചകൾക്ക് തുടക്കമിടുകയും ചെയ്തു.

2008-ലെ ആഗോള സാമ്പത്തിക പ്രതിസന്ധി

2008-ലെ ആഗോള സാമ്പത്തിക പ്രതിസന്ധിയിൽ സ്വർണ വില ഏഴ് മാസത്തിനുള്ളിൽ മൂന്നിലൊന്ന് ഭാഗത്തോളം ഇടിഞ്ഞു. ലിക്വിഡിറ്റി പ്രതിസന്ധി മൂലം, മറ്റ് അസ്ഥിര വിപണികളിലെ നഷ്ടങ്ങൾ നികത്താനും മാർജിൻ കോളുകൾ നേരിടാനും നിക്ഷേപകർ സ്വർണം വൻതോതിൽ വിറ്റഴിച്ചു. ഇത് സ്വർണ വിലയിൽ താൽക്കാലികമായെങ്കിലും വൻ ഇടിവുണ്ടാക്കി. ഈ പ്രതിസന്ധി, സ്വർണത്തിന്റെ 'സുരക്ഷിത നിക്ഷേപ' പദവിയെപ്പോലും ചോദ്യം ചെയ്യുന്നതായിരുന്നു.

2013 ഏപ്രിൽ - ബുള്ള്യൻ വിപണിയിലെ 'ഫ്ലാഷ് ക്രാഷ്'

1980-ന് ശേഷമുള്ള ഏറ്റവും വലിയ സ്വർണ വിലയിടിവായിരുന്നു 2013 ഏപ്രിലിൽ സംഭവിച്ചത്. ഈ 'ഫ്ലാഷ് ക്രാഷ്' ആഗോള സ്വർണ റിസർവുകളുടെ മൂല്യത്തിൽ 1 ട്രില്യൺ ഡോളറിന്റെ നഷ്ടമുണ്ടാക്കി. ചെറുകിട നിക്ഷേപകർക്കിടയിൽ ജനപ്രിയമായിരുന്ന ഫണ്ടുകൾ, വെറും ആഴ്ചകൾക്കുള്ളിൽ അഞ്ചിലൊന്ന് മൂല്യം നഷ്ടപ്പെട്ടു. സ്വർണ വില ഔൺസിന് 1,580 ഡോളറിൽ നിന്ന് 1,380 ഡോളറിലേക്ക് താഴ്ന്നു. ഇതോടൊപ്പം, വെള്ളിയുടെ വില 28 ഡോളറിൽ നിന്ന് 23 ഡോളറിലേക്കും, ചെമ്പിന്റെ വില ടണ്ണിന് 7,500 ഡോളറിൽ നിന്ന് 7,100 ഡോളറിലേക്കും ഇടിഞ്ഞു. ഈ വിലയിടിവ് മറ്റ് ലോഹ വിപണികളെയും ബാധിച്ചു.

2025 ഒക്ടോബർ - 12 വർഷത്തിനിടയിലെ ഏറ്റവും വലിയ തകർച്ച

2025 ഒക്ടോബർ 21-ന്, ആഗോള സാമ്പത്തിക വിപണികൾ റെക്കോർഡ് കുതിപ്പിന് സാക്ഷ്യം വഹിച്ചു. സ്വർണ വില, ഔൺസിന് 4,380 ഡോളറിന് മുകളിൽ റെക്കോർഡ് ഉയരത്തിൽ എത്തിയ ശേഷം, 6 ശതമാനത്തോളം ഇടിഞ്ഞ് 4,082 ഡോളറിലേക്ക് എത്തി. പിന്നീട്, വില 4,125 ഡോളർ നിലവാരത്തിൽ സ്ഥിരത കൈവരിച്ചു. 2013-ന് ശേഷമുള്ള ഏറ്റവും വലിയ വിലയിടിവായിരുന്നു ഇത്.

English summary

Gold Could Fall To 70000: Here Are The Five Biggest Historical Price Crashes